Isaías 58 - Aymar Bibliia 1986

Chekpach ayuno

1Tatitojj saraquituwa: “Jan ajjsarasa, wali jach'at art'am,

mä trompetäcaspas cuncamajj uqham art'asim;

marcajjarusti jan wali luratanacapatjj juchañcharaquim,

Jacobon marcaparusti jucha luratanacapat juchañcham.

2Sapüruw thakapjjetu,

sarnakäwinacajj jicjjatasasti c'uchiquïpjjewa,

mä suma asquinac lurir marcäpcaspas uqhama,

leyinacajjsa sumsa phokhapcaspa uqhama;

cheka leyinacwa mayipjjetu, nayar jac'achasisinsti c'uchiquïpjjaraquiwa,

3ucampis sapjjaraquiwa:

‘¿Cunataquirac ayunañänisti, Diosajj janejjay uñjcchitejja?

¿Cunataquirac ch'am tucuscañänisti, jupajj janejjay amuycchitejja?’ sasa.

Ayunañ urusti jumanacajj aljasiñanacaruw uscusipjjtajja,

irnakerinacamatsa k'al ch'amjja thalsupjjtajja;

4ayunañ urojja jumanacajj ch'ajjwañanacana jucha lurañanacanwa sarnakapjjtajja,

jiwayañatacjamaraquiw ch'acuntasipjjtajja.

Uqham ayunañ urunjja janiw nayajj mayisitanacamjja ist'quiristti.

5¿Jumanacasti amuyapjjtati cawquïri ayunañatejj llact'ata jicjjatasiñäqui,

p'ekes mä alir uñtata alintata,

uqhamaraqui llaqui isimpi isthapita khelljjan iquiñäqui ucajj cheka ayunütapa?

¿Ucaruti jumanacajj ‘Ayuno’ sapjjta?

‘¿Tatitun suma urupa sapjjaracta?’

6Chekpachansa janiw ucajj uqhamäquiti,

cawquïri ayunotejj cusisiyquitu ucajj acawa:

Cunatejj jan chekapäqui uca ñach'jjäsir cadenanac t'akjjaña,

yugor ñach'jjäsquis uca chinunaca jararaña,

t'akhesiyatanacarusti jan juc'ampi t'akhesiyjjaña,

uqhamarusa take cunatejj jan walïqui ucanac tucjaña;

7mank'at awtjatarusti mank'a churaña,

jan utaninacarusti utamaru catokaña,

jan isinirojj ist'ayaña,

jake masirusti yanapt'añaraqui.

8Ucapachaw khanamajj, khantati warawarar uñtata c'ajani,

usuchjatanacamas janc'aquiraquiw jacthapjjani.

Cheka cancañamasti juman nayrakatamwa sarani,

khapak cancañajjaraquiw juman khepamatjja arcanïtam.

9Ucapachajj jawsität ucqhajj nayajj ist'ämawa,

yanapa mayisisatejj arnakasïtajja,

nayasti: ‘Acancasctwa’ saraquïmawa.

Take t'akhesiyañanac tucusiyjjätajja,

mayninacarus janiraqui jisc'achcätajja, janiraqui cuna c'ari arunacsa aptätajja,

10uqhamaraqui jumapacha mank'at awtjatarus mank'ayäta,

llact'atarus pist'ayasiñapanjja yanapt'araquïta ucapachajja,

khanamajj ch'amacan khantani,

ch'iwinacamasti chica uru khanar uñtataw khanani.

11Nayajj jumarojj irpascapunïmawa,

wasaransti mank'añjja jilarquir churaraquïma,

janchimarusti ch'amañcharaquïmawa,

mä suma karpata pankar yapjamaw tucuraquïta,

mä uma jalsur uñtataw tucüta, umamasti janiw tucuscaraquiniti.

12Marcamasti nayra t'unjat perkanacwa wasitat sayt'ayani,

nayrapacha cimiento uscuntatanacwa wasitat sayt'ayaraquini.

Marcamarusti ‘Liwisit perkanac sayt'ayiri,

t'unjat utanac wasitat utachiri’ sasaw sutichapjjaraquini.

Samarañ urjjata

13“Samarañ urjja jan apanucumti,

nayan kollana urojjansti jani aljasiñanacaman sarnakamti,

uca urusti jumataquejj cusisiñ uruwa,

Tatitun kollana urupawa, jach'achatäñaparaquiwa;

uca urjja jach'acham, janiraqui jumataquiqui aljasiñanacan sarnakamti.

14Uqhamtejj phokhätajja, cusisiñwa nayan jicjjatäta,

nayasti jumarojj mä atipjirjamwa irpäma marcan kollu patanacap toke,

Jacob awquiman herencianacapatwa cusisiyaraquïma.”

Tatitu quipcaw ucjja arsu.