1 Crónicas 12 - Aymar Bibliia 1986

Davidar jakcattata jakenaca

1Cunapachatï Davidajj Saúl reyin nayrakatapata apanucutäcäna ucqhajja, Cis chachan yokapawa Davidampi chicachasiri saräna Siclag chekana, mä tama jan ajjsariri guerrana wali nuwasiriraqui ucanacampiw jupar jakcattäna.

2Jupanacasti flecht'añ arcompi armatäpjjänwa, ucatsti jupanacajj kalsa k'orawt'añjja yatipjjänwa, flecht'añsa cupi amparampisa, jan ucajj ch'eka amparampisa. Jupanacasti acanacänwa: Benjamín tributa Saúl reyin familianacapa:

3Ahiezer, jupasti jilïrïnwa, uqhamarac Joás Sema chachan yokapa, jupasti Gabaa marcanquirïnwa; Azmavet chachan Jeziel, Pelet yokanacapa; Anatot marcanquiri Beraca, Jehú ucanacaraqui;

4gabaonita Ismaías ucaraqui, jupasti quimsa tunca jan ajjsariri ucanacan jilïripänwa; Gedera ucanquiri Jeremías, Jahaziel, Johanán, Joazabad ucanacaraqui.

5Eluzai, Jerimot, Bealías, Semarías, Sefatías harufita ucanaca;

6coreítas Elcana, Isías, Azariel, Joezer, Jasobeam ucanacaraqui;

7Gedor chekanquiri Jeroham chachan Joela, Zebadías yokanacapa.

8Gad uca tribunquirinacatsa, uqhamaraquiw Davidampïñataqui jutjjapjjäna, cunapachatï jupajj wasarana nuwasiñataqui lurat chekana ucancascäna ucqhajja. Jupanacasti guerrasiñanjja jan ajjsariri chachanacäpjjänwa, guerrataquisa suma yatichata, uqhamarac escudonacampi, lanzanacampi waquichataraqui. Jupanacajj leonar uñtatäpjjänwa, tarujar uñtataraquiw kollunacan t'ijupjjäna.

9Jupanacasti acanacäpjjänwa: Ezer, jupasti nayrïrïnwa; Obadías ucasti payïrïnwa; Eliab ucasti quimsïrïnwa;

10Mismana ucasti pusïrïnwa; Jeremías ucasti pheskërïnwa;

11Atai ucasti sojjtïrïnwa; Eliel ucasti pakallkörïnwa;

12Johanán ucasti quimsakallkörïnwa; uqhamarac Elzabad ucasti llätunquïrïnwa;

13Jeremías ucasti tunquïrïnwa, uqhamarac Macbanai ucasti tunca mayanïrïnwa.

14Gad chachan wawanacapasti ejercitona jilïrinacänwa. Jupanacat maynïri sullcajja pataca jakenacjjarünwa, ucatsti jilïrïqui ucasti waranka jakenacjjaruraqui.

15Jupanacaraquiw jallupachanjja Jordán jawirjja maqhatapjjäna, cunapachatï jawirajj wali jilarascäna ucqhajja, ucatsti jupanacajj jaltayapjjänwa take qhitinacatejj uca vallenacan jacapcäna ucanacaru, inti jalanta tokeru, uqhamarac inti jalsu tokerusa.

16Ucjjarusti Benjamín, uqhamarac Judá uca tribunacatjja yakhep jakenacajj sarapjjaraquïnwa Davidampi mayachasiri, nuwasiñataqui luratäcäna ucaru.

17Ucatsti Davidajj jupanacar jicjjatiri mistunisinjja sänwa:

—Jumanacatejj sumampiqui, uqhamarac yanapiri jutapjjsta ucajja, take chuymajjampiw catokapjjsma nayampïpjjañamataqui; ucampis jumanacatejj nayar aljantiri, uqhamarac uñisirinacajjaru catuyiri jutapjjsta ucajja, nayajj janis qhitirus jiwaycsta ucasa, ¡nayra awquinacasan Diosapa uñjpan, uqhamarac jumanacarojj mutuyaracpan! —sasa.

18Ucatsti Amasai chachajj, quimsa tunca jakenacata jilïrïcäna, qhititï Diosan ajayupansa phokt'atäcäna ucajja aqham sasaw art'äna:

“¡Sumancañäpan juma Davidampi, Isaí chachan yokapa!

¡Sumancañajja jumampïpan!

¡Sumancañäpan jumataquisa, uqhamarac yanapirinacamataquisa,

Diosamaw jumar yanaptam uca laycu!” sasa.

Davidasti jupanacarojj catokänwa, ucatsti tamapan jilïrinacapampi chicwa uchäna.

19Uqhamaraquiw Manasés uca tributa yakhep jakenacajj Davidampïñataqui jutjjapjjatayna, cunapachatï jupajj filisteonac taypiru jaquiri sarjjäna Saúl reyimpi nuwasiñataqui ucqha. Chekpachansa Davidajj janiw filisteonacar yanapañ amtanicänti, jilïrinacapajja tantachasisinjja amtapjjänwa qhithanucjjaña, aqham sasa: “Jiwasanacaru jan walt'ayasaw Saúl jilïripan ucar jakcattjjaspan” sasa.

20Manasés tributa jakenacajj Davidampïñataqui jutjjapjjäna, cunapachatï Siclag ucar sarapcäna ucqhajja acanacänwa: Adnas, Jozabad, Jediael, Micael, Jozabad, Eliú, Ziletai ucanacaraqui, jupanacasti Manasés uca soldadonacan jilïrinacapäpjjänwa.

21Acanacaw Davidaru yanapapjjäna nuwasiñanjja, jupanacasti takeniw jan ajjsariri guerran nuwasirïpjjäna uca laycu, ucatsti jupanacajj ejercitonjja jilïrinacäpjjänwa.

22Urut urutjamaw juc'ampi yanapirinacajj Davidan ucaru purinipjjäna, wali jach'a ejército tucuñcama, chekpachansa jach'a ejercitowa tucjjäna.

Davidan ejercitopa

23Hebrón chekanjja acanacaw takpacha soldadonacajja guerrataquejja Davidaru jakcattapjjäna, Saúl reyin reinopa jupar pasayjjañataqui, cunjämatï Tatitojj siscäna uqhamaru.

24Judá tributjja sojjta waranka quimsakallko patacani jakenacäpjjänwa, jupanacasti escudonacani, lanzanacani waquicht'atäpjjänwa guerrasiñataqui.

25Simeón tributjja pakallko waranka patacani jan ajjsariri guerrasiri jakenacäpjjänwa, guerrataquisa waquicht'ataraqui.

26Leví tributjja pusi waranka sojjta patacani jakenacäpjjänwa,

27Aarón ucan familiapatjja quimsa waranka pakallko patacani jiläpjjänwa, Joiada uca jilïripampi,

28uqhamarac Sadoc ucampi, jupasti jan ajjsariri guerrana nuwasiri waynänwa, familianacata pätunca payani jilïrinacampi.

29Benjamín tributjja quimsa waranka jakenacänwa, Saúl reyisti uca pachpa tribuncaraquïnwa, uca urunaccamajja jupanacatjja jilpachawa Saúl reyimpïpjjäna suma yanapasina.

30Efraín tributjja pä tunca waranka quimsakallko patacani jan ajjsariri wali aytata guerrana nuwasiri jakenacäpjjänwa familiapata.

31Manasés tributjja tunca quimsakallkoni waranka jakenacaw wact'ayatäpjjäna Davidaru reyita utt'ayiri sarapjjañapataqui.

32Isacar tributjja pä pataca urunaca suma uñt'iri jakenacäpjjänwa, uqhamata Israel marcajj yatiñapataqui cuna lurañsa, jupanacasti jilïrinacäpjjänwa tribupata take jakenacapamppacha, jupanacan apnakata.

33Zabulón tributjja pheska tunca waranka soldadonacäpjjänwa guerrasiñataquisa suma waquicht'ata, take casta armamentonacampi, jupanacasti take chuymäpjjänwa Davidar yanapt'añataqui.

34Neftalí tributjja waranka jilïrinacäpjjänwa, uqhamaraqui quimsa tunca pakallkoni waranka jakenacapampi, suma armata lanzanacampi, escudonacampi.

35Dan tributjja pä tunca quimsakallkoni waranka sojjta patacani soldadonacäpjjänwa.

36Aser tributjja pusi tunca waranka guerrataqui waquicht'ata soldadonacäpjjänwa.

37Ucjjarusti Jordán jawira maycatatsti, patac pä tuncani waranka jakenacaw utjapjjäna Rubén, Gad, uqhamarac Manasés tributa chicataparaqui, jupanacasti take casta armamentonacampi waquicht'atäpjjänwa.

38Take aca guerrana nuwasiri jakenacajja nuwasiñatacjamawa sarantapjjäna, jupanacasti take chuymawa Hebrón marcaru sarapjjäna Davidaru Israeljjaru reyita utt'ayañataqui; uqhamaraquiw takpacha israelitanacajja jan maynini amtasipjjaraquïna uca pachpa luraña.

39Jupanacasti Davidampejja quimsa uruwa mank'asa, umasa ucancapjjäna, marca masinacapawa cuntejj munapcäna ucanacjja waquichapjjäna.

40Uqhamaraquiwa jac'anquiri masinacapasa Isacar ucatsa, Zabulón, uqhamarac Neftalí ucatsa mank'jja apapjjäna asnonacata, camellonacata, mulanacata, uqhamarac orko vacanacatsa. Jupanacasti cunayman mank'añanacwa apapjjäna, jac'u, higota tortanaca, pasas, vino, aceite, uywanacatjja orko vacanaca, ovejanaca; take cunsa jilarquirwa apapjjäna, Israel marcpachana wali cusisiña utjatap laycu.