Ester (hebreo) 4 - Aymar Bibliia 1986

Reyin arsutap yatisinjja, judionacajj llact'ataw jicjjatasipjje

1Mardoqueosti take cunanacatejj lurasiñapäcäna uc yatisinjja, llaquisitapa uñacht'ayañataquisti isipa ch'iyanokasisaw luto chhanqha isi isintasïna, uqhamarac p'ekepatsa khellampiraquiw warjjatasïna. Ucatsti wali llact'ataw marcanjja arnakasisa ucsa acsa sarnakäna.

2Ucatjja uqhampachaw reyina palaciopa puncurojj purinïna. Ucampis uqhama luto isinjja janiw ucaru mantayapjjerïcänti.

3Uqhamarac reyina ordena churatapajj kawqha provincianacarutejj purïna ucanjja judionacajj wali jach'a llaquisiñancapjjänwa. Ucatsti jupanacajj llaquisitanacapjja uñacht'ayapjjänwa ayunasina, jachasina, uqhamarac wali warariñanacampi, waljaninacaraquiw luto chhanqha isi isintasisinjja khella pataru iquipjjaraquïna.

Ester reynan uñstatapa

4Reina Esteraru sirviri warminacampi, uqhamarac juparu uñjir eunuco chachanacampejj cunatejj lurasqui ucjja yatiyapjjänwa. Reinasti uca yatisinjja wali llacthaptäna, ucatsti Mardoqueorojj isinaca apayäna uca luto isi trocasiñapataqui, ucampis jupajj janiw uca isi catokaña muncänti.

5Ucatjja Esterajj Hatac sata reyin palaciopa puncu uñjir eunuco chacharuw jawsayäna. Ucatsti Mardoqueon ucaruw qhitäna jisct'aniñapataqui cunasa pasatayna, cunatsa jupajj uqham luto isi isintatäpacha uca yatiñataqui.

6Ucat Hatac chachasti saränwa Mardoqueompi parliri. Jupasti marcanquir plazancascänwa, reyin palaciopa puncu uñcatasina.

7Ucatsti Mardoqueojj yatiyänwa cunatejj pasqui uca, uqhamarac Amán chachajj kawkha kollktejj churañataquejj arscatayna judionacan take jiwarayatäpjjañapataqui ucsa yatiyaraquïnwa.

8Uqhamajja churaraquïnwa Susa marcan judionaca jiwarayañataqui ordenajj yatiyascäna uca kellkatanaca Esteraru churañapataqui, uqhamata jupajj suma yatiñapataqui. Uqhamarac ewjjaraquïnwa Esterajj reyimpi jupa quipca parlt'asa achict'añapataqui, marcapan uqhamata khespitäñapataqui.

9Ucatsti Hatac chachajj cutt'anjjasinjja yatiyänwa Esterarojj cunanactejj Mardoqueojj sisqui take ucanaca.

10Esterasti wastatampiw Hatac sat chacha qhiti Mardoqueon uca, aqham sasa:

11“Take reyiru sirvirinacasa, uqhamarac reyin apnakata provincianquiri jakenacasa yatipjjewa mä ley utjatapa jiwayañataqui chacharusa, warmirusa, cunapachatejj reyinsa jan jawscata juparu uñjiri palaciopa patio mankheru mantqui ucaru. Ucampis reyitejj uca jaketa qhuyapt'ayasina kori thujrupampi ayjjatchi ucajja jiwañapatjja perdonatawa. Uqhamasti jichhajj uca lurañajj nayaruw wact'itu. Aca quimsa tunca uruwa reyejj nayarojj jan jawscjjetuti” sasa.

12Mardoqueojj Esteran yatiyäwinacapa catokasinsti,

13aqhama yatiyäwi jupajj saraquïna: “Jan jumajj amuyamti reyina palaciopancasajja naya sapa judía warmiquiw jacañajj khespiyasëjja” sasajja.

14Jichhasti jumatejj amuct'asïta, janitejj cunsa camscäta ucajja judionacan khespiyasiñapajja yakha toketwa jutani. Ucampis jumasa, uqhamarac awquiman familianacapasa jiwarayatäsipcaquïtawa. ¡Inasa jumajja reinaru puriscsta jiwasanacaru aqham llaquisiña horasana yanapt'añataqui!” sasa.

15Ucatsti Ester reynajj aqham yatiyäwiraqui Mardoqueorojj ewjjaraqui:

16“Saram, Susa marcanquir take judionaca tantacht'anim, ucatjja ayunapjjam nayataqui; janiw mank'apjjätasa, ni umapjjaraquïtasa quimsa uru, quimsa aruma. Nayasti tawako warmi uywatanacajjampejja uca quipcaraqui lurapjjaraquëjja, ucatjja nayajj reyimpi parliriw saräjja, uqhama lurañajja leyirjamajj janis walïscpan. Ucampis jiwayapjjetanejja, jiwayasipcaquitpana” sasa.

17Ucata Mardoqueojj sarasinjja cunjämtejj Ester reynajj sisqui uqhamarjamaw phokhänjja.