1 Samuel 30 - Aymar Bibliia 1986

Davidan amalecitanacaru atipjatapa

1Quimsüru sarakatatsti, Davidampi jakenacapampejj Siclag marcaruw puripjjäna. Ucansti jicjjatapjjaraquïnwa amalecita jakenacajj Néguev sat orakeru mantanipjjatapa, ucatsti Siclag marcaru nuwantapjjatapa t'unjasa, ninampi phichhantasa.

2Amalecita jakenacasti uca marcan utjiri warminacarusa, take wawanacarusa, chachanacarusa preso apapjjaraquitayna, jan maynirus jiwarayapcchïna ucasa.

3Cunapachatejj Davidampi jakenacapampejj marcaru puripcän ucapachajja, marcarojja naqhantata uñjapjjäna, warminacsa, yokall wawsa, imill wawsa preso apapjjaraquitayna.

4Ucat wali jach'at jachapjjäna, wararipjjaraquïna thayjtañcama.

5Davidan pani warmipasa catuntataraquïnwa, Jezreelanquiri Ahinoam sat warmisa, uqhamarac Abigail warmisa, cawquïritï Nabal jaken warmipäcäna, Carmel chekana utjcäna ucasa.

6Davidasti wali llact'ataw jicjjatasiraquïna, jakenacapasti juparojj kalampiw c'upjaña munapjjaraquïna, takenisa wali mayjt'ataraquïnwa, cunatejj wawanacaparu pascatayna ucanacata. Ucampisa jupajj Tatitu Diosaparuw confiasiraquïna.

7Ucat Abiatar sacerdoterojj saraqui, uca sacerdotesti Ahimelecan wawapänwa:

“Achict'assmawa, efod isi apanirapita” sasa.

Abiatar sacerdotesti janc'aquiw Davidarojj efod isi churäna.

8Davidasti Tatituruw jisct'asiraquïna:

—¿Uca lunthata jakenacarojj arctañajjati? ¿Jupanacarojj jicjjatiristti? —sasa.

Tatitusti saraquïnwa:

—Arctascaquim, jicjjatätawa, ucatsti preso apata jakenacsa aparanjjaraquïtawa —sasa.

9Davidasti janc'aquiw sarjjaruwayi, jupampi chicäpcäna uca sojjta pataca jakenacasa jupampi chicaraquiw sarapjjaraquïna. Besor sisqui uca jawira thiyaruw puripjjäna.

10Uca chekarusti pä pataca jakenacaw kheparapjjäna. Jupanacasti wali kariratäpjjaraquïnwa jawira maqhatañataquejja, yakha pusi pataca jakenacampisti, Davidajj arctascaquïnwa.

11Ucat juc'ampi kheparusti thaquinjja mä egipcio jakeruw jicjjatapjjäna. Ucat uca jakjja Davidan ucaruw irpapjjäna. Nayrakatajja mank'ampi, umampi churapjjäna.

12Mä higo q'isampi, pä wayta waña uvampi churapjjäna. Uc mank'antasinsti egipcio jakejja cutitatjjänwa, quimsürumpi quimsa arumampiraquiw jan cunsa mank'cataynati.

13Uqhamasti Davidajj jisct'araquïnwa:

—¿Qhitis uywirimajja? ¿Cawquitsa jutta? —sasa.

Egipcio jakesti saraquïnwa:

—Egiptonquirïtwa, mä amalecit jaken uywatapätwa, ucampisa niya quimsa uruw uywirejjajj jaytanucjjetu, usuntatajj laycu.

14Cereteo jakenacan aynacha orakepa saqueyjiriw sarapjjta, ucatsti Judá, Caleb tokenquirinacar uqhamaraqui. Siclag marcarusti ninampiw phichhantapjjta.

15Davidasti saraquïnwa:

—¿Uca lunthata jakenacan ucaru irpitasmati? —sasa.

Ucat egipcio jakejj saraquïna:

—Jumatejj Diosan sutipjjaru juramento lurarapitäta, ucatsti janiraqui uywirejjarusa catuycaraquitäta, ni jiwaycaraquitätasa, ucapachajj nayajj cawqhancapquitejj jupanacajj ucacamaw irpäma —sasa.

16Ucatsti, cawqhancapcäntejj uca lunthatanacajj ucacamaw irparaquïna. Jupanacasti take uca pampana aywitatatäsipcänwa, ucan mank'asipcäna, umasipcaraquïna, uqhamarac jach'a fiesta lurasipcäna take cunanactejj jupanacajj filisteonacan orakepata, uqhamarac Judá oraketsa lunthatanipcatayna ucanacampi.

17Uqhamasti Davidajj alwata, jayp'ucamawa jupanacarojj nuwaräna, k'alwa jupanacarojj tucjaraquïna, ucampisa pusi patac waynanacaquiw camellonacaparu lat'jjatasina jaltjjapjjatayna.

18Davidasti wasitatwa take cunanactejj amalecitanacajj lunthatjanipcatayna ucanaca jicjjatjjäna, uqhamarac pani warmipsa jicjjatasjjaraquïnwa.

19Take cunanactejj amalecitanacajj lunthatawayapcatayna, ucanacatjja jan maynis chhakhat jicjjatjjäna. Janiraquiwa ni mä wawasa, ni mä jakesa chhakhatäcänti; Davidajj take cunwa jan cunas chhakhata jicjjatjjaraquïna.

20Jupasti take ovejanacapa, vacanacapa catuntasiraquïna. Uqhamasti cawquïrinacatejj uca uywanaca anaquinipcän ucanacasti sapjjaraquïnwa take ucanacajj Davidan jicjjatataw sasa.

21Cunapachatejj Davidajj purinjjäna, cawqhanccäntejj uca pä pataca jakenacajj ucqharu, qhitinacatejj Besor jawira jan maqhatirjamäpcän wali karitäpjjatap laycu, janiraqui Davidampi chica sarapcataynati, ucanacasti Davidampiru, jakenacapampiru catokeriw mistunipjjäna. Davidasti jupanacaru jac'achasisinjja aruntaraquïnwa.

22Ucampisa Davidan jakenacapatjja utjaraquïnwa wali khoru jakenaca, ucanacasti colerasisinjja sapjjaraquïnwa: “Qhitinacatejj jan jiwasampi chica sarapqui ucanacarojj janiw cunas churatäñapäquiti, jan ucasti warminacapampi, wawanacapampiquiw churatäjjañapajja, ucatsti sarjjapjjpan” sasa.

23Ucampisa Davidajj saraquïnwa:

—Jan ucanac lurapjjamti, nayan jilanacajja, uqhamarus take cunsa Tatituw churistojja, janiraquiw jupajj jiwarañasa muncänti, jan ucasti uca lunthata jakenacjja amparasaruwa catuyistojja, qhitinacatejj jiwasaru nuwantapquistäna ucanacarojja.

24Jichhasti janiw qhitis jumanacarojj “Waliquiw” sapquiristamti. Jaljasiñansti chicataw wact'istojja, qhitinacatejj yänaca uñjañataqui kheparapqui ucanacampisa, uqhamarac qhitinacatejj guerraru nuwasiri sarapqui ucanacampisa —sasa.

25(Ucürut jichhürcamasti israelitanacajj uqhampunwa jaljasipjje.)

26Davidasti cunapachatejj Siclag sisqui uca chekaru purjjäna ucapachasti, Judá orakenquiri jilïr jakenacaru, uqhamarac qhitinacatejj amigonacapäcäna ucanacarusa, cuntejj uñisirinacapat aparancatayna ucanacatjja mä chicat apayäna, aqham sasa: “Aca wajjt'añajj jumanacataquiwa, cuntejj Tatitun uñisirinacapat aparcta ucata mä chicatawa acajja” sasa.

27Uqhamaraquiw wajjt'añanacjja apayaraquïna qhitinacatejj Betel, Ramot ucasti Néguev chekana, Jatir,

28Aroer, Sifmot, Estemoa,

29uqhamarac Racal chekanquirinacarusa, uca quipcaraqui Jerameel marcanacan utjirinacarusa, quenitanacan marcanacapan utjirinacarusa,

30Horma, Corasán, Atac,

31Hebrón, uqhamarac cawqhanacantejj jupasa, uqhamarac jakenacapasa sarnakcatayna take ucsanquirinacaruw apayataraquïnjja.