Oseas 7 - Aymar Bibliia 1986

1cunapachatejj marcajjar kolljjañ munta, Efrainampiru, Samariampiru ucqhajja,

juchapampi jan wali luratanacapampiquiw uñsti.

Takenis c'aricamaquiwa;

lunthatanacjamaw, utanacarus mantasipcaqui,

callenacansa jakenacatjja lluch'susipcaquiwa.

2Janiraquiw amuyasipquiti nayan take uca ñankhanac uñjascatajj-jja.

Jichhajj pachpa jan wali luratanacapaw muyuntasqui, ucanacsti nayajj uñjascapuntwa.

Marca apnakerinacajj jan wali sarnakapjje

3“Marcajjajj ñankha luräwinacapampi, c'arisiñanacapampejj reyirus, jilïrinacaparus cusisiyiwa.

4Take jupanacasti wachoka juchan sarnakerinacawa;

ninan phichcatat hornjamawa, cunjämatejj hornonejj naccatayi, ucatsti apanucuwayi masan poktaniñapcama.

5Reyisajj corona catokcän uca urojja,

jilïrinacajj vino umantayasaw usjayapjjaraqui.

¡Jupasti amparapjja loktaraquiwa qhitinacatejj jupat larusipcän ucanacarojja!

6Chuymanacapansti jan wali lurañacwa amtapjjejja,

mä hornsa naccatayapcaspa uqhama:

Hornonejj pakaraw ict'asjje,

ucampis khepa albajj hornojj naqhascaquiwa.

7Jïsa, take jupanacajj mä hornjamaw naqhapjje,

marca apnakerinacapar naqhantapcäns uqhama.

Take reyinacapaw aynacht'awayjjapjje,

janiraquiw maynis utjquiti nayar art'asinirejja.

Diosapat saranucur marca

8“Efrainajj yakha marcanacampiw sarnakjje.

Efrainajj maysäjjat khatit tortjamaquiwa tucuwayjje.

9Jaya jakenacaquiraquiw ch'amapsa tucsuwayjje,

jupasti ucjja janiraquiw amuyasquiti.

¡Ñic'utanacapas kakäjjaraquiwa, jupasti ucjja janiraquiw amuyasquiti!

10Jach'a jach'a tucutapaw Israelarojj aynacht'ayasqui,

uqhamäquipansa, jupanacajj janiw cuttanipquiti,

ni Tatitu Diosaparus thaktapcaraquiti.

11Efrainajj ipi palomjamawa, jan amuyuni.

Egiptoruw yanapjja mayi,

ucatsti Asiriaruquiw sararaqui.

12Ucampis cunapachatejj ucar sarapcani ucqhajja, känajjwa jupanacjjaru jacjjatäjja:

Alajjpach jamach'inacjamwa willirpayaraquï,

ñankha lurapjjatanacap laycuw jupanacarojj catjäjja.

13“¡Cunaquïcan jupanacatjja nayar apanucupjjatap laycojja!

K'ala tucjatäpjjaniwa, naya contra sayt'asipjjatanacap laycu.

Nayajj jupanacarojj khespiyañ munta,

ucampis jupanacajj naya contraw c'arisipjje.

14Iquiñansti wararisipcaraquiwa,

ucampis janiw take chuyma nayar art'asinipquituti,

nayat trigsa, vinsa mayiñataquejj yakha diosani jakenacjamaw chhojjriñchnokasipjje.

¡Naya contraw sayt'asipjjaraqui!

15Nayaw jupanacarojj yatichtjja, ch'amsa churaractjja,

ucampis jupanacajj naya contrajj jan walinacac amtapjje.

16Yakha diosonacaruquiw yupaychir sarjjapjje;

k'ewinucut arcor uñtatäpjjewa,

flechapasti janiraquiw purquiti puriñapäqui ucqharojja.

Jan wali arunac parlapjjatapatsti, jilïrinacapajj espadan jiwayatcamaw jiwarapjjani,

Egiptonsti jupanacatjja larusipjjaraquiniwa.”