2 Samuel 5 - Aymar Bibliia 1986

Davidajj Israel marcampin, Judá marcampin reyipawa(1 Cr 11.1-3)

1Uca khepatsti Israelan take tribunacapajj Hebronarcamaw sarapjjäna, Davidampi parlañataqui, sapjjaraquïnwa: “Nanacajj juman quipca familiamäpjjtwa.

2Chekpachansa Saúl reyejj nanacan reyejjäcchïnsa, ucampisa jumaw Israel marcarojj apnakascäyätajja guerran nuwasiñanacapanjja. Uqhamarus Tatitojj jumaruraquiw arsuwaytam Israel marcaparu sarayañamataqui uqhamaraqui apnakañamataqui” sasa.

3Uqhamaw Israelanquir take jilïri jakenacajj Hebrón chekan David reyimpi parliri sarapjjäna, jupasti mä arust'äwi luraraquïna jupanacampejja, Tatituru testigot uscusa. Uqhamasti jupanacajj uca urojj Davidarojj reyit utt'ayjjapjjäna, take Israel marcjjaru.

4Davidasti quimsa tunca maranïnwa cunapachatejj reyïña kalltcän ucapachajja, ucatsti pusi tunca maraw reyit apnakaraquïna.

5Hebrón marcansti pakallko chicatani maraw Judá orakerojj reyit apnakäna, ucjjarusti Jerusalenan take Israel marcaru uqhamaraqui Judá marcarojj quimsa tunca quimsani mararaquiw apnakäna.

Sión sayt'asiñ chekwa Davidajj catunti(1 Cr 11.4-9)

6Rey Davidampi, jakenacapampisti Jerusalenaruw sarantawayapjjäna, jebuseo jakenacar nuwantañataqui, jupanacasti ucsa tokenacanwa jacapjjäna. Ucampisa jebuseonacajj amuyapjjaraquïnwa, Davidajj janis uca marcar mantcaspa uqhama, ucatsti sapjjaraquïnwa: “Janiw jumajj acar mantancasmati, juyqhunacampi, cojonacampiquiw jumarojj jarct'apjjätamjja, jan mantaniñamataqui” sasa.

7Ucampisa Davidajj Sión chekan sayt'asiñajj utjcänsa ucjja catuntaraquïnwa, jichhasti Davidan Marcapat uñt'atawa.

8Davidasti ucapachajj saraquïnwa: “Qhitinacatejj jebuseo jakenacaru nuwjcani ucanacasti uma canalanjam mantapjjpan, ucatsti juyqhunacampiru, cojonacampiru jiwaraypan, nayasti ucanacarojj walpun uñisiractjja.” Ucatwa uca säwejj jutaraqui, “Juyqhunacasa, cojonacasa janiw Tatitun utaparojj mantapcaspati” sasa.

9Uca khepatsti Davidajj uca sayt'asiña chekaruw utjantasïna, ucatsti Davidan Marcapa sasaw suticharaquïna. Ucat uca marcarojj mä jach'a perkampiw muyuntayaraquïna, Milo sisqui uca chekata, palaciocama.

Hiram reyejj qhitanacwa Davidan ucar qhiti(1 Cr 14.1-2)

10Davidan munañanïñapasti juc'ampiraquiw saratatäna, yapjjattaraquïna, take ch'amani Dios Tatitusti jupampiraquïnwa.

11Ucatwa Tiro marcan Hiram reyipajj, Davidan ucarojj mayni qhitanacwa qhitaniraquïna; carpinteronacampi, kala ch'iyiri jakenacampi, ucanacasti cedro maderanac apt'ataw jutapjjaraquïna, jupanacasti David reyin palaciopwa utachapjjaraquïna.

12Ucapachawa Davidajj amuyaraquïna Tatitojj juparu Israelan reyipat utt'ayatapa, uqhamaraqui reinoparusa jiltayatapa, Israel marcaru apnakañapanjja.

Davidan yakha wawanacapa(1 Cr 3.5-9; 14.3-7)

13Hebrón chekata Jerusalenaru sarjjatatsti, Davidajj ucanjja juc'ampi warminaca catusiraquïna, uqhamaraqui uñt'atanacsa, ucanacasti Davidataquejj juc'ampi yokanaca, phuchanaca wawacharapipjjaraquïna.

14Jerusalenan nascäna uca wawanacasti aqham sutininacänwa: Samúa, Sobab, Natán, Salomón,

15Ibhar, Elisúa, Nefeg, Jafía,

16Elisama, Eliada, uqhamarac Elifelet ucanaca.

Davidajj filisteo jakenacaruw atipji(1 Cr 14.8-17)

17Filisteonacasti cunapachatï Davidan Israeljjaru reyit utt'ayatäjjatap yatipjjän ucapachasti, take jupanacajj Davidar thaktiriw sartapjjäna, ucampisa Davidajj ucjja yatiraquïnwa, ucatwa sarjjaraquïna imantasiña chekaru.

18Ucatsti filisteonacajj sarantasipcaquïnwa, take uca Refaim sisqui uca valle catuntapjjaraquïna.

19Ucatwa Davidajj Tatituru yanapa mayiraquïna, jisct'asiraquïnwa:

—¿Filisteo jakenacarojj nuwantiristti? ¿Jupanacarojj atipjayitätati? —sasa.

Tatitusti juparojj saraquïnwa:

—Jïsa, nuwantascaquim, nayaw jumarojj jupanacjjaru atipjaña churäma —sasa.

20Davidasti Baal-perazim sisqui uca chekaruw purinïna, ucanwa atipjaraquïna. Ucatwa saraquïna: “Mä jaliri umar uñtatwa Tatitojj uñisirinacajj taypin thaqui jist'ararapitu” sasa. Ucatsti uca chekarojj Baal-perazim sasaw suticharaquïna.

21Uqhamarus filisteo jakenacajj diosanacapjja pachparuw apanucusiwayapjjatayna, Davidampi jakenacapampisti uca yakha diosanacwa apthapipjjaraquïna.

22Ucampisa filisteonacajj wasitatwa uca Refaim valle catuntiri cuttanipjjaraquïna.

23Uqhamasti Tatituruw Davidajj wasitat sarasin jisct'asiraquïna, Tatitusti juparojj saraquïnwa:

—Jani nayräjjatjja nuwantamti jan ucasti cunapachatejj bálsamo sat kokanacäquis uca chekaru purisinsti khepäjjata jupanacarojj muyuntam, ucatsti nuwantam.

24Cunapachatejj uca kokanac patan sojjoquiri ist'äta ucapachasti jupanacarojj nuwantascaquim, ucajj sañ muni nayaw sarascta juman nayrakatama, filisteonacaru jiwarayañcama nuwjañataqui —sasa.

25Davidasti cunjämtejj Tatitojj siscatayna uqhamwa luraraquïna, ucat filisteonacarojj atipjaraquïna Gabaón sisqui uca chekata Gezer sisqui uca chekcama.