Job 42 - Aymar Bibliia 1986

Job chachan Diosaru arsusitapa

1-2Job chachajj Diosaruw take jan walt'añañacapa arsusiraquïna:

Job

“Nayajj yattwa jumajj take cunataquisa ch'amanïtama,

janiw jumataquejj cunas jan lurañjamajj utjquiti.

3¿Qhitïtsa nayajj juman jach'a cancañamata pächasiñataquejja,

uqhamat pisi amuyt'a jakëtajja uñacht'ayañataquejja?

Nayasti cuntejj jan amuyt'cäyäta ucanacatwa parlascäyätjja,

muspharcaña yänacata, cunanacatejj jan amuyt'añjamäqui take ucanacatwa parlascäyätjja.

4Jumasti saraquistawa: “Ist'ita, nayasti parlañwa munsma;

aca jisct'anacaru arsuniraquim” sasa.

5Jichhacamasti nayajj jumatjja mayninacan parlatap tokecwa uñt'ayäsmajja,

ucampis jichhajj naya quipcaw jumarojj uñcatsma.

6Ucatpï jichhajj chuymas usuta parlatanacajjatsa jumat jayana pisayastjja,

lak'a khellaru kont'ata.”

Diosajj Job chacharojj, cusisiñ cutt'ayjje

7Uca arunaca Job chacharu sasinsti, Tatitojj Elifaz chacharuw parlaraquïna, ucatsti saraquïnwa: “Jumataquejj wali coleratätwa, uqhamaraqui uca pani amigomataquisa; jumanacajj janiw nayjjatjja cunatejj chekapäqui uca parlapctati, cunjämtejj Job sirvirejjajj parlqui uqhama.

8Jichhajj pakallko orko vacanacampi, pakallko orko ovejanacampi catupjjam, ucatsti Job sirvirejjaru uñjiri sarapjjam, ucatsti jumanacajj mä nact'ata sacrificio loktapjjaraquim pachpa jumanacataqui. Job sirvirejjaw jumanacataqui mayiraquini, nayasti jupan mayitapjja ist'araquïwa, jumanacarusti janiw ucatjja cuna ñankhanacsa lurapcaraquïmati, jumanacarojj mutuyañas waquiscchi ucasa, nayjjat jan chekaparu khanañchapjjatamata, cunjämatejj Job sirvirejjajj khanañchänjja uqhama.”

9Ucatsti Elifazampi, Bildadampi, Zofar chachampejj cunjämarutejj Tatitojj siscatayna uqhamarjamaw phokhapjjäna, Tatitusti Job chachan mayitapjja ist'araquïnwa.

10Job chachan amigonacapataqui mayitapatsti, Diosajj Job chacharojj nayra kamir cancañapwa wasitat cuttayjjäna, ucat juc'ampisa nayra kamir cancañapat sipanjja pä uqhampwa cuttayjjäna.

11Ucatsti take jilanacapawa jupar uñjirejj sarapjjäna, uqhamaraqui cullacanacapasa, amigonacapasa, nayra tiempo uñt'ata jakenacasa, ucatsti utapanjja mä jach'a mank'äwi lurapjjaraquïna. Job chachan take t'akhesitanacapatsti chuymachapjjänwa, cuna t'akhesiñanactejj Tatitojj jupjjaru apayancatayna take ucanacata; jupanacatsti sapa mayniraquiwa mä kawkha kollke churapjjäna, uqhamaraqui mä kori anillompi cuna.

12Diosasti Job chacharojj juc'ampwa bendisjjaraquïna nayra maranacat sipansa. Ovejanacapasti tunca pusini warankäjjänwa, camellonacapasti sojjta warankaraqui, waranka yuntanacani, uqhamaraqui waranka kachu asnonacani cunäjjaraquïnwa.

13Ucjjarusti tunca pusini yokanacanëjjaraquïnwa, quimsa phuchanacani cuna.

14Jilïri phuchaparusti Jemima sasaw sutichäna, ucjjaru phuchaparusti Cesia sasaraqui, quimsïri phucharusti Keren-hapuc sasaw suticharaquïna.

15Aca orakpachansti janipuniw Job chachan phuchanacapjama wali suma uñnakt'ani warminacajj utjcänti. Awquipasti uca phuchanacaparojj jilanacapampi chicwa take yänaca churjjaraquïna.

16-17Uca khepatsti Job chachajj pataca pusi tuncani marampwa jacascäna, wawanacaparusa uñjasiwaycaraquïnwa, allchhinacan allchhinacapcama. Ucatsti Job chachajj wali chuymaniwa jiwjjäna, walja maranaca jacasaraqui.