Isaías 7 - Aymar Bibliia 1986

Isaiasan Acaz reyir parlañ kalltatapa

1Siria marcan reyipa, Rezín sat uqhamaraqui Israelan reyipa, Peka sat sutini, jupasti Remaliasan yokapänwa; uca pani reyejj Jerusalén marcaruw nuwantapjjäna atipjañracwa munapjjäna, ucampis janiw ch'amanïpcänti catuntasiñataquejja. Acasti lurasïnwa cunapachatejj Acaz reyejj Judá marca apnakcän ucapacha. Jupasti Jotaman wawapänwa Uziasan allchhiparaqui.

2Ucapachawa rey Acazaru familiapampiru aca yatiyäwi yatiyapjjäna:

—Siria jakenacajj Efraín marcampiw mayacht'asjje —sasa. Ucapachasti reyisa, take jakenacasa ajjsarañat qhathatipjjäna cunjämatejj kokanacajj montenjja thayataquejj qhathatejj uqhama.

3Tatitusti Isaiasarojj sänwa:

“Sear-jasub wawamar irpjjarusim, ucatsti Acaz reyimpi jiquisir saram. Amsta tokenquir uma estanque canal tucuyanwa jupampi jiquisïta, Pañonac T'ajjsirin Orakepar sarquis uca thaquina,

4ucatsti saraquim:

‘Amuyasim, ucampis jan sustjasimti,

jan ajjsaramti, janiraqui llajllas tucumti,

uca pä jisc'a ninar uñtata jek'erinacatjja,

Rezín reyejj Sirio jupan jakenacapampi,

uqhamaraqui Remaliasan yokapasa,

jupanacasti colerat naqhantirjamäscaraquiwa.

5Sirio jakenacasti Efraín marcampi, Remaliasan yokapampejja jumarojj jan wali lurañwa amtapjje.

Sapjjaraquiwa:

6“Judá marcar nuwjañäni, ajjsarañ uscuraquiñäni,

jupsti catuntasiraquiñäni,

ucatsti Tabeelan yokapa reyit utt'ayaraquiñäni” sasa.

7Ucampis Tatitojj siwa:

¡Ucajj janiw cunapachas lurascaniti!

8-9Damascosti Siria marcan capitalapawa,

Rezín sat reyisti uca Damasco marcan reyiparaqui.

Samariasti Efrainan capitalapawa,

Remaliasan yokapasti Samarian reyiparaquiwa.

Ucampisa acat sojjta tunca pheskani mararojja Efraín marcajj janiw juc'ampi utjjaniti;

uqhamaraqui jumanacatejj jan suma iyawsañanïpcsta ucapachajja janiraquiw suma ch'amani sayt'asipcätati.’ ”

Payïr yatiyäwi: Emanuel wawan naciñapata

10Tatitusti Acaz reyirojj sascaquïnwa:

11—Tatitu Diosamar mayim mä milagro lurañapataqui, ucasti jumataqui mä unañchäñapataqui, cawqui mankhapachansa jan ucajj cawqui wali alaya amstansa —sasa.

12Acaz reyisti saraquïnwa:

—Janiwa, janiw nayajj Tatitur yant'cäti mä unañchäwi mayiñataqui —sasa.

13Isaiasajj saraquïnwa:

—Ist'apjjam, jumanaca David reyin utapanquirinaca.

¿Jumanacataquejj janit cunäquisa jakenacaru majañajja,

Diosajjarusti majañ munapjjaracta ucajja?

14Tatitu quipcaw jumanacarojj mä chimpu churasipcätam:

Uñtapjjam, mä tawakow usur jakeptata,

mä yokall wawa wawachasiraquini,

Emanuel sasaraquiw sutichani.

15Uca wawasti kallta maranacapanjja,

lechempi, misq'impic mank'ani, amuyunïñapcama.

16Ucampis uca wawajj janïra suma amuyt'asirïcani ucapachaw cawquïri pani reyinacan marcanacapatejj jumaru ajjsarayctam uca marcanacajj apanucutäjjani.

17“Tatituw jumjjarojj jutayani,

marcamjjaru, reyin utapjjarusa,

cawquïri urunacatejj jan jutcäna uca urunaca,

Efrainajj Judá marcatjja yakhaktcäna uca urunacatpacha.”

(Acajj Asirian reyiparuw sañ muni).

18Uca pachanacansti chhichhillanqhanacar uñtatwa Tatitojj jutayani,

qhitinacatejj Egipto token jaya jawiranacan jacapqui ucanacaru,

Asirian utjirinacarusti wayronkonacar uñtatwa jutayaraquini.

19Take jupanacasti jach'a k'awa mankhanacan utjiriw jutapjjani,

uqhamaraqui jach'a karka p'iyanacansa,

take ch'aphi alinac taypinsa, uqhamaraqui uywa umaña chekanacansa.

20Uca urunsti Tatitojj Asirianquir reyirojj Eufrates jawirat qhursanquiri mayt'ata cuchillöcaspas uqhamwa tucuyani,

israelitanacarusti uca cuchillompiw ñic'utsa,

sunqhanacsa, uqhamaraqui aynach tokenacsa yawiraraquini.

21“Uca urunacansti qhititejj mä vaca, pä ovejanaca uywasqui ucanacasti

22walja leche, uqhamaraqui queso mank'apjjani. Take qhitinacatejj marcan t'unjatäñapatjja khespipcani ucanacasti quesompi misq'impi mank'apjjani.

23Uca urunacansti cunatejj nayrajj waranka uva ali yapuchatäcän ucajj uqhamaraqui alapas waranka kollkëcän ucajj ch'aphi aliruquiw tucjjani.

24Ucarusti arcompi flechanacampi caturañataquiquiw mantatäni, take marcpacha ch'aphi koranacaru tucutätap laycu.

25Nayrajj azadonampi yapuchapcän uca kollunacanjja ch'aphi koranacasti walipunïniwa, janiraquiw qhitis uca kollunacarojj maqhatapcaniti. Vacanaca ovejanaca awatiñataquiquiw walïni.”