Jeremías 19 - Aymar Bibliia 1986

Mä p'aquita wayuchata amuyt'äwi

1Tatitusti saraquituwa: “Saram, ucatsti ñek'et lurata mä wayucha alasiraquim, ucatsti marcanquiri jilïrinacaru, uqhamaraqui yakhepa jilïri sacerdotenacaru jawsaraquim.

2Ucatsti Ben-hinom sisqui uca valleru sararaquim, C'allananac Puncu sisqui uca uñcatasiru, ucansti yatiyaraquim cuna arunactejj nayajj siscäma uca arunaca.

3Jupanacarusti saraquim: ‘Judá orakenquir reyinaca, uqhamaraqui Jerusalén marcan utjirinaca, Israelan take ch'amani Dios Tatitupan arunacapa ist'apjjam, jupasti siwa: Aca marcarusti mä jach'a t'akhesiñwa apayanï take uca yatiyäwi ist'irinacasti wali sustjataw kheparapjjani.

4Israelitanacasti nayarojj apanucuwayapjjetuwa, aca oraksti yakha orakeruw tucuyapjjaraqui, aca chekanwa yakha diosanacaru inciensonac loktasipjjaraqui, uca diosanacsti janiw jupanacajj uñt'apcänti; ni nayra awquinacapasa, ni Judá orakenquir reyinacasa uñt'apcänti; aca orakerusti jan juchani jakenacan wilapampiw phokhantapjjaraqui.

5Uqhamarusa Baal diosaru wawanacapa sacrificiot loktañataquisa altaranacwa lurarasipjjaraqui, uqham lurapjjañapsti janiw nayajj jupanacarojj siscäyätti, janiraquiw uqham lurapjjañapjja amtcäyätti.

6Ucatpï, jichhajj urunacajj purininejja aca chekajj jan juc'ampi Tofet satäjjañapataqui, ni Ben-hinom satäjjañapataquisa, jan ucasti Jiwarayañ valle satäjjaniwa. Naya Tatituw ucjja arsta.

7Aca chekanwa Judá orakena, uqhamaraqui Jerusalén marcan amtatanacapjja t'unjä. Uñisirinacapampiw jupanacarojj atipjayä, jiwarayaraquï, jiwata janchinacapasti siwek'aranacana, montenquir animalanacan mank'apäniwa.

8Aca marcsti mä wasararuw tucuyaraquï, wali sustjascañaraquïniwa. Take aca marca cheka pasirinacasti wali sustjata mayjt'ataw uñjasipjjani uqhama k'ala t'unjata uñjasajja.

9Jakenacarusti pachpa yokalla, uqhamaraqui imilla wawanacapwa mank'asiyaraquï, uqhamaraqui jupanacasa maynit mayniru jupanaccamaw mank'asipjjani, cunapachatejj jach'a jan walt'añan jicjjatasipcani, uñisirinacapansa muyuntata aca marcajj uñjasqui ucapachajja’ sasa.

10“Ucanaca sasinsti, cawquïri jakenacatejj jumamp chicäqui ucanac nayrakatana uca ñek'et lurat wayuchamjja p'acjaraquim jisc'a jisc'a tucjasa.

11Ucatsti saraquim: ‘Take ch'amani Tatitojj aqham siwa: Aca jakenacarusti aca marcanjja jisc'a jisc'a tucjaraquï, cunjämatejj mä jakejj mä uma wayuchjja jisc'a jisc'a t'unjejj uqhama, ucatsti uca wayuchjja janiw qhitisa juc'ampi asquichcjjaspati. Jakenacasti jiwatanacapjja Tofet sisqui uca chekanwa imasipjjani, jan juc'ampi yakha chekajj imañataqui utjcjjatap laycu.

12Uqhamwa lurä aca marcampejja jakenacapampisa. Cunjämäquitejj Tofet chekajj uqhamwa juparojj jaytaraquï. Naya Tatituw ucjja arsta.

13Jerusalenanquir utanacasa, Judá orakenquir reyinacan palacionacapasa, uqhamaraqui uta terraza patanacan warawaranacaru inciensonaca loktasipcäna, yakha diosanacaru vino ofrendanaca warapcäna uca chekanacasti k'añu chekat uñt'atäniwa, cunjämäquitejj Tofet chekajj uqhama’ ” sasa.

14Ucanac pasatatsti, Jeremiasajj Tofet chekatjja cuttanjjänwa, cawqharutejj Tatitojj jupan sutipjjaru parlañataqui qhitcatayna uca chekaru, ucat templona patioru sayt'asisinsti, take jakenacaru parlaraquïna:

15“Israelan take ch'amani Dios Tatitupajja aqham siwa: ‘Aca marcarojja uqhamaraqui yakha jac'anquiri marcanacarusa, cuna mutuyäwtejj jupanacataqui arscta ucwa apayanëjja, cuna arunactejj nayajj arscäyäta uca arunacataqui c'ullusipjjatam laycu, janiraqui uca arunacaru jaysapjjatam laycu.’ ”