Esdras 4 - Aymar Bibliia 1986

Uñisirinacajj templo lurañ suyt'ayapjje

1Cunapachatï Judá, uqhamarac Benjamín, ucanacan uñisirinacapajj, preso apatanacajj cuttanjjasina Israelan Tatitu Diosapan templopa wasitat lurapjjatapa yatisinjja,

2sarapjjänwa Zorobabel chachampi, uqhamarac Josué chachampi, uqhamarac familianacata jilïr chachanacampi jiquisiri; ucatsti jupanacarojj sapjjänwa:

—Nanacajj lurañanjja yanapapjjämaya, nanacasti jumanacjamaraquiwa jutapjjaracta Diosaman ucaru, ucatsti sacrificionacsa loktapjjaractwa Asiria marcanquir Esar-hadón sat reyejj aca chekaru apanipquitu uca urunacatpacha —sasa.

3Ucampisa Zorobabel chachampi, Josué chachampi, uqhamarac familianacata maynïri israelita jilïri chachanacampejja ucjjarojj aqham sapjjänwa:

—Janiw jumanacamp chicajj Diosajjan templopjja lurapcsnati. Jan ucasti nanac sapaquiwa lurapjjäjja Israelan Tatit Diosajjataquejja, uqhamwa Persianquiri Ciro sat reyejj sapjjaraquitu —sasa.

4Ucatsti uca orakenquir jakenacajja Judá jakenacar mayjt'ayiriw jutapjjäna, uqhamata luraña apanucuyañataqui.

5Ucjjarusti marca apnakerinacan yakhep yanapirinacaparusti kollke chilltapjjäna, uqhamatwa jupanacan amtanacapjja aynacht'ayapjjäna Persia marcanquir Ciro reyejj apnakascäna uca maranacana, ucatsti Persia marcanquir Darío reyejj apnakcäna uca maranaccamaraqui.

6Asuero reyejj reinañ kalltascäna ucqhajja, jupanacajj Judänquiri uqhamaraqui Jerusalenanquiri jakenacatwa juchañchäwinaca parlapjjäna.

7Ucatsti Persia marcanquir Artajerjes reyin apnakäwipansti mä cartwa jupar kellkapjjäna Bislam, Mitrídates, Tabeel sat chachanaca, uqhamarac mayni masinacapampiraqui. Uca cartasti arameo aruna kellkatänwa, ucata yakha aruru jakoquipatapampiraqui.

8Rehum comandante chacha, Simsai secretario chachampi, jupanacaw Artajerjes reyiruwa mä carta kellkapjjäna Jerusalenanquir jakenacjjata.

9Ucapachasti kellkapjjänwa Rehum sat comandante, Simsai sat secretario, uqhamarac jueces, generales uca masinacapa, uqhamarac Persia marcanquir reyin yanapirinacapa, Erec, Babilonia, uqhamarac Susa, jan ucajj Elam,

10uqhamarac ucat ucjjar marcanaca jach'a jilïr Asnapar sat chachajj jakenaca jayat apayanisa Samaria marcanacar uchcäna, uqhamarac Eufrates sat jawirata inti jalanta tokena ucjjar provincianacarusa apayapjjaraquïnwa.

11Acajjay uca carta apayancäna ucajja:

“Artajerjes reyiru, ucasti apayanitawa Eufrates jawirata inti jalanta tokena uca provincianquiri sirvirinacapatawa:

12“Juma jach'a reyiruwa yatiyanipjjsma, cawquïri judionacatï juma toketa nanacan ucar jutapqui ucanacajja, Jerusalenar purinisinjja wasitataw uca sayt'asiri, jan wali marcjja lurasipqui. Jupanacasti perkanac lurañwa kalltapjje uqhamarac uta cimiento jakontañsa.

13Ucjjarusti juma jach'a reyirojj yatiyanipjjaracsmawa, uca marcatejj wasitata luratäni, uqhamarac perkanacapas sayt'ayataraquïni ucajja, uca marcajj janiw churäwinaca, ni impuestonaca churañäqui ucanacjja churañ muncjjapjjaniti, cunatejj wact'qui churañanacapajj ucanacsa, ucatsti reyin kollkepajj aynacht'aniwa.

14Cunjämatejj nanacajj juma jach'a reyin sirvirinacamäpjjtjja, janiw nanacajj munapquiristti juma reyiru uqham jan walt'ayañapjja. Ucataracwa juma jach'a reyirojj acjja yatiyanipjjaracsmajja,

15uqhamata suma uñjatäñapataqui juma reyin nayra awquinacaman archivonacapajja. Juma reyisti uca archivonwa khanañchasquiri jicjjatäta, uca marcana sayt'asirïtapa, uqhamarac reyinacataquisa jan walt'ayirïtapa, uqhamarac yakha provincianacataquisa. Uca marcansti nayra pachanacanjja sayt'asiñanacwa utjayäna, ucataracwa tucjataraquïna.

16Ucatwa juma jach'a reyirojj yatiyapjjsma, uca marcatejj wastat luratäni, uqhamarac perkanacapas tucuyatäjjani ucajja, juma reyisti janiw apnakcjjätati Eufrates sat jawirata inti jalanta tokencqui uca provincianacarojja” sasa.

17Ucatsti Artajerjes reyejj aqham yatiyäwiracwa apayaraquïna:

“Aruntanipjjsmawa Rehum sat comandanteru, Simsai sat secretarioru, uqhamarac Samarian jacapqui uca masinacaparu, uqhamarac Eufrates sat jawirat inti jalanta tokenquir ucat ucjjar provincianacaruraqui.

18“Cawquïr carttejj jumanacajj nayar apayanipquista ucjja, ucan yakha arur jakoquipatäqui ucjja leet'atänwa nayan nayrakatajjana,

19ucanacjjatjja yatjjataytwa. Ucatsti yatisiwa uca marcana nayra reyinacataqui sayt'asirïtapa, cutiquipstañanaca utjatapa, uqhamarac cutcatasiri marcätapa.

20Ucatsti yatisiraquiwa Jerusalenana ch'amani reyinaca utjatapa; jupanacajj Eufrates sat jawirata inti jalanta token provincianacaru apnakatapa, ucatsti uca reyinacarojj pagapjjänwa impuestonaca, uqhamarac cuna churañanacapatejj wact'cäna ucanac churasa.

21Uqhamasti uca chachanacarojj yatiyam uca lurañanacat sayt'apjjañapataqui, nayan wasitat yatiyañajjcamasti jan uca marcajj luraspati.

22Jan uca toketjja armasipjjamti, uqhamata uca jan walinacajj reino tokejj jan jiljjatañapataqui” sasa.

23Cunapachatï Artajerjes reyin cartapajj leet'atäna Rehum, Simsai secretarion nayrakatapana, uqhamarac masinacapan nayrakatapansa, take jupanacasti mäqhiwa Jerusalenar sarapjjäna, ucatsti ch'amampi ajjsarayasawa judionacaru lurañanaca sayantayapjjäna.

24Uqhamatwa Jerusalenan Diosan templopa lurañajja sayantäna, Persia marcanquir Darío reyin payïri marapcama.