Salmos 39 - Aymar Bibliia 1986

Jacañajj juc'ataquiquiwa(Davidan k'ochupa)

1Nayajj sum sarnakañataquiw arsta, lajjrajjamp cuna juchsa jan arsuñataqui;

lacajjar mä jarc'a uchantañataqui, uñisirejjan nayrakatapana.

2Nayasti amutuw tucüyäta;

janiw cuns arscäyätti.

¡Janiw asquit cuna parlatajjas utjcänti!

T'akhesiñajjasti juc'ampiw jiljjatäna,

3chuymajjajj ninjamaw naqhäna,

ucjjat lup'isasti juc'amp naqhantitu, uqhäm uñjasisaw jach'at jupar art'asta:

4“Tatay, cunjämatejj tucuscä ucay yatiyita,

kawkhatejj jacañajjajj waquisqui ucay yatiyita,

¡kawkha juc'aquitejj jacañajjäqui uc yatisiñ munta!

5Juc'a urunacac jacañajjatac churistajja,

jacañ urunacajjajj janiw nayrakataman cunäquisa;

jaken jacañapajj samanamp sasiquiwa,

6jaken jacañapajj ch'iwjamaquiwa;

inamayaw yänacs arcuntasqui, janiw ucanac qhitin catuntasiñaps yatquiti.

7Jichhasti, Tatay, ¿cuna suyt'añajjarac utjisti?

Jumaquiw nayan suyt'añajjätajja.

8Take juchanacajjat khespiyita,

t'ajjmar jakenacan nayat larusiñap jan munamti.

9“Nayasti amutuw tucta, janiw lacajj jist'arcti,

juman take cun sarayascatam yatta.

10Janiquiy nayarojj juc'amp t'akhesiyistati,

amparaman ch'amapajj tucjasquituwa.

11Jumaw jakerojj juchapat mutuyasajj chekachtajja;

thuthar uñtataw yänacap thuthanoktajja:

jakejj mä samsump sasiquiwa.

12“Tatay, mayisitajjar ist'am,

arnakasitajjar yäkam, janiquiy jachatajjataquejj okarar tucumti:

nayajj juman jawst'ataquïtwa, nayrapach awquinacajj-jam sarir jakequïtwa.

13Mä juc'acamay samart'ayita,

janïr nay sarquipana, janïr nay jiwquipana.”