Ezequiel 6 - Aymar Bibliia 1986

Ezequiel profetajj yakha diosanacar yupaychañ toketwa arsu

1Tatitusti nayaruw parljjayaraquitu, aqham sasa:

2“Israel kollu tokenacar uñtam, jupanacarusti nayan sutejjaru parlaraquim,

3aqham sasa: ‘Israel kollunaca, ist'apjjam, cuntejj Tatitojj sisqui: kollunaca, jisc'a kollunaca, jawiranaca, vallenaca. Jumanacjjarojj guerranac apayanipjjäma, jach'a kollunacan yakha diosanacamaru yupaychapcta uca chekanacsa k'alwa t'unjäjja.

4Cawquïri altaranacantejj jumanacajj sacrificionaca, inciensonacsa naqhayasipcta uca chekanacjja k'alwa tucjäjja, jakenacaparusti pachpa diosanacap nayräjjaruw jiwarayaraquëjja.

5Israelita jakenacan jiwarat janchinacapasti pachpa diosanacapan nayrakataparuw liwinokaraquëjja, ch'aqhanacapsti altaranacap nayräjjaruraquiw willitatäjja.

6Cawquïri marcanacantejj jumanacajj jacapcta uca marcanacasti takpachaw t'unjatäni, yakha diosanacar yupaychañ altaranacamasa k'ala t'unjatäniwa. Altaranacamajj k'ala t'unjatapunïniwa, diosanacapas jisc'a jisc'a tucjataraquïniwa; incienso loktasiña altaranacapas pampa tucuyataraquïniwa, take cuntejj jumanacajj lurapcta ucanacasti k'ala chhaktayatäniwa.

7Cunapachatejj jumanacajj walja jakenacaru jumanac taypin jiwarasquiri uñjapjjäta, ucapachaw jumanacajj yatipjjäta nayan Tatitütajja.

8Ucampisa nayajj jumanacatjja mä kawkhaniru jiwañat khespiyaraquïwa, ucanacasti yakha marcanac taypin willitatataw jacapjjani.

9Uca jilt'irinacasti, uca jaya marcanacanjja nayatwa amtasipjjaraquini; cunjämtejj nayajj jupanacaru t'akhesiycäyätjja, jan nayaru take chuymampi arcapjjatapata, uqhamaraqui nayatsa jayarst'awayapjjatapata yakha diosanacar yupaychañ laycojja, take ucanacwa amtasipjjani. Jupanacasti take ñankha luräwinacapa amthapisisajja, jupanacpachaw ajjtasipjjani, take uca ajjtascaña luräwinacapatsa.

10Ucapachaw jupanacajj yatipjjani nayan Tatitütajja, cuna jan wali t'akhesiñanac apayaniñtejj arscäyät ucanacasa jan aleka inamaya parlanacaquïtapa’ ” sasa.

11Tatitusti sascaquituwa: “Amparanacamampi uqhamaraqui cayunacamampi lek'esa warariraquim, Israel marcan ajjtascañ juchanaca luratapatsti llaccañas wararcasma uqham warariraquim, Israel marcasti guerrana, uqhamaraqui cunayman mach'anacampi, usunacampiw jiwararaquini.

12Jayanquirinacajj usunacampiw jiwarapjjani, jac'anquirinacasti guerran nuwasiñanwa jiwarapjjaraquini, cawquïrinacatejj jacasipcani ucanacasti mank'atjamaw jiwarapjjaraquini. Uqhamwa nayajj Israel marcjjarojj colerasiñajj warjjatanëjja.

13Cunapachatejj jakenacajj jiwaratanacaru uñjapjjani yakha diosanac jac'ana, altaranacap jac'anacana, take kollunacana, jach'a kollunaca patansa, kokanac c'uchunacansa, uqhamaraqui jach'a encinas sat koka c'uchunacansa, cawqui chekanacantejj k'apquiri inciensonacap loktasipcän uca chekanacana, ucapachaw yatipjjani nayan Tatitütajja.

14Jupanacar mutuyañataquejj amparajjwa aytaraquï, aynacha toke wasarat kalltasina, amsta token Ribla sisqui ucacamajja, take aca orakenacapjja, take marcanacapsa ajjsarcañ wasararuw tucuyaraquëjja. Ucapachaw yatipjjani nayan Tatitütajja” sasa.