1 Samuel 9 - Aymar Bibliia 1986

Saúl waynampi, Samuelompi jiquisitapa

1Benjamín tribunsti mä jakew utjäna Cis sat sutini, jupasti Abiel jaken yokapänwa, Zeror sat jaken allchhiparaqui. Nayra achachilapasti Becorat sat jakeraquïnwa, Afía sat jaken yokapa. Uca Cis sat chachajj wali aytata jakënwa,

2uqhamasti jupanjja mä wayna yokapaw utjäna, wali suma uñnakt'aniraquïnwa, jupasti Saúl satänwa. Janiw maynis israelitanac taypinjja utjcänti uqham wali suma waynajja, uqhamarus wali jach'a tansänwa, janiw qhitis jupar jicjjatirejj utjcänti.

3Mä uruw uca Cis sat jaken kachu asnonacapajj chhakhatayna, ucat jupajj Saúl yokaparu saraqui:

“Waquichasim, uca asnonac thaktir saram. Uywatanacat mayni irpjjarusiwayam” sasa.

4Saúl waynajj sarasinjja Efraín kollunac tokew pasäna, Salisa sisqui uca cheka pasaraquïna, ucampis janiw kachu asnonacapjja jicjjatcänti. Ucjjarusti Saalim, uqhamarac Benjamín sisqui ucsa tokenacsa sararaquïnwa, ucampis janiraquiw jicjjatcänti.

5Zuf sisqui uca chekaru purisinsti Saúl waynajj cawquïri uywatatejj jupampi chica sarcäna ucarojj saraquïnwa:

—Cuttjjaquiñäni, inas awquejjajj jiwasat llaquisiscchi, kachu asnonacat sipansa —sasa.

6Uywatasti ucjjarojj saraquïnwa:

—Aca marcanjja mä profetaw utji, take jakenacasti juparojj wali yäkapjjaraqui, take cuntejj jupajj yatiyqui ucanacasti phokhasipuniwa. Jin sarañäni, inampis jupajj cawquirutejj sarañasäqui ucsa uñacht'ayistaspa —sasa.

7—Uqhamajj sarañäniya, ucampis, ¿cunaraqui uca profetataqui aparapiñänisti? Janiw t'ant'as wayakanacasanjja utjcjjestuti. Janiw cunasa jupar churañataquejj utjquiti —sasaw Saúl waynajj saraquïna.

8Uywatasti ucjjarojj saraquïnwa:

—Nayan mä jisc'a sencillo kollkew utjitu. Uc profetarojj churañäni jiwasar cawcsaru sarañasäquitejj uca uñacht'ayañapataqui —sasa.

9(Nayrapachanacanjja mä israelita jakejj cunsa Diosar jisct'asiñ munirïna ucapachajj sapjjerïnwa: “Uñjirin ucar sarañäni” sasa. Jichhajj qhititejj “profeta” satäqui ucajj nayrajj “uñjiri” satänwa.)

10—Waliquiwa, uqhamajj sarañäniya —sasaw Saúl waynajj saraquïna.

Ucatsti panpachaniw cawqhantejj profetajj jaccän uca marcar sarapjjäna.

11Cunapachatejj uca amstanjam marcaru maqhatasipcän ucqhasti, mä tawakonacampiw jiquisipjjäna, ucanacasti uma aptiriw sarasipcatayna, ucat uca tawakonacar jisct'apjjäna:

—¿Acanti uñjiri jakerojj jicjjatapjjeristjja? —sasa.

12Tawakonacasti sapjjaraquïnwa:

—Jïsa, ucancasquiwa uñjirejja, janc'aqui sarapjjam. Jichhürojj jupajj marcaruw juti, santuarion sacrificiojj loktasitap laycu.

13Marcaru purisinsti janc'aquiw juparojj thaktapjjäta, janïra santuarior mank'eri sarquipana. Jakenacasti janïraw mank'apcaniti jupan puriniñapcamajja, juparaquiw sacrificio loktatarojj bendiciñapa, uca khepatwa jawsayata jakenacajj mank'asipcani. Ucatpï jichhajj janc'aqui sarapjjam, anchhitajj jicjjatasipcätawa —sasaw tawakonacajj sapjjäna.

14Jupanacasti marca tokerojj maqhatasipcaquïnwa. Puripcäna uca horasaraquiw Samuelojj mistusincäna, jupanac tokeru jutasa, santuarior maqhatañataqui.

15Saúl waynan puriniñapa nayräjja urusti, Tatitojj Samuelorojj mä uñacht'äwi churäna aqham sasa:

16“Arumanthi alwajj aca quipca horasaruw Benjamín toket jutiri mä jakeruw qhitanïma, juparuw yakhachäta Israel marcajja apnakañapataqui. Jupaw filisteonacan amparapat khespiyani, marcajjatsti qhuyapt'ayasiractwa, t'akhesitanacapasti naya nayräjjaruw puriniraqui” sasa.

17Cunapachatejj Samuelojj Saúl waynar uñjcän ucqhajj Tatitojj sänwa: “Acajjay cawquïri jakettejj parlcäyäsma ucajja. Jupaw jichhajj marcajjarojj apnakani.”

18Marcar mantañ puncuru jac'achcasinsti Saúl waynajj Samueloruw jicjjati, ucatsti saraquïnwa:

—Tata, avist'ita, ¿cawqhas uñjirin utapajja? —sasa.

19—Nayätwa uñjirejja. Jichhajj nayan nayrakatajja santuarior maqhatam, ucan nayampi chica mank'araquim. Arumanthi alwataw cuntejj jisct'asiñ muncta ucjja yatiyäma, ucat qhitjjaraquïma.

20Cawquïri kachu asnonacamatejj chhakqui, ucat acarojj niya quimsa uröjjaraquiw, ucanacatjja jan llaquiscamti, uca asnonacarojj jicjjatjjapjjewa. Uqhamasti take cunatejj Israel marcan muncañäqui ucajj jumataquïniwa, uqhamarac familiamataquisa —sasaw Samuelojj säna.

21Saúl waynasti saraquïnwa:

—¡Nayajj Benjamín tribunquirïtwa, ucasti Israel marcan take tribunacat sipansa sinti jisc'aquiwa! Uqhamarus familiajjajj take Benjamín tribunquir familiat sipansa sinti jisc'a familiaquiraquiwa. ¿Cunatarac take acanac sistasti? —sasa.

22Uqhamasti Samuelojj Saúl waynampiru, uywatapampiru irpjjarusinsti, jach'a utaruw irpantäna, ucanquir jakenac taypinsti mä suma chekaruw kont'ayäna, ucansti quimsa tunca jakenacaw ucancascäna.

23Ucatsti Samuelojj phayirirojj sänwa:

—Cawquïri aychtejj churcsma uqhamaraqui “Yakhachätaw” siscsma uc apanim —sasa.

24Phayiristi janc'aquiw mä charpacha apsuni, ucatsti Saúl waynaruw ucjja mank'asiñapataqui churi. Samuelosti saraquïnwa:

—Ucajj jumataqui yakhachatäcän ucajja, catum ucatsti mankt'asiraquim, aca marca jawscäyäta ucqhawa jumataqui uca aychjja yakhachjjäyäta —sasa.

Saúl waynajj uca urojj Samuelompiw mank'asïna.

25Cunapachatejj santuariot marcaru sarakanjjapjjän ucqhasti Saúl waynataquejj mä iquiña uta pataru waquicht'apjjäna.

26Saúl waynasti ucaruw iquintjjäna. Khepärmanthi alwatasti Samuelojj Saúl waynaru jawsasinjja uca uta patanwa parljjayäna aqham sasa:

—Sartasjjam, ucatsti qhitjjaraquïmawa —sasa.

Saúl waynajj sartjjänwa, ucatsti Samuelompiw calleru sarakasinipcäna,

27cunapachatejj marca ankäjjaru mistusinipcäna, ucapachasti Samuelojj Saúl waynarojj sänwa:

—Uywatamjja nayra qhitanuccam, jumasti suyt'araquim acqharu. Cuntejj Diosajj sisquitu ucwa jumar yatiyaña munsma —sasa.