Ezequiel 1 - Aymar Bibliia 1986

Diosan tronopata unañchäwi

1-3Naya, sacerdote Ezequiel, Buzi sat jaken yokapa, mä uruw nayajj Quebar sisqui uca jawira thiyan sayt'ata, ucancascäyäta, Babilonia orakena, cawquïrinacatejj uca jaya marcaru preso apatäpcäna ucanacampi chica. Uqhamäquiriruw alajjpachajj jist'artäna ucatsti Diosarojj tronopjjan kont'ata uñjaracta. Uca urojj pheska uru sarakatänwa pusïri phajjsita, quimsa tunca mararaquïnwa Joaquín reyejj preso apatäcän ucatjja niya pheska mararaquejjänwa. Tatitusti nayjjaruw amparapjja lokjjatitu.

4Ucatsti uñjaractwa amsta toket mä jach'a tutuca thayar uñtata jutasquiri; mä jach'a kenayatsti ninaraquiw mistuscäna llijullijur uñtata, ucaru muytatasti mä jach'a khanaw khanascaraquïna. Uca nina taypinsti mayaw c'ajascaraquïna mä suma metaläcaspas uqhamaw llijunïna,

5uca chica taypinsti mayninacaw utjaraquïna mä pusi jakenacäcaspas uqhama.

6Ucanacatsti sapa mayniw pusi ajanuni uqhamaraqui pusi chhekhanacani uqhamapjjäna,

7charanacapasti chekaquiraquïnwa, cayu sillunacapasa vaca kallun sillunacapjamaraquïnwa, ucasti mä suma llijquiri broncëcaspas uqhamaw khanaraquïna.

8-9Uca pusi ajanupata uqhamaraqui uca pusi chhekhanacapat sipansti, uca pusinisti jake amparat amparanacanïpjjaraquïnwa, pusi chhekhanacap c'uchuna. Chhekhanacapasti jupanaccamaw jicthaptapjjaraquïna. Sarasasti janiw kheparu uñtanipcaraquïnti jan ucasti nayrakataruw sarapjjänjja.

10Uca pusinin ajanunacapasti aqhamaraquïnwa: Nayräjja ajanusti jake ajanuraquïnwa, cupi toke ajanusti mä leonana ajanupjamaraqui, ch'eka toke ajanusti, mä orko vacan ajanupjamaraqui, khepäjja ajanusti mä jach'a siwek'ara jamach'in ajanupjamaraquïnwa.

11Chhekhanacapasti amsta tokeruw janatattapjjaraquïna. Ucanacat paninisti jupanaccamaw jiquintasipjjaraquïna, payïrimpisti cuerponacapwa imantasipjjaraquïnjja.

12Takenis nayra tokeruw sarapjjaraquïna, sarasasti janiw kheparu cutiquipstanipcaraquïnti. Cawcsarutejj Diosan ch'amapajj jupanacaru apcänsa ucsaruw sarapjjaraquïna.

13Uca pusinisti mä sanq'iri q'illiminacjamaraquïnwa, jan ucajj mä nina wiyar uñtataw ucsa acsa sarnakapjjaraquïna uca taypinjja; uca ninasti walpun c'ajaraquïna, ucatsti uca nina taypitjja llijullijunacaraquiw mistunïna.

14Uca pusinisti janc'aquiw jutapjjäna sarapjjaraquïna mä llijullijunacäpcaspas uqhama.

15Uca pusiniru uñtasasti, orakensti sapa mayni thiyanjja mä ruedaraquiw utjäna.

16Uca pusi ruedanacasti jupanaccama quipcaquïpjjänwa cunjämatejj luratäpcäna uqhamarusti topaciojj khanquisa uqhamaw khanapjjaraquïna. Amuyatatjja uca sapa mayni ruedanac taypinjja yakha ruedanacas utjcaspa uqhamänwa.

17Ucanacasti, pusi tokeru cawcsarus sarapjjaquïnwa, jani kheparu cuttanisa.

18Uca pusi ruedanacasti arunacaneraquïnwa, uca ruedanaca muytatasti walpun khanapjjaraquïna.

19Cunapachatejj uca pusinejj sartawayapjjän ucqhajj uca pusi ruedanacajj jupanacampi chicaraquiw sarantapjjäna, cunapachatejj uca pusinejj oraket thoktawayapjjän ucapachasti uca pusi ruedanacajj jupanacampi chicaraquiw thoktawayapjjaraquïna.

20Uca pusinisti, cawcsarutejj Diosan ch'amapajj jupanacaru apañ muncäna ucsaruw aparaquïna, ruedanacasti jupanacampi chicaraquiw cawcsarusa sarapjjäna. Uca ruedanacasti uca pusinin jacañapan jacañapaniraquïnwa.

21Cunapachatejj uca pusinejj onjjtapjjän ucqhasti uca ruedanacajj ucanac chicaraquiw onjjtapjjäna, cunapachatejj uca pusinejj sayt'apjjäna ucapachasti ruedanacajj ucanacampi chicaraquiw sayt'apjjäna; cunapachatejj uca pusinejj oraket sartapjjän ucqhasti uca ruedanacajj uca pusinimpi chicaraquiw sartapjjänjja, uca ruedanacasti uca pusinin jacañapan jacañapaniraquïnwa.

22P'ekenacap patansti utjaraquïnwa mä cristal alay perkäcaspas uqhama, ucasti walwa c'ajaraquïna.

23Uca mankhansti uca pusinin chhekhanacapajj chekaquiw janatattaraquïna, maynit maynicama jiquintasisa. Paya chhekhampisti cuerponacapwa imantasipjjäna.

24Cunapachatejj uca pusinejj sarantapjjäna ucapachasti uca chhekhanacapan suenatapjja ist'aractwa, uca suenatapasti mä jach'a jawiran umanacapjamänwa, take ch'amani Diosan arupjamaraquïnwa, mä walja soldadonacan saratapäcaspas uqhamaraquïnwa. Cunapachatejj sayt'apjjäna ucapachasti uca chhekhanacapajj janaktjjapjjaraquïnwa.

25Uca p'ekepa patanccän uca c'ajquiri alay perkäcaspas uca taypitsti, mä jach'a aruw misturaquïna.

26Uca patansti, mä konuña uñjaracta safiror uñtata, uca konuña patansti mayniw kont'atäscaraquïna mä jaker uñtata.

27Uca jakesti, cinturat amstarojj mä suma c'ajquiri metalar uñtataw c'ajaraquïna, ninan muytata, cinturat aynacharusti ninacamaquiraquïnwa. Uca muytatansti mä khanaw khanaraquïnjja,

28uca khanasti cürmir uñtataraquïnwa, cunapachatejj cürmejj jalluna kenay taypin uñstquis uqhama. Uqhamwa nayajj uñjta Tatitun c'ajquir cancañapjja. Ucanac uñjasasti nayajj oraker puriñcamaw p'ekejj alt'asiracta.