1Tatitusti Moisesaruw parläna; aqham saraquïnwa:
2“Israelitanacarusti aqham saraquim: Cunapachatejj mä warmejj usur jakeptani, ucatsti mä yokall wawa wawachasiraquini, uca warmisti pakallko urucamawa k'añu uñjasini, cunjämatejj phajjsi wilapan jutatajj uñjasirïqui uqhama.
3-4Uca yokall wawasti quimsakallko urururaquiw chhojjorasiñapan lip'ichipajj qharekatäjjani, ucampisa taycajj quimsa tunca quimsani urunacampiw k'omachasiraquini wila jutatapatjja. Cunanacatejj Tatitur loktatäqui ucanacsti janipuniw llamct'caniti, janiraquiw Tatitumpi Jiquisiñ Carparus mantcaraquiniti, k'omachasiña urunacapan phokhasiñapcamajja.
5Ucampisa, cunapachatejj mä imill wawa wawachasini ucapachasti pä semanaw k'añu uñjasiraquini, cunjämatejj phajjsi wilapan jutatajj uñjasirïqui uqhama, ucatsti wila jutatapatjja sojjta tunca sojjtani urunacampiw k'omachasiscaquini.
6“Cunapachatejj uca k'omachasiña urunacajj phokhasjjani, mä yokall wawa jan ucajj mä imill wawa wawachasitapatjja, ucapachasti taycajj Tatitumpi Jiquisiñ Carpäquis uca nayrakataruw sarani mä marani orko oveja apjjaruwayaraquini Tatitutaqui k'ala nact'ayasa loktaraquini, mä paloma wawampi jan ucajj mä palomampsa, juchanacat sacrificio loktatäcaspas uqhama. Sacerdoteruw take ucanacajj catuyatäjjani,
7sacerdotesti ucanacjja Tatitun nayrakataparuw loktjjaraquini, uqhamat jupataqui juchata pampachatäña jicjjatañataqui; uqhamataracwa uca warmejj wila jutatapatjja k'omachata uñjasjjaraquini.”
Ucawa yatichäwinacajja mä yokall wawana jan ucajj mä imill wawana naciñapa tokenacatjja.
8Ucampisa uca taycantejj jan ucacamajj mä orko oveja alañataqui kollkejj utjarapcani ucapachasti, puediraquiniwa pä paloma jan ucajj pä paloma wawanacsa apaniña, maysti takpacha nact'ayasin loktañataqui, maysti jucha luratata loktañataquiraqui; ucapachaw sacerdotejj uca warmitaquejj juchapat pampachatäña jicjjataraquini, uca warmisti k'omachataw uñjasjjaraquini.
Who We AreWhat We EelieveWhat We Do
2025 by iamachristian.org,Inc All rights reserved.
