Proverbios 12 - Aymar Bibliia 1986

1Qhititejj chekachatäñaru

munqui ucajja, yatiñ cancañaruwa muni;

chekachatäñaru uñisqui ucajja, jan amuyt'aniwa.

2Asqui jakejj Tatitun qhuyapayasiñapwa jicjjati,

jan wali amtan jakerusti juchañchiwa.

3Jan wali lurañajj janiw qhititaquis suma kalltäquiti,

ucampis asqui jakenacajja asqui luratapampejja sumaw sayt'ani.

4Asqui lurir warmejj chachaparojj jach'aruw apti,

ucampis jan wali warmejja chachaparojj jisc'achayiwa.

5Asqui jakenacan amtäwipajj cheka lurañawa,

ucampis ñankha lurir jakenacan amtäwipajja ñankha lurañaquiwa.

6ñankha jaken arunacapajj jiwayir sipitjamawa;

asqui jaken parlatanacapasti khespiyatäñataquiwa.

7Ñankha jakenacajj aynacht'apjjewa, ucatsti ucaraquiw tucuyapajja,

ucampis asqui jaken utapasti janiw tucjatäcaniti.

8Yatiñan jakejj, yatiñapatjamajja jach'ar aptatäniwa,

ucampis jan amuyt'ani ñankha jakejja jisc'achatäniwa.

9Qhititejj jisc'achätaqui loktirinacanïqui uca jakejj juc'amp aytatawa,

qhititejj jach'ar aptata jan mank'at kheparqui uca jaket sipansa.

10Asqui jakejj uywanacapatjja qhuyapayasiwa,

ucampis ñankha lurir jakejja janiw qhuyapayasquiti.

11Yapuchiri jakejj walja mank'añaniwa;

jan amuyt'asiri jakesti inamaya luräwinacan sarnake.

12Jan wali amtañanacasti ñankha jakenacan känapawa;

asqui jakenacan luratanacapasti wiñayataquiwa.

13ñankha lurir jakejj jupa pachpan c'arisitanacapampiwa q'ituntasisqui,

ucampis asqui jakejja t'akhesiñatjja mistuquipuniwa.

14Sapakata jakewa apthapi parlatapatjama,

luratapatjamaw catokaraquini.

15Jan amuyt'an jakejj amuyasiwa take cunansa walicjama lurascatapa,

ucampis yatiñan jakejja suma ewjja arunacarojja ist'iwa.

16Jan amuyt'an jakejj mäquiwa cunatsa colerasi,

ucampis ch'iqhi jakejja jan wali chuyma uscay arunacarojj janiw yäkquiti.

17Cheka testigojj cunatï chekäqui ucwa arsu;

c'ari testigosti, c'aricwa ircati.

18Utjapuniwa parlatanacapampi mayniru usuchjirejja,

ucampis yatiñan jakenacan arunacapasti mä kolljamawa.

19Qhititejj chek parlqui ucan arunacapajja wiñayataquiwa,

ucampis qhititejj c'ari parlqui ucan arunacapajja mäquiwa chhaktawayjje.

20Ñankha lurir jakenacan lup'itanacapanjja c'ariwa utji;

sumanquir jakenacan suma ewjja arunacapansti cusisiñawa utji.

21Asqui jakejj janipuniw cuna jan walt'añansa t'akhescaniti,

ucampis ñankha lurir jakejja take jan walinacjja mayacwa catokani.

22Tatiturojj c'ari parlirinacajj ajjtasiyiwa,

ucampis cheka parlirinacajja cusisiyiwa.

23Ch'iqhi jakejj yatiñapatjja janiw jach'achasquiti,

ucampis jan amuyt'an jakejja, pachpa jan amuyt'apampiw t'ajjmarätap khanañchasiraqui.

24Irnakeri jakejj apnakaniwa,

ucampis jayra jakejja apnakatäniwa.

25Llaquejj jakerojj mayjt'ayiwa;

suma arusti cusisiyiwa.

26Asqui jakejj masipan irpiripawa,

ucampis ñankha lurir jakenacajja maysaruwa saranucupjje.

27Jayra jakejj, janiw cuns caturjamäquiti, ucampis k'apha jakejja kamir cancañanacwa jicjjatani.

28Cheka sarnakañajj jacañaruwa irpi;

ñankha lurañasti jiwañaruwa irpi.