Salmos 65 - Aymar Bibliia 1986

Diosajj jach'añchatäñataquejj asquiwa(Davidan k'ochupa)

1Sión marcan Diosapa,

jumajj jach'añchatäñataquejj asquïtawa, jumar arsutanac phokhañajj waquisiwa,

2jumajj mayisitanacar ist'irïtawa.

Take jakenacaw jumarojj maqhatapjjtam.

3Jucha luratanacajjajj aynacht'ayapjjetuwa,

ucampis jumaw juchanacajjat pampachapjjesta.

4Juman ajllit jakejj cusisiñaniwa, juma jac'an jacañapataqui,

kollan utaman utjasiñapataqui.

Utaman utjir yänacampiy cusisiyapjjeta, temploman kollan churäwinacapampiy phokt'apjjeta.

5Khespiyir Diosajjay,

muspharcañ asqui cancañampiw jaysapjjestajja; take orakpachaw jumarojj alcatapjjtam, jayanquir kotas alcataractamwa;

6jumïpan kollunacajj pachpaquïsqui,

juman ch'amam laycuw thurt'atäsipqui.

7Jumaw lamar kot mathapinacarojj t'acuraytajja,

jumaw marcanacan ch'ajjwatap amuct'aytajja.

8Orak tucuyan jaquirinacajj muspharcañ

luräwinacamat qhathatipjje,

inti jalsu toketa, inti jalanta tokecamajj,

jumïpan cusisiñat art'asiñajj utji.

9Jumaw acapach orak uñjasctajja,

jallumpiw achunac utjaytajja; jilarquir uma karpampiw

trigo yapunac jilaraytajja: uqham lurasaw orak waquichtajja.

10Jumaw sucanac umamp karptajja,

qhulanac qhusqhachtajja, jallumpiw orakerojj jasac

tucuytajja, uqhamat jilarquir achuytajja.

11Asquinacamampiw marpach yanaptajja,

kenayanacamajj jilarquir asquinac warjjatani;

12wasaranquir ch'ijinacajj ch'ojjñatatiwa,

kollunacasti cusisiñ isimpiw isthapisi;

13pampanacajj ovej tamanacampiw phokhantasi,

vallenacas yapunacampiw isintasi, cusisiñat takpachaw k'ochupjje.