Job 25 - Aymar Bibliia 1986

1-2Ucjjarusti Bildad sata suhita chachaw arsuraqui:

“Diosajj ch'amaniwa, ajjsarcañaraquiwa;

jupaw alajjpachanjja sumancaña utjayi.

3Alajjpachan arquirinacapajj jan jact'cayawa,

khanapasti takenjjaruwa khant'araqui.

4¿Mä jakesti asquïspati, uqhamaraqui k'omäspati Diosan nayrakatapanjja?

5Diosan nayrakatapanjja janiw phajjsisa khantquiti,

warawaranacasa janiw k'omäcaraquiti;

6¡jakejj ucat sipansa juc'ampi ñankhawa,

mä jan qhuyapt'ayascaña lak'ompi sasiquiraquiwa!”