Proverbios 31 - Aymar Bibliia 1986

Lemuel chachan säwi arunacapa

1Acanacajj Masa sat chekanquiri Lemuel sat reyin säwi arunacapawa; uca arunacampiraquiw taycapajj jupar yatichawayäna:

2“Nayat yuriri munat wawajjay,

Diosan churat wawajjay,

¿cunampirac jichhasti säma?

3Ch'amamjja warminacaru jan tucjasimti;

warminacampi sarnakañawa reyinacarojj tucji.

4Lemuel, janiraquiw walïquiti reyinacasa, jilïrinacasa

machjasiña vinonacampi machañapajja,

5uqham machasin ewjja arunacjja armasipjjaspa,

ucatsti llaquitanacaru chekapar uñjañäqui ucsti janiw chekapar uñjcjjapjjaspati.

6“Machañanacjja apanucum,

aynacht'atanacataqui, llaquitanacataqui.

7Jupanacasti machasinjja armasipjjaniwa pobres cancañapata,

uqhamarac t'akhesiñanacapatsa.

8Arjjatam qhitinacatejj jan arsusirjamäpqui ucanacata;

¡arjjatam jan jarc'akasirinacaru!

9Arjjatam, ucatsti chekapar uñjam;

¡pobre jakenacaru arjjatam, uqhamarac llamp'u chuymaninacarusa!

Asqui warmiru jach'añchañjjata

10“Suma warmejj janiw jicjjatañjamäquiti;

¡jupajj suma c'ajquir kalanacat sipansa juc'amp valoranïtap laycu!

11Chachapajj juparojj takpach chuymaw catuyasi;

jupasti janipuniw cunapachas pist'añanacan sarnakquiti.

12Jupasti chachaparojj yanapiwa suma asquinac lurasa,

take jacäwipa urunacana.

13Jupajj t'awra, lino ucanac thakeriw sari,

ucatsti cusisiñampiwa amparamp lurañanacjja luri.

14Jupajj mank'anac apanir barcor uñtatawa;

mank'añanacjja wali jayata utapar apani.

15Ucatsti wali alwata sartasisinaracwa wawanacaparojj mank'a churi,

uqhamarac uywatanacaparusa.

16Oraksti suma uñjasinwa alasi,

ucatsti jicjjatatanacapampiwa uvas alinacjja ayrusi.

17Jupajj ch'amañchasiwa,

ucatsti take chuymampiwa irnakañatac waquichasi.

18Jupajj aljasiñanacapjja sumaruwa sarayi,

arumcamawa irnake, janiw ch'am jiwt'ayasquiti.

19Amparapampiwa t'awra kapu, sawuraqui.

20Pobrenacarusa, uqhamarac pist'ayasiñan jicjjatasqui

ucanacarusa qhuyapt'ayasipuniraquiwa.

21Janiw familiapatjja llaquiscaraquiti, cunapachatï qhununti ucqhajja,

familiapan suma thuru isinacampi isthapita sarnakapjjatap laycu.

22Jupa pachpawa iquïñanacjja sawusiraqui,

ucatsti suma telat lurat isinacampiw isisiraqui.

23Chachapasti marcanjja suma uñt'atawa,

marcana wali aytata jilïri chachanac taypinquirïtap laycu.

24Jupajj isinaca, wac'anaca lurasinjja,

alirinacaruwa alji.

25Jupajj ch'amañchasiwa, asquin sarnakañampi,

ucatsti janiw ajjsarquiti jutir jan walt'añ urunacarojja.

26Jupajj yatiñampiwa parli,

ucatsti munasiñampiw yaticharaqui.

27Ucatsti jupajj sumwa uñjasiraqui utapajj cunjamäsquisa ucjja,

janipuniw ina ch'usata jicjjatata mank'jja mank'quiti.

28Wawanacapasa, chachapasa

juparojj jach'añchapjjewa, aqham sasa:

29“Walja suma warminacaw utjapjje,

ucampis jumajj take uca warminacat sipansa juc'amp sumätawa” sasa.

30C'ariquiwa suma uñnakani warmejja,

jiwaquïñasa inamayaquiwa,

ucampis Tatitur ajjsariri warmiwa jach'ar aptatajja.

31¡Take jakenac nayrakatana juparojj jach'añchapjjam!

¡Take luratanacaparu jach'añchapjjaraquim!