2 Crónicas 30 - Aymar Bibliia 1986

Ezequiasan Pascua fiesta luratapa

1Ezequiasajj yatiyänwa take Israel, uqhamarac Judá marcanacaru, uqhamaraquiw cartanaca apayäna Efraín, Manasés ucanacaru jutapjjañapataqui Jerusalén marcan Tatitun temploparu, Israelan Tatitu Diosapan Pascua fiestapa fiestachañataqui.

2Reyisti sirvirinacaparu jisct'asina, uqhamarac Jerusalenanquir take jakenacar jisct'asinjja, amtänwa Pascua fiestachaña payïri phajjsina.

3Jupasti janiw horasaparu fiestjja luraycänti jan walja sacerdotenaca k'omachasita utjatapata, uqhamarac jakenacasa, jan Jerusalenana tantachasitapataraqui.

4Uca amtäwisti asquïnwa reyitaquisa, uqhamarac take jakenacataquisa.

5Ucatsti amtapjjänwa jawsayaña take Israelpacharu, Beer-seba ucqhat kalltasina Dan ucawjcama, Jerusalén marcarcama sarapjjañapataqui Israelan Tatit Diosaru Pascua fiestachañataqui. Nayrasti janiw walja jakenacampi fiestachapjjerïcänti, cunjämatï kellkatäcäna uqhamaru uca laycu.

6Yatiyirinacasti uqhamawa sarapjjäna reyina, sirvirinacapana cartanacapampi take Israelaru, Judá orakeru, reyina amtäwipa yatiyaniñataqui, aqham sasa: “Israelitanaca: Tatitun ucar cutt'anjjapjjam, Abrahamana, Isaacana, Israelana Diosaparu, jupasti jumanacarojj cutt'anjjaraquiniwa, jumanacajj Asiriana reyinacapan amparapata jaltapctas ucanacaru.

7Jan jumanacajj tucupjjamti nayra awquinacamjama, uqhamarac jilanacamjamasa, jupanacasti nayra awquinacamana Tatit Diosapar jan arcatap laycusti, Tatitojj tucjatäñataquiwa catuyäna, cunjämatï jumanacajj uñjapjjta uqhama.

8Uca laycu jumanacasti janiy nayra awquinacamjama jan ist'asiri tucupjjamti, Tatitumpejj sumancjjapjjam wasitata suma amtäwiru jupamp mantañataqui, ucatsti jutjjapjjam santuarioparu, jupasti wiñayataquiwa uca santuario yakhachasi. Jumanacasti Tatit Diosamar sirvipjjam, jupasti janiw jumanacataquejj colerascjjaniti.

9Jumanacatejj Tatitun ucar cutt'anjjapjjäta ucajja, uñisirinacamajja jilanacamaru, wawanacamaru preso catupqui ucanacajja, jupanacatjja qhuyapt'ayasiniwa, ucatsti antutanjjapjjaniwa aca orakeru cutt'aniñapataqui, jumanacan Tatit Diosamasti qhuyapayasirïtap laycu, janiw jumanacarojj apanucupcätamti jumanacatejj jupan ucar cutt'anipjjäta ucajja” sasa.

10Yatiyirinacasti sarapjjänwa Efraín, Manasés uca orakenaca, marcat marca sarasina, Zabulón oraker puricama. Ucampis jakeinacajja jupanacatjja larusipjjänwa, sawcasipjjaraquïnwa.

11Ucampis yakhep jakenacajja Aser, Manasés, Zabulón uca tribunacatjja Diosan nayrakatapanjja jisc'aruwa tuct'apjjäna, ucatsti Jerusalenarojj jutapjjänwa.

12Dios pachparaquiw Judá orakenquir jakenacarojj onjjtayaraquïna reyina, autoridadanacana arunacaparu phokhañataquejja, cunjämtï Tatitojj siscäna uqhamaru.

13Uqhamawa walja jakenacajj tantachasipjjäna Jerusalén marcana payïri phajjsina, jan levadurani t'ant'anaca fiesta fiestachañataqui.

14Ucatsti kalltapjjänwa Jerusalenana take altaranaca utjcäna ucanac apakaña, uqhamarac incienso naqhayañatac waquichata chekanacsa, ucatsti Cedrón jawiraruw warantanipjjäna.

15Payïri phajjsita tunca pusini urunaca sarakataruwa jiwayapjjäna Pascuataqui mä marani orko ovejaru. Ucatsti sacerdotenacasa, levitanacasa jupanac pachpata p'enkasisinjja, k'omachasipjjänwa, ucatjja Tatitun temploparojja uywanacwa apapjjäna naqhata loktäwinaca loktañataqui.

16Ucatsti jupanacajj lurañanacaparuwa utt'asjjapjjäna, cunjämatï Diosan sirviripa Moisesan leyipana jupanacatac wact'ayatäqui uqhamaru. Levitanacajja wila churapcäna ucwa sacerdotenacajj ch'ajjchsupjjäna.

17Tantachäwi taypinjja waljaniwa jan k'omachasipcänti, ucatsti levitanacajja uywanacjja jiwayapjjänwa Pascuataqui, qhitinacatejj jan k'omachasipcäna ucanac laycu, Tatitur loktatäpjjañapataqui.

18Ucataquejja walja jakenacawa tantachasipjjäna Efraín, Manasés, Isacar, uqhamarac Zabulón ucanacasti, Pascuataqui waquichata mank'at mank'apjjañapataqui, ucampis janiw kellkatarjama phokhapcänti, jan k'omachasipjjatap laycu. Ucampis Ezequiasajj jupanac laycujj oracionwa luräna, aqham sasa: “Qhuyapayasiri Tatitu, jumajj perdonam take qhitinacatejj cheka chuymampi jumar thakapctam ucanacaru,

19nayra awquinacapan Tatit Diosapa, janisa jupanacajj k'omachasipcchi, cunjämtï kollan templojja maycchi uqhamaru ucasa” sasa.

20Tatitusti Ezequiasan oración mayitaparojj ist'änwa, ucatsti jakenacan juchanacapjja pampachänwa.

21Uqhamasti israelitanacajj Jerusalenancapcäna ucanacasti pakallk uruwa wali cusisiampi jan levadurani t'ant'a fiesta fiestachapjjäna. Ucatsti sacerdotenacasa, levitanacasa sapüruwa Tatitur yupaychapjjäna, uca wali jayar ist'asiyiri kollana instrumentonacampi Diosar k'ochusina.

22Ezequiasasti take levitanacarojj: “Waliquiw” saraquïnwa, jupanacan Tatitur sirviñataqui wali suma amtäwipa uñacht'ayapjjatap laycu.

Jupanacajj pakallk uru fiestana mank'apjjatapata, uqhamarac sumancäwi loktäwinaca loktatatsa, nayra awquinacapan Tatit Diosapar yupaychapjjatapatsa,

23take tantachäwiwa amtasipjjäna fiesta lurascañaqui, yakha pakallk urumpi, ucsti wali cusisiampiwa lurapjjäna.

24Ezequías Judá oraken reyipajj tantachata jakenacarojja churänwa waranka vaca kallunaca, uqhamarac pakallk waranka ovejanaca, ucatsti jilïrinacajja chuymapatjamwa jakenacarojj churapjjaraquïna waranka vaca kallunaca, tunca waranka ovejanaca. Walja sacerdotenacawa k'omachasipjjäna.

25Take Judá orakenquir jakenacawa cusisipjjäna, uqhamarac sacerdotenacasa, levitanacasa, Israelata take jakenacajj jutapcäna ucanacasa, uqhamarac yakha marcat jutir jakenacajja Israelanquiri orakenacata purinipcäna ucanacasa, jan ucajj Judá orakena jacapcäna ucanacasa.

26Jerusalén marcanjja wali cusisiñawa utjäna, Israelana David Salomón reyinacan urunacapatpachjja, janiw cunapachasa uqhamajja Jerusalén marcanjja lurascänti.

27Ucatsti sacerdotenacasa, levitanacasa cayut sayt'atawa jakenacarojj bendicïna; Tatitusti jupanacarojj ist'änwa, ucatsti oracionanacapajja alajjpachcamawa purïna, cawcqhantï kollan Diosajj jacqui ucqhacama.