1 Reyes 4 - Aymar Bibliia 1986

Salomonan apnakäwipa

1Salomonasti take Israel marcpachan reyipänwa.

2Jupan yanapirinacapasti acanacäpjjänwa: Azarías, jupasti Sadoc sacerdoten yokapänwa;

3Elihoref uqhamarac Ahías ucanaca, jupanacasti kellkerinaca Sisa ucan yokanacapänwa; Josafat ucaraqui, jupasti reyin secretariopana Ahilud ucan yokapänwa;

4Benaía, jupasti ejerciton jilïripa Joiada ucan yokapänwa; Sadoc, uqhamarac Abiatar ucanacasti sacerdotenacäpjjänwa;

5Azarías, jupasti gobernadoranacapan jilïripa Natán ucan yokapänwa; Zabud, jupasti reyina wali aytata sacerdote Natán amigopan yokapänwa;

6Ahisar ucasti palaciona mayordomönwa, uqhamarac Adoniram ucaraqui, jupasti Abda ucan yokapänwa, jupajj impuesto apthapiña uca lurañaru uchatänwa.

7Salomonasti take Israel marcjjarojja utt'ayänwa tunca payan apnakerinaca, jupanacan lurañanacapajja reyiru familiapamppacharu take cuna mank'añanaca churañanacapawa utjäna. Sapa mayni jupanacawa marana mä phajjspacha take cuna churañanacapajj wact'äna.

8Uca tunca payani apnakerinacasti acanacänwa: Ben-Hur, jupasti Efraín kollunacatänwa;

9Ben-Decar, jupasti Macaz, Saalbim, Bet-semes, Elón, uqhamarac Bet-hanán ucanacataraqui;

10Ben-Hesed, jupasti Arubot, Soco chekatänwa, uqhamarac Hefer take orakenacataraqui;

11Ben-Abinadab, jupasti Dor sat take uca provincianacataraqui; warmipasti Tafat satänwa, Salomonan phuchapa;

12Ahilud ucan Baana yokapasti, Taanac, Meguido ucanacatänwa, uqhamarac take Bet-seán ucataraqui, ucasti Saretán ucamp chicänwa Jezreel ucata juc'amp aynachana, Bet-seán ucata Abel-mehola ucacama, Jocmeam ucatsa juc'amp qhurina;

13Ben-Geber, jupasti Galaad chekanquiri Ramot oraketa, ucatsti juparojj wact'araquïnwa uñjaña Galaad ucanquiri jisc'a marcanacaru, ucanacasti Manasés ucan Jair yokapancänwa, uqhamarac Argob uca orakenacasa, ucasti Basán chekanwa jicjjatasïna. Cawqhantejj sojjta tunca jach'a marcanacajj utjcäna jach'a perkanacani, uqhamarac bronceta cerrojonacani;

14Ido ucan Ahinadab yokapa, jupasti Mahanaim ucata;

15Ahimaas, qhititejj Salomonan Basemat phuchapampi casarascäna ucasti Neftalí ucata;

16Husai ucan Baana yokapasti, Aser ucata, uqhamarac Alot ucataraqui;

17Parúa ucan Josafat yokapasti, Isacar ucata;

18Ela ucan Simei yokapasti, Benjamín ucata;

19Uri ucan Geber yokapasti, Gad sat oraketa, ucasti amorreonacan Sihón sat reyipan orakepänwa, uqhamarac Basán ucanquir Og sat reyin orakeparaqui.

Ucjjarusti mä gobernadoraw utjaraquïna take marcjjaru.

Salomón reyin yatiñ cancañapampi jach'aptatapa

20Judá uqhamarac Israel ucan jakenacapajja jan jact'cayänwa, cunjämatï kota lacana walja ch'allajj utjquejja uqhama. Jilarquiriw utjäna mank'añasa, umañasa, ucatsti cusisiñawa jilancäna.

21Salomón reyiw take marcanacjjaru apnakäna Eufrates sat uca jawirata filisteonacana orakepcama, uqhamarac Egipto korpacama. Jupanacasti impuestonacwa pagapjjäna, ucatsti Salomón reyiruwa jaysapjjäna jupan jacañapcama.

22Salomón reyin sapüru mank'aña waquichayañapanjja sojjta waranka sojjta patacani kilo sumïri jac'u, uqhamarac tunca quimsani waranka pä patacani kilo jac'u,

23tunca orko vacanaca wali liq'inacata, pä tunca orko vacanaca suma pastompi uywata, uqhamarac pataca ovejanaca janiw jact'atäcänti tarujanaca, gacelanaca, gamos ucanacata sipana, uqhamarac liq'i jamach'inacata sipansa.

24Salomonasti apnakänwa Eufrates ucata inti jalsu toke orakenaca, Tifsa ucata Gaza chekacama, uqhamarac uca orakenquir reyinacarusa, ucatsti sumancañwa utjayaraquïna uca muytpacha orakenacaru.

25Salomón reyejj jaccäna ucqhajja Judá, Israel jakenacajja, Dan ucata Beerseba ucqhacamajja samarataquiw jacapjjäna uva alinac thiyana, uqhamarac higo alinac thiyana.

26Salomonansti ucjjarojj pusi waranka caballonacan utanacapaw utjäna carronacapan caballonacapa, uqhamarac tunca payan waranka caballería soldadonacaraqui.

27Ucatsti uca apnaquirinacapawa churapjjerïna cunanacatejj waquisqui ucanacjja, cuna phajjsitejj wact'qui ucana. Ucsti churapjjerïnwa Salomón reyiru, uqhamarac sart'irinacaparu, jan cunas pist'añapataqui.

28Cunapachatï jupanacar wact'cäna ucqhasti apayapjjänwa cawqharutejj waquiscäna ucqharu cebada, jichhu caballonacataqui, uqhamarac qhumuña uywanacataquisa.

29Diosasti Salomonarojja wali yatiñ cancañwa churäna, uqhamarac ch'iqhi cancaña, ucatsti wali amuyt'añaraqui kota lacan walja ch'allanacar uñtata.

30Salomonan yatiñ cancañapasti jilt'atänwa Egiptonquirinacata sipana, uqhamarac inti jalsu tokenquirinacata sipansa.

31Take yatiñan jakenacat sipansa juc'amp yatiñanïnwa: Etán ucat sipana, juc'amp yatiñanïnwa, jupasti Zera ucan wawapänwa; uqhamarac Hemán, Calcol, uqhamarac Darda ucanacat sipansa, juc'amp yatiñanïnwa, jupanacasti Mahol ucan wawanacapäpjjänwa. Uca yatiñ cancañapasti yatisiraquïnwa uca muytpacha take marcanacana.

32Jupasti quimsa waranca säwi arunacwa arsüna, uqhamarac apsuraquïna waranka pheskani k'ochu arunaca.

33Parlänwa kokanacata, uqhamarac alinacata, Libanonquir uca cedrota kalltasina perkanacana alquis uca ch'ojjña koranaccama; uqhamaraquiw parlaraquïna animalanacjjata, jamach'inacjjata, orakenjam katatnaktas sarnaker animalanacjjata, uqhamarac chawllanacatsa.

34Aca orakena take marcanacata, reinonacata, jakenacajj yatiñapata ist'apjjäna, ucanacajj jutapjjänwa Salomonan yatiñap toket ist'iri.