2 Samuel 20 - Aymar Bibliia 1986

Seba jaken sayt'asitapa

1Benjamín tribun mayni khoru jakew utjäna, ucasti Seba satänwa, Bicri sisqui uca jaken yokapa, jupasti Gilgal marcanwa jicjjatasiraquïna. Aca Seba jakesti jakenacaruw amtayäna rey contra sayt'asipjjañapataqui, saraquïnwa: “Jiwasajj janiw Isaí jaken David yokapampejja cuna lurañasas utjquiti. ¡Take israelita jakenaca, utanacamaru cuttjjapjjam!” sasa.

2Take israelita jakenacasti Davidarojj apanucuwayjjapjjänwa, Seba sisqui uca jaker arcjjañataqui, uca jakesti Bicri sisqui ucan yokapänwa. Ucampisa Judá orakenquirinacajja, Jordán jawirat kalltasina, Jerusalencamajja, reyimpipuniw sayt'asipjjaraquïna.

3Cunapachatejj Davidajj palacioparu, Jerusalén marcat cuttanjjän ucapachasti, cawquïri tunca uñt'atanacaparutejj palacio uñjapjjañapataqui jaytawaycataynasa ucanacwa irptasjjäna, ucatsti mä utaruw irpantayjjaraquïna, wali suma guardiataraqui. Ucanwa jupanacarojj uñjayascäna, ucampisa janiraquiw maynirusa warmiscänti. Uqhamaw jupanacajj ucan jacapjjäna, jist'antata, ijma warminacjamaraquiw jacapjjäna jiwaña urunacapcama.

4Ucatsti reyejj Amasa jakeruw saraquïna:

—Judá orakenquir jakenacaru jawsayam, acat quimsa ururu jupanacampi uñstaniraquim —sasa.

5Amasa jakesti sararaquïnwa jakenac tantacht'añataqui, ucampisa kawkha urutejj juparu churatäcänjja ucat juc'ampiwa khepararaquitayna.

6Ucatwa Davidajj Abisai jakeru saraquïna:

—Seba jakejj Absalonat sipansa juc'ampi jan walinacwa luristani. Uqhamasti jumajj jichhajj soldadonacajjan jilïripäyätawa, ucatsti arctam, inampisa jupajj mä jach'a perkanacampi muyuntayata marcanacaru imantasjjaspa, ucat jiwasajj jan catuñ puedcjjsnati —sasa.

7Joab chachan jakenacapasti, cereteonaca, peleteonaca, qhitinacatejj reyin palaciopan guardia lurapjjerïcän ucanacasa, Jerusalén marcan juc'ampi suma soldadonacäcän ucanacasti Abisai jakempi chicaw Jerusalenatjja mistuwayapjjäna, Seba jakeru arctasa.

8Cunapachatejj Gabaón jac'anquiri jach'a karka jac'ancapcän, ucqharuw Amasa jakejj jupanacaru jicjjatäna. Joab jakesti guerra isipampi ist'atänwa, mä cinturonampi wac'antata, cinturaparusti mä espada warct'ataraqui, uca espadasti imañapatjja jasaqui apsuñaquïnwa aynach tokeru jiyt'asa.

9Joab jakesti Amasarojj cupi amparapampiw sunqhapata waythapïna jamp'att'añataqui, ucat aqham sasaw jisct'araquïna:

—¿Cunjamäsctas jilata, waliquïsctati? —sasa.

10Amasasti janiw amuyascänti Joab jakejj espada ayt'atätapa. Acatjamat Joab jakejj uca espadampejj Amasarojj puracapat chhokhunti, take jiphillanacapasti orakeruw warstaniraquïna. Jan Joab jaken jawk'atatcataquiw jupajj jiwawayjjäna. Ucat Joab jakejj Abisai jilapampejj Bicri jaken yokapa Sebarojj arctasipcaquïnwa.

11Ucatsti Joab jaken soldadonacapat mayniw Amasa jaken jiwat janchipa jac'aru sayt'asi, ucat saraquïna

—Qhititejj Joab chachampïqui, uqhamaraqui David chachampïqui ucasti Joab jakeru arcpan —sasa.

12Ucampisa Amasa jakejj uca chica thaquin ucsaru acsaru korumnakascaquïnwa, pachpa wilaparu korumsusa, uca soldadosti take jakenaca uqham uñjasa sayt'apjjatapatsti, Amasa jakerojj thaqui thiyaruw jitt'ayjjäna, mä capampiw janjjataraquïna, jupasti amuyaraquïnwa take qhitinacatejj purinipcän ucanacasti uca jac'aruquiw sayarjjapjjaraquïna.

13Thaquit maysaru jittayjjatatsti, take Joab chacharu arquirinacajja janiw uca chekaru sayt'apcänti, jan ucasti Seba jakerojj arctasipcaquïnwa.

14Seba jakesti take israelita tribunacwa pasawayaraquitayna, Abel-bet-maaca sisqui ucacama, take Bicri jaken wawanacapasti tantacht'asisinjja jupan khepapwa marcaru mantawayjjapjjäna.

15Cunapachatejj Joab chachan jakenacapajj Abel-bet-maaca chekaru purinipjjän ucapachasti, jupanacajj uca marca perka jac'arojj mä perka sartayapjjaraquïna, marcaru nuwantañataqui. Ucatsti takpachaniw uca marca perkjja liwisiyañataqui allintapjjäna.

16Uqhamaraqui acatjamat mä ch'iqhi yatiñan warmejj art'asinïna perka patata:

—¡Ist'apjjeta, ist'apjjeta, Joab chacharojj naya toket sapjjam, juc'ampi aca perkaru jac'achasinpan, nayasti jupampiw parlañ munta! —sasa.

17Cunapachatejj Joab chachajj perkaru jac'achasïna ucapachasti warmejj jisct'änwa:

—¿Jumätati Joab satajja?

—Jïsa, nayätwa —sasaw Joab chachajj saraquïna.

Warmisti saraquïnwa:

—Aca uywataman arunacap ist'am —sasaw warmejj saraquïna.

—Ist'ämawa —sasaw Joab chachajj saraquïna.

18Ucat jupajj aqham sasaw säna:

—Nayrapachajj satänwa: “Qhititejj mä cunsa yatiñ munqui ucajja Abel marcaru jisct'pan” sasa, uqhamatwa take cunasa asquichasiraquirïna.

19Nanacan marcajjajj janiw nuwasiñ munirïquiti, uqhamarus Israel orakenjja chekaparaquiwa. ¡Mä jach'a marcaraquiwa! Ucampisa jumajj t'unjañwa munasctajja. ¿Cunatsa jumajj t'unjañ munta cunatejj Tatituncqui ucjja? —sasa.

20Joab chachasti saraquïnwa:

—¡Janiw uc nanacajj amtapcti! Nayan amtañajjajj janiw aca marca t'unjasin apanucuñäquiti,

21janiw ucataquiti, jan ucasti Efraín kollunacan mayni jakew sarti Seba sat sutini, jupasti rey David contraw sayt'asi. Jichhajj jupa saparuqui catuyapjjeta, ucat nayajj aca marcat sarjjäwa —sasaw Joab chachajj saraquïna.

—P'ekep nanacajj perkatpach liwt'anjjapjjäma —sasaraquiw warmejj Joab chacharojj säna.

22Ucatsti ucspachaw warmejj jalasin takpacha marcanquir jakenacarojj amtayäna Seba jaken p'ekepa apakañataqui, ucat uca Seba jaken p'ekepa apakasinjja, Joab chacharuw perka patatpach liwt'anjjapjjäna uca p'ekjja. Ucat Joab chachajj trompeta phust'ayaraquïna, marcat jithekjjañataqui. Ucapachaw marcajj jithektawayjjapjjäna, sapa maynis utaparcamaw sarjjapjjäna, Joab chachasti Jerusalén marcaruw cuttaniraquïna reyimpi parlañataqui.

Davidan jilïrinacapa(2 S 8.15-18; 1 Cr 18.14-17)

23Joab chachaw Israel marcan ejercitopan jach'a jilïriparaquïnjja, Joiada jaken yokapa Benaía sata jakesti uñjirinacan jilïriparaquïnwa, uca uñjirinacasti cereteonaca, peleteonaca ucanacaraquïnwa.

24Adoram jakesti, take ch'ama lurañanaca phokhayirit uscutaraquïnwa, reyin secretariopasti Ahilud jaken yokapa Josafat sata jakeraquïnwa.

25Seva sat jakesti take cunanacatejj lurascän ucanaca kellkeriraquïnwa, Sadoc uqhamaraqui Abiatar sat jakenacasti sacerdotenacäpjjaraquïnwa.

26Jair marcanquiri, Ira sat jakesti Davidan sacerdoteparaquiquïnwa.