Jeremías 48 - Aymar Bibliia 1986

Moab toketa profecía arunaca

1Tatitun arunacapa, Israelan take ch'amani Diosapan arunacapa Moab marcataqui:

“¡Pobre Nebo marca!

¡Cunja t'unjatätasa!

¡Quiriataim sat marcasti catuntatawa, jisc'achjataraquiwa!

¡Ch'amapasti pamparu liwinucutaraquiwa!

2Moab marcan jach'a honorapasti tucusjjewa,

Hesbón chekanwa uñisirinacapajj cunayman amtasipqui

Moab marcajj, marcpacha chhaktjjañapataqui.

Madmén, jumas tucjataraquiw uñjasïta,

guerrasti jumjjarojj jutapuniniwa.

3Horonaim sat chekatsti arnakasitanacaquiw ist'asi:

‘¡Aynacht'añampi, jach'a t'unjatäñampiw utjaraqui!’

4“Moab marcasti t'unjatawa.

Usuyasiñat warariñanacasti Zoar chekacamaw ist'asi.

5Luhit sat amstanjamsti jacht'asisaw maqhatasipcaraqui.

Horonaim sisqui uca aynachanjamsti,

t'unjäwi uñjasasti warart'asisaw sarakasinipcaraqui.

6¡Jaltjjapjjam! ¡Qhitis ch'amani ucajj jaltjjapjjpan!

¡Wasaranquiri ch'aphirar alinacjamäpjjaraquim!

7“Moab marca, jumasti ch'amamaruw wali alcatasïyätajja,

uqhamaraqui kamir cancañamarusa,

ucampisa jumanacajj catuntatäpjjaraquïtawa.

Quemós sat diosamasa jayaru apataraquïniwa,

sacerdotenacapampi, jilïri jakenacapampi chica.

8T'unjatäñasti take marcanacarupuniw puriraquini,

janiraquiw mä marcas khespcaniti.

Pampanacasa, kollunacasa t'unjataw uñjasipjjani.

Naya Tatituw ucjja arsta.

9Moab marcarojj suma pallalla kalanac uscupjjam,

uca marcarusti t'unjapjjaraquiniwa,

marcanacapasti k'ala t'unjataw uñjasipjjani,

jan mä jakeniw uñjasipjjaraquini.”

10(¡Maldecitäpan cawquïri jaketejj jan suma chuymampi Tatitun ejjwata irnakañanac phokcani ucajja. Maldecitaraquïpan cawquïri jaketejj jan jiwayañ munqui ucajja!)

11Moab marcajj sumaquipuniwa jacasiscänjja. Janipuniw cunapachas jaya marcarojj apayata uñjascänti. Mä sapa sañunquiri vinjama, cawquïri vinotejj jan mä sañut yakha sañuru waraquipatäqui, ucatsti janiraqui mojjsapasa ni k'aphipasa chhakquiti uqhama.

12Ucampisa Tatitojj siwa: “Mä uruw purinini cunapachatejj nayajj jakenaca qhitanï uca vino mä sañut mä sañuru waraquipañapataqui, ucatsti waraquipjjasinjja uca ch'usa sañu p'acjañapataqui, uca urojj purininiwa.

13Ucapachaw Moab marcajj amuyasini Quemós sat diosapajj sallkjatapa, cunjämatejj Israel marcajj Betel chekan sallkjata uñjasïnjja uqhama, Israel marcasti uca Betel chekaruw alcatasiraquïna.

14“Moab marcasti jan siscpati:

‘Jiwasajj jan cuna ajjsariri jakenacäpjjtanwa,

guerransa nuwasiri ch'amani jakenacäpjjtanwa’ sasajja.

15Moab marcaru uqhamaraqui yakha marcanacaparu t'unjirejj niyaw purinjje.

Cawquïr suma waynanacatejj utjqui ucanacasti jiwarapjjaraquiniwa.

Ucsti Reyiw arsu, uca reyin sutipasti Take Ch'amani Tatitu, satawa.

16Moab marcan t'unjatäñapajj niyaw jac'achasini,

aynacht'añapasa niyaw puriniraquini.

17Moab marca jac'an utjirinaca,

qhitinacatejj jach'a jach'añchäwipsa uñt'apjjta ucanaca,

uca marcat jachapjjam, sapjjaraquim:

‘¡Uñtapjjam cunjämas aca marcajj tucjata uñjasi,

take orakenacapasa,

jupajj ch'amanïnwa, wali jach'at uñt'ataraquïnwa!’ sasa.

18“Dibón marca, uca jach'a konuñamat sarakanim,

ucatsti waña orakeru kont'asim,

Moab marcaru t'unjirejj niya jac'achasinitap laycu,

suma sayt'asiña perkanacamsa t'unjaraquïwa.

19Aroer marca, thaqui jac'aru sayt'asim, uñatataraquim;

qhitinacatejj jacasipqui ucanacarusti jisct'araquim,

‘¿Cunas aca chekan lurasi?’ sasa.

20Moab marcajj t'unjatawa, ajjsarañampi phokt'ataraquiwa.

¡Uca marcat jachapjjam!

¡Arnón jawiransti yatiyapjjaraquim Moab marcan t'unjatätapatjja!”

21Cuna mutuyäwitejj uca pata pampanquir marcanacataqui arsutäcän ucanacajj purinjjewa: Holón, Jahaza, Mefaat,

22Dibón, Nebo, Bet-diblataim,

23Quiriataim, Bet-gamul, Bet-meón,

24Queriot, Bosra, take Moab tokenquiri marcanaca, jac'anquiri marcanaca, jayanquiri marcanaca.

25Tatitusti siwa:

“Moab marcan ch'amapajj t'unjatawa,

munañanïñapasa t'unjataraquiwa.” sasa.

26Moab marcarojj machjayapjjam,

Tatitutaqui sayt'asitap laycu.

Ucapachaw Moab marcajj pachpa wak'sutapar korumnakani,

takeniw jupatjja larusipjjaraquini.

27Moab, ¿janit jumajj Israel marcat laruscaraquïyätajja?

¿Uqhamaraqui uca marcatjja jisc'achañampi parlcäyätajja, lunthatäcaspas uqhama?

28Moab orakenquiri jakenaca, marcanacat mistuwayjjapjjam;

karkanac taypiru jaquiri sarjjapjjam, palomanacjama,

karka pata lacanacaruraqui tapachasipjjam.

29Moab marcan jach'a jach'a tucurïtapjja yatipjjtanwa,

jach'a jach'a tucutapa, jisc'achirïtapa, mä jan ajjsartiri chuymanïtapsa.

30Tatitusti uqham jan wali chuymanïtapjja yatiraquiwa,

aru jiljatätapsa, uqhama jach'a jach'a tucurïtapsa.

31Ucatpï jachäjja, wali amtaraquëjja,

take Moab marcatjja,

Kir-hares sat marcanquir jakenacatsa.

32Sibma chekanquiri uva yapu, jumatjja jacharaquïwa,

Jazer marcat jachatäcäna ucat sipansa juc'ampwa jacharaquëjja.

Layminacamajj jach'a kotat juc'ampi qhursanacaruw purïnjja,

Jazer marcacamaw puriraquïnjja.

Ucampisa jichhajj uva cosechañamasa k'ala t'unjataraquiwa.

33Janiraquiw c'uchiqui arnakasiñanacas ist'ascjjeti, Moab jardinanacanjja.

Vinos pist'jjaraquiwa uchañ utanacanjja,

janiw qhitis uva taquirejj utjcjjaraquiti,

janiraquiw cusisiñat k'ochuñanacas utjcjjeti.

34Hesbón marcanquiri jakenacajj usuyasitapat wararisipqui,

wararitanacapsti Eleale, Jahaza marcacamaw ist'asiraqui,

Zoar ucqhat Horonaim, Eglat-selisiya ucacamaw ist'asi,

Nimrim chekanquiri uma jalsunacapas wañantataraquiwa.

35Tatitojj saraquiwa:

“Nayaw Moab marcanquiri jakenacarojj t'unjäjja,

qhitinacatejj kollu patanacaru, diosanacapan santuarionacaparu inciensonaca, sacrificionaca uca diosanacapar loktasir sarapqui ucanacarojja” sasa.

36Ucatpï chuymajjajj Moab marcatjja aykojja,

Kir-hares marcanquir jakenacatsa amaya imaña pinquillonacampi phust'asisa,

take kamir cancañapa imcatcäna ucanacasti tucusjjaraquiwa.

37P'eke ñic'utanacapasa mururatcamaquiwa,

sunqhanacas mururatawa;

takeniw amparanacapa qharirasipjjatayna,

chhanqha isinacampi isthapitcamaquïpjjaraquiwa.

38“Moab marcana take terraza patanacana, callenacansa,

jakenacan wararitapaquiw ist'asisqui,

nayan Moab marcaru jisc'a jisc'a t'unjatajj laycu,

jan cunatac inamaya sañücaspas uqhama t'unjatajj laycu.

Naya Tatituw ucjja arsta.”

39¡Moab marcatjama jaqhusipjjam!

¡Cunja ajjsarcañas uca marcajja!

¡Mä p'enkaw khepäjja uñtaraqui!

Ajjtascaña, jisc'achcañaraquiw marca jac'anacapataquisa tucuraqui.

40Tatitojj siwa:

“Moab marcan uñisiripajj jupataquiw jutanti chhekha janatatata allkamarir uñtata.

41Marcanacasa, suma sayt'asiña chekanacasa uñisiripan amparaparuw purini.

Uca urusti Moab marcan guerrar sarir jakenacapasti partompi wararir warminacjamaw qhathatipjjani.

42Moab marcasti tucusiraquiniwa,

naya Tatitutaqui sayt'asitap laycu.

43Ucatpï naya Tatitojj sistjja:

Moab marcan utjir jakenacajj,

jiwayañ uywanacjam jiwayirinacapampi arcnakatäpjjaniwa,

jan ucajj mä sipitaru, mä p'iyaru jalantirjamäpjjaniwa.

44Jiwayirinacat jaltirejja p'iyaruw jalantapjjani,

uca p'iyat misturinacasti sipitaruw jalt'apjjaraquini,

nayaraquiw Moab marcjjarojja mutuyäwipan urupjja apaniraquï.

45“Yakhepanacajj jan ch'amaniquiw jaltjjapjje,

Hesbón ch'iwinacaru imantasiñataqui;

ucampisa Hesbón marcajja, Sehón reyin marcapäqui ucajj ninampi naqhayataraquiwa,

uca ninasti jach'aruw saratataraqui,

Moab kollunacsa uca ch'ajjwiri marcsa, k'alwa mank'antaraqui.

46¡Ay, Moab, cunaquïcani jumataquejja!

¡Quemós diosan marcapa, aynacht'atätawa!

yokanacamarusa, phuchanacamarusa jaya marcaruw preso apapjje.

47Ucampisa nayaw Moab marcan saräwipjja mayjaru tucuyjjaraquï;

Naya Tatituw ucjja arsta.”

Ucaw Tatitun arunacapajja Moab marcataquejja.