1 Samuel 22 - Aymar Bibliia 1986

1Davidasti ucatjja jaltawayjjaraquïnwa; Adulam sat puturuw imantasjjaraquïna. Cunapachatejj jilanacapas, uqhamarac take familianacapasa ucanac yatipjjäna ucapachajj jupan ucaruw sarapjjäna.

2Uqhamaraquiw take t'akhesiyata jakenacasa, manuninacasa, uqhamarac qhitinacatejj jan cunampisa take chuymäpcäna uca jakenacasa Davidampiw mayachasjjapjjäna. Davidasti jupanacan capitanaparaquïnwa. Jupampi chica sarnaker jakenacasti niya pusi pataca jakenacjamänwa.

3Uca chekatsti Davidajj Moab tokena, Mizpa sisqui uca chekaruw sarjjäna. Ucat Moab oraken reyiparojj saraquïnwa:

“Achict'assmawa, awquejjasa, taycajjasa acaru jumanacampi chica kheparañapataqui, cuntejj Diosajj nayampi lurcani uca yatiñajjcama” sasa.

4Uqhamaw Davidajj awquiparu, taycaparojj Moab reyin ucaru irpjjäna. Jupanacasti jupampiw jacapjjaraquïna; Davidajj imantascäna take uca urunacana.

5Ucatsti Gad profetajj Davidarojj aqham suma arunac churaraquïna:

“Jan aca imantasiñ chekaru kheparamti. Judá orake tokeru sarjjam” sasa.

Uqhamaw Davidajj sarawayjjäna, ucatsti Haret sisqui uca ch'umiruw purïna.

Sacerdotenacar Nob chekan jiwarayatapa

6Saúl reyisti Gabaa sisqui uca chekancascänwa, kollana tamarisco ali c'uchuna kont'ata, lanzapasa ayt'ata, take jilïri oficialanacapampi muyuntata. Cunapachatejj Davidampiru, jakenacapampiru jicjjatapjjatapa yatisinsti,

7uca oficialanacaparojj sänwa:

—Benjamín tribut jutiri jakenaca, ist'apjjeta: ¿Jumanacasti amuyapjjtati, Isaí jaken yokapajj jumanacaru churapjjätamti orakenaca, uva yapunaca, uqhamarac take jumanacarusa comandanteta, uqhamarac capitanata utt'ayañapa?

8Take jumanacasti naya contraw jan wali amtapjjtajja, janiw jumanacatjja maynisa nayarojj yatiyquituti, wawajjajj Isaí jaken yokapampi arust'asitapjja; janiw jumanacatjja maynis nayatjja llaquisquiti. Jumanacatjja janiraquiw maynisa nayarojj yatiyquituti, yokajjajj yanapirejjaru naya contra tucuyatapatjja, nayaru nuwjañataqui waquichasitapatsa, cunjämatejj jichhajj waquichasisqui uqhama —sasa.

9Uqhamasti Doeg sat edomita jakejja, qhititejj Saúl reyin esclavonacapan capitanapäcän ucajja sartasin Saúl reyirojj sänwa:

—Nayaw uñjta Isaí jaken yokaparojja, Nob sata orakeru Ahimelec sacerdotempi jiquisir sarasquiri. Uca sacerdotesti Ahitob jaken yokaparaquiwa.

10Ahimelec sacerdotesti Tatituruw Davidjjatjja jisct'asiraquïna. Ucatsti churaraquiwa mank'añanaca uqhamaraqui Goliat filisteo jaken espadapsa churaraqui —sasa.

11Uqhamasti reyejj Ahimelec sacerdoteru, Nob marcan utjiri take sacerdotenacapampiruw jawsayani, qhitinacatejj uca Ahimelec sacerdoten familianacapäcänjja ucanacamppacharu. Cunapachatejj reyin nayrakataparu takeni purinipjjän ucqhasti,

12Saúl reyejj Ahimelec sacerdoterojj sänwa:

—Ahitob jaken yokapa, wali ist'ita —sasa.

—Juma nayrakatanctwa jach'a munañani rey —sasaw Ahimelec sacerdotejj saraquïna.

13Saúl reyejj jisct'araquïnwa:

—¿Cunatsa jumampi, Isaí jaken yokapampejj naya contra jan wal amtapjjta? Jumasti t'ant'ampi, mä espadampwa churatätajja, uqhamarac Diosarusa jisct'atätajja David toketjja, naya contra sayt'añapataqui, ucatsti nayaru muyuntasa catjañataqui, cunjämtejj jichhajj lurqui uqhama.

14Ucat Ahimelec sacerdotejj reyirojj saraquïnwa:

—¿Juma jach'a munañan reyin take oficialanacamatsti cawquïriraqui, Davidjam cheka chuymanisti, uqhamarusa jupajja juma jach'a munañani reyin tollkaparaquiwa, reyin guardiapan jilïriparaqui, uqhamarac palacionsa wali jach'a jach'añchäwi catokeriraquejja?

15¿Jichhaquiti nayajj Diosaru Davidjjatsti jisct'aststi? Janiw cunas uca toketjja utjquiti. Uca laycu jach'a munañan reyejja jan cunsa aca sirvirip contrajj lurpati, ni familianacapa contrasa, sirvirimajj janiw cunsa aca tokenacatjja ni juc'sa, ni waljsa yatquiti uca laycu.

16Ucampisa reyejj sascaquïnwa:

—¡Ahimelec, suma yatisim. Jumasa, take familianacamasa, chekpachansa jiwarapjjätawa! —sasa.

17Ucatsti janc'aquiw reyejj jupan guardiaparojj ordenaraquïna:

—¡Tatitun sacerdotenacaparojj jiwarayapjjam! Jupanacasa Davidampïpjjaraquiquiwa. Jupan jaltascatap yatcasinsa, janiw jupanacajj nayarojj yatiyapquituti —sasa.

Ucampisa reyin guardiapajj janiw Tatitun sacerdotenacap contrajj ampar aytañ munapcänti.

18Ucatwa reyejj edomita Doeg sat jakeruw ordenaraquïna:

—¡Juma jiwarayam! —sasa.

Uqhamasti Doeg sat jakejj sacerdotenacar catuntasinjja, quimsakallko tunca pheskani jakenacwa jiwarayäna. Jupanacasti efod sat linot lurat isimpi ist'atcamaquïpjjänwa.

19Ucatsti janc'aquiw Nob sisqui uca marcaru mantapjjäna. Uca marcasti sacerdotenacan marcapänwa. Ucansti espadampiw chachanacsa, warminacsa, wawanacsa, asu wawanacsa jiwarayapjjäna. Uqhamaraquiw vacanacsa, asnonacsa, ovejanacsa jiwarayapjjaraquiquïna.

20Ucampisa Ahimelec sacerdoten wawanacapatjja mayni Abiatar sat sutini yokapawa jaltjjäna, cawqhanccäntejj Davidajj ucacamaw puriraquïna.

21Ucansti yatiyaraquïnwa, Saúl reyin Tatitun sacerdotenacaparu jiwarayatapa.

22Davidasti saraquïnwa:

—Nayajj yatïyätwa qhä urojja, cunapachatejj Doeg jakejj ucanccäna ucqha, jupajj reyirojj yatiyaniwa, sasa. Nayaw juchanïtjja takpacha familiaman jiwarañapataquejja.

23Ucampisa nayampi chica acar kheparam, janiraqui ajjsaramti, jumar jiwayañ munirejja, nayarojj jiwayaraquitpan. Uqhamajj nayampi chicajj janiw cunas camachcätamti.