Proverbios 15 - Aymar Bibliia 1986

1Suma arumpi cutt'ayañajja colerañjja apakewa,

ucampis jan wali arumpi cutt'ayañajja, juc'ampwa colerasiyi.

2Yatiñan jakenacajj yatiñ cancañampiw parlapjje,

ucampis jan amuyt'an jakenacajja lokhe arunacacwa parlapjje.

3Tatitojj take chekanquiwa;

jupajj uñch'uquisquiwa asqui jakenacaru, uqhamarac ñankha jakenacarusa.

4Suma arunacajj jacaña kokjamawa,

ucampis jan wali arunacajj jaken chuymaparojj usuchjiwa.

5Jan amuyt'an jakejj awquipan yatichäwiparojj jisc'achiwa;

awquipar ist'qui ucajj yatiñanïtapwa uñacht'ayi.

6Cheka lurir jaken utapan take cunapas jan tucusquiriw utji,

ucampis ñankha lurir jaken cuna jicjjatatanacapasa jan cunataquiwa.

7Yatiñan jakejj wali suma yatichäwinacwa parli,

ucampis jan yatiñan jakejj jan walinacacwa luri.

8Tatitojj ñankha jakenacan loktatanacapjja janiw uñjañ munquiti,

ucampis cusisiñampiwa catoke cheka jakenacan mayisitanacapjja.

9Tatitusti ñankha jakenacan sarnakatanacapjja janiw uñjañ munquiti;

qhititejj cheka cancañana sarnakqui ucaruw munasiraqui.

10Qhititejj suma thaquina sarnakaña apanucqui ucarojj khoru cancañampi chekachatawa;

qhititejj chekachäwiru jisc'achqui ucasti jiwaniwa.

11Tatitutejj sum uñjchi, yatiracchi cunatï jiwañansa, sepulcronsa ucjja,

¡ucat juc'ampwa Tatitojj jakenacan chuymapjja uñt'i!

12Jan yäkasir jakesti janiw munquiti jupar chekachqui ucarojja,

janiraquiw yatiñan jakenacampis sarnakañ munquiti.

13Cusisit chuyman jakesti ajanupanjja cusisitaraquiwa;

llaquit chuyman jakesti llaquita ajanuniwa.

14Yatiñan jakejj juc'ampwa yatikañ muni,

ucampis jan amuyt'an jakejja jan walinacampiw apayasi.

15Qhititejj llaquitäqui ucataquejj take urunacasa jan walicamaquiwa;

qhititejj cusisitäqui ucataquisti jan tucusquiri cusisiñawa.

16Wali kamiri, llaquita jacañat sipansa,

wali asquiwa pobrëscaña, Tatiturusa yupaychascañajja.

17Vaca aycha uñisiñampi mank'añat sipansa,

juc'amp asquiwa munasiñampi ch'ojjñanaca mank'añajja.

18Mäqui colerasir jakejj nuwasiñanacwa utjayi;

qhititejj llamp'u chuymanïqui ucasti, pachparuwa ch'ujtayi.

19Jayra jakena thaquipajj ch'aphinacamp phokhantatawa,

ucampis cheka jakena thaquipajja suma qhusqhaquiwa.

20Yatiñan wawajj awquiparu, taycaparojj cusisiyiwa;

jan yatiñan wawasti awquiparu, taycaparojj jisc'achiwa.

21Jan amuyt'an jakesti jan wali sarnakatapatjja cusisiwa;

ch'iqhi jakesti sarnakäwinacapjja chekachasiwa.

22Cunapachatejj jan jisct'asiñajj utjqui ucqhajj, amtäwinacajja aynacht'iwa;

walja amuyt'ayirinacampiw sumar mistsuñajj utji.

23¡Cunj asquisa jisct'aru arunac jicjjatañajja,

ucat juc'ampisa horasapar jicjjatañajja!

24Jacañar irpir thaquejj amstaruwa sari,

ucatsti yatiñan jakerusa khespiyaraquiwa jiwaña aynacharu puriñatsa.

25Tatitojj jach'a jach'a tucurin utapjja tucjiwa,

ucampis ijma warmin orakep janiw jittayquiti.

26Tatitojj janiw uñjañ munquiti ñankha jakenacan amtäwinacaparojja,

ucampis juparojj suma k'oma arunacawa cusisiyi.

27Walja yänacaru munapayirejj pachpa utapwa tucji,

ucampis qhititejj jan kollke chilltayasqui ucaw jacani.

28Asqui jakejj janïra parlcasinjja suma amuyt'asisinwa arsu,

ucampis ñankha jakejja mäquiwa jan wali arunaca parlatati.

29Tatitojj ñankha lurir jakenacatjja jithektiwa,

ucampis asqui jakenacan mayisitanacapjja ist'iwa.

30Suma cancañampi uñtäwejj chuymarojj cusisiyiwa;

suma yatiyäwinacasti ch'amañchiwa.

31Jacañ churir chekachäwi arunacar ist'irejj,

yatiñan jakenac taypinwa jacani.

32Yatichäwiru jisc'achirejj jupa pachpawa jan wal lurasisqui;

chekachäwiru ist'iristi, amuyt'asiñwa jicjjati.

33Tatitur ajjsarañajj yatiñ cancañwa utjayi;

llamp'u chuyman tucuristi jach'ar aptatawa.