1 Corintios 14 - Aymar Bibliia 1986

Jan uñt'at arunacat parlaña

1Munasipjjapunimaya jumanac purajja, uqhamarac chuymanacamanjja munapjjapunim Diosan take ajayu token churäwinacapa catokañjja. Diosat catokat arunacap parlañ munapjjam.

2Jan uñt'at arunacat parlir jakejja Diosaruw parli, janiw jake masiparu parlquiti, janiraquiw qhitis parlatapjja amuyquiti. Cuntejj parlqui ucjja ajayu toket parli ucampis ucajj jaketaquejj jan amuyt'cayawa.

3Ucampis qhititejj Diosan arunacapa parlqui ucajj Diosat catokasinjja jakenacaruw parli iyawsañanacapan jiltapjjañanacapataqui, ch'am catjjatayañataqui uqhamarac chuymachañataquisa.

4Jan uñt'at arunac parlirejj jupapachaw ajayu tokenjja jilti, ucampisa Diosat catokasin arunacap parlirinacajja iglesianquirinacaruw ajayu tokenjja jiltayaraqui.

5Nayajj muniristwa jumanacajj sapa maynis jan uñt'at arunac parlirïpjjañama, ucat sipan juc'ampjja muniristwa jumanacajj Diosat catokata arunaca mayninacaru parlapjjañama, uqham parlañaw asquejja jan uñt'at arunac parlañat sipansa. Jan ucajj jan uñt'at arunac parlirinacajj khanañchapjjañapawa parlatanacapa, uqhamata iglesianquirinacajj ajayu tokenjja jiltapjjañapataqui.

6Ucatpï jilatanaca, nayatejj jutasin jan uñt'at arunacat parlapjjäma ucqhajja ¿cuna asquirac jumanacasti jicjjatapjjasmasti? Inas cun Diosajj yatiyañ munchi jan ucajj mä chekapa arunaca, jan ucajj Diosan arunacapa jan ucajj mä yatichäwi parlañ utjchi ucqhaquiwa parliristjja.

7Jichhajj amuyt'añäni pinquillompita, arpampita. Ucanacajj música tocañataquiwa wali, ucampis janiw jacañanïpquiti. Uca instrumentonacatejj alekaqui tocatäspa ucajj janiw cuna musicätapas yatiscaspati.

8Guerranccasinjja, trompetatejj jan suma khana phust'ascaspajja, janiw qhitis nuwasiñatac waquichascaspati.

9Uqhamaraquiw jumanacampejj lurasi. Jumanacatejj jan uñt'at arunacat parlapjjätajja jan qhitinsa amuyt'cañjja, ¿cunjämatrac yatisispa cuna parlapjjatanacamasa? ¡Ina ch'usaruquiw parlasipctajja!

10Aca orakenjja walja parlanacaw utji, ucampis take uca parlanacajja amuycañaraquiwa.

11Ucampisa nayatejj jan amuycäjja, mä jaken nayar yakha arut parljjayatapa, uca jaketaquejj nayajj mä yakha marcanquir jakjamäyäwa, jupas nayataquejj uqhamaraquïspawa.

12Ucatpï, jumanacajj niyaqui wali ajayu toketa cuna ch'amsa catokañ munapjjstajja, munapjjapunim cunanacatejj iglesianquirinacar jiltaycaspas ajayu tokenjja uca lurañanac catokaña.

13Uqhamajj mä jaketejj jan uñt'at arunacat parlchejja, Diosatjja ch'am maypan cuntejj parlqui uca khanañchañataqui.

14Nayatejj mä jan uñt'at aruta oración lurirista ucqhajja, chekpachansa ajayojjampiw oración lurasctjja, ucampis amuyojjampejj janiw cuna ascsa jicjjatcti.

15Uqhamasti ¿cuna lurañajjaraquïspasti? Chekpachansa ajayumpiw oración lurä uqhamarac amuyojjampisa. K'ochunacsa ajayumpiw k'ochü uqhamarac amuyojjampisa.

16Jumatejj ajayunaqui Diosarojj yupaychätajja, mä alek ist'iric jutirejj janiw juma chica oración lurcaraquispati cuna parlatamsa jan amuyatap laycu.

17Oracionan Diosar yuspagaratamajj wali sumäscaspawa, ucampis maynejj janiw ajayu tokenjja jiltquiti.

18Diosarojj yuspagartwa, nayajj jumanacat sipansa juc'ampwa yattjja uca jan uñt'at arunacat parlañjja.

19Ucampis cultonjja, mä pä arunacsa, amuycañwa parlañ muntjja, uqhamat mayninacar yatichañataqui, tunca waranka jan uñt'ata, jan amuycaya arunac parlañat sipana.

20Jilatanaca, jan wawjam amuyt'asirïpjjamti. Jan ucasti jan walinac lurañataquiqui wawjamäpjjam, ucampis amuyt'asiñ tokensti jach'a jakenacjamäpjjaraquim.

21Tatitun arunacapanjja siwa: “Aca marcarojj jan uñt'at arunacata yakha jakenacampiw parlayäjja, ucampis janiw nayarojj ist'apquitaniti, siw Tatitojja.”

22Uqhamajja jan uñt'at arunacat parlañajja mä chimpücaspas uqhamaw jan iyawsirinacataquejja, ucampis iyawsirinacataquisti janiw uqhamäquiti. Diosat catokat arunaca parlañajja iyawsirinacataquejj mä chimpuwa, ucampis jan iyawsirinacataquejj janiw uqhamäcaraquiti.

23Uqhamajja cunapachatï jumanacajj takeni iglesian tantacht'asipjjätajja, ucat takeni jan uñt'at arunaca parlasipcäta, ucat ucaru mä jan iyawsirinacajj mantanipjjani ucqhajja, jumanacar uqhama parliri ist'asajja: “Acanacajj lokhenacasä” sapjjätamwa.

24Ucampis takenitejj Diosat catokata arunaca khanpacha parlapjjätajja ucat maynejj jan iyawsirïcasina, jan ucajj jan cunsa suma yatcasa mantaninejja, jumanacan parlatanacam ist'asajja jupajj juchap uñt'asiniwa. Ucatsti jupapacharaquiw chuymapsa uñantasinejja, jumanacan parlatanacama ist'asajja.

25Uqhamatwa cuntejj chuymapar imjjäsqui ucanacajj khanaru mistuni, ucatsti quillt'asisinjja Diosaruw yupaychani, saraquiniwa: “Chekpachawa Diosajj jumanac taypinqui” sasa.

Take cunsa sum lurapjjam cunjämarutejj waquisqui uqhamarjama

26Uqhamajj jilatanaca, jichhajj acaw utji: Cunapachatï tantacht'asipjjäta ucqhajja, jumanacatjja mayninacajj k'ochusiñwa munapjje, yakhepanacajj yaticht'aña, yakhepanacanjja utjaraquiw Diosan mä cuna yatiyäwipasa, jan ucajj jan uñt'at arunacat parlañasa, jan ucajj uca jan uñt'at arunacat parlatäquis uc khanañchañasa. Ucampis take cunas ajayu token iglesianquirinacar jiltayañataquïpan.

27Cunapachatï jan uñt'at arunacat parlapjjäta ucqhajja, paniniqui jan ucajj quimsaniquiwa parlañapa, maynit maynita parlasa; uqhamarus mayniw khanañchañaparaqui ucanacan parlatanacapjja.

28Ucampis janitejj qhitis uca jan uñt'at arunaca khanañchirejj utjcchi ucqhajja, janicucha tantachasïwinacamanjja parlapcamti uca jan uñt'at arunacatjja, jan ucasti sapakat maynisa jupa pachpa parlaspan uqhamarac Diosampisa.

29Uqhamaraqui, cunapachatejj Diosat catokata arunaca parlapjjäta ucqhajja, panis quimsanis parlpan, ucatsti mayninacajj amuyt'apjjaracpan walti parli janicha ucjja.

30Ucampis Diosatejj mayni kont'atäsquiriru mä cunsa yatiychejja, ucajj sayt'aspan parlañataqui, nayrakat parlirïqui ucasti amuct'pan.

31Uqhamata take qhitinacatï Diosat catokapcta uca arunaca maynit maynit parlapjjañamataqui, takenis yatekañapataqui, amuyt'asiñapataquiraqui.

32Diosan arunacapa parlirinacajja take amuyupampiw parlañapa;

33Diosasti janiw alek ch'ajjwañ Diosäquiti, jan ucasti sumancaña Diosawa. Take iglesianacansa jilatanacarojj yatichatawa:

34“Warminacajj jan parlapjjpati cultonjja” sasa. Jupanacarojj janiw: “Parlapjjam” satäquiti. Jan ucasti warminacajj ist'asirïpjjañapawa cunjämtï Diosan arunacapajj sisqui uqhama.

35Cuns yatiñ munapjjchi ucqhajja, chachanacaparuw utan jisct'asipjjañapa. Mä warmin culton parlañapasti janiw sumäquiti.

36Jumanacajj yatipjjañamaraquiwa, Diosan arunacapajj janiw jumanacampi kalltasquiti, ni jumanacaquiraquis Diosan arunacapjja catokapctati.

37Maynitejj amuyaschi ch'amanïtapa Diosan arunacapa parlañatakejja, jan ucajj amuyaschi Kollan Ajayojj chuymaparu parljjayatapjja, yatiñaparaquiwa cuntejj kellkanipcsma ucajj Diosan camachipätapa.

38Janitejj catokañ muncchi ucqhajja, janiraquiw juparojj catokañäcaspati.

39Uqhamapï jilatanaca, jumanacajj Diosan arunacapa parlañarupun uscusipjjam. Maynitejj jan uñt'at arunaca parlañ munchejja, janiraqui jarc'apjjamti.

40Take cunsa sum lurapjjam maynit maynita.