Esdras 8 - Aymar Bibliia 1986

Cutt'anirinacan sutinacapa

1Acaw familianacana jilïrinacapana sutinacapajja, sapa mayni jupanacan kellkatäqui uqhamaru, qhitinacatejj Artajerjes reyejj apnakcäna ucqhajja Esdras ucampi Babiloniata cutt'anipcäna ucanacajja.

2-3Gersón ucasti Finees familiata jutirïnwa; Daniel ucasti Itamar familiata jutirïnwa; Secanías chachan Hatús yokapasti David familiata jutirïnwa. Zacarías ucasti Paros familiata jutirïnwa, jupampi chicasti pataca pheska tuncani chachanacan sutinacapampi kellkatänwa.

4Zeraías chachan Elioenai yokapasti, Pahat-moab familiata jutirïnwa, jupamp chicasti pä pataca chachanacaraquïnwa;

5Jahaziel chachan Secanías yokapasti, Zatu familiata jutirïnwa, jupamp chicasti quimsa pataca chachanacaraquïnwa;

6Jonatán chachan Ebed yokapasti, Adín familiata jutirïnwa, jupamp chicasti pheska tunca chachanacaraquïnwa;

7Atalías chachan Jesaías yokapasti, Elam familiata jutirïnwa, jupamp chicasti pakallk tunca chachanacaraquïnwa;

8Micael chachan Zebadías yokapasti, Sefatías familiata jutirïnwa, jupamp chicasti quimsakallk tunca chachanacaraquïnwa;

9Jehiel chachan Obadías yokapasti, Joab familiata jutirïnwa, jupamp chicasti pä pataca tunca quimsakallkoni chachanacaraquïnwa;

10Josifías chachan Selomit yokapasti, Bani familiata jutirïnwa, jupamp chicasti pataca sojjta tuncani chachanacaraquïnwa;

11Bebai chachan Zacarías yokapasti, Bebai familiata jutiriraquïnwa, jupamp chicasti pä tunca quimsakallkoni chachanacaraquïnwa;

12Hacatán chachan Johanán yokapasti, Azgad familiata jutirïnwa, jupamp chicasti pataca tuncani chachanacänwa.

13Elifelet, Jeiel, uqhamarac Semaías uca chachanacajja, Adonicam familiata jutirinacäpjjänwa, jupanacamp chicasti sojjta tunca chachanacänwa, khepjjaruw purinjjapjjäna.

14Utai, uqhamarac Zabud uca chachanacajja, Bigvai familiata jutirïpjjänwa, jupanacamp chicasti pakallk tunca chachanacaw jutapjjaraquïna.

Templon sirvirinaca

15Naya Esdrasaw take jupanacar tantachta Ahava jawiraru jicjjatqui uca jawira lacjjana, ucansti quimsa uruwa utjnoktapjjta. Ucansti jakenaca, uqhamarac sacerdotenaca taypina thaktasinjja janiw mayni levita chacharusa jicjjatcti.

16Ucatjja qhittwa acanacaru: Eliezer, Ariel, Semaías, Elnatán, Jarib, Elnatán, Natán, Zacarías, uqhamarac Mesulam ucanacaru, jupanacasti wali aytat chachanacäpjjänwa; uqhamaraquiw qhitaracta Joiarib, uqhamarac Elnatán uca yatichirinacaru.

17Ucjjarusti saractwa Ido ucar visitañapataqui, jupasti Casifia sat chekana jilïripänwa, ucatjja saractwa take cunanactï Ido chacharu, masinacapamppacharu yatiyapjjañapäqui ucanaca, jupanacasti templona sirvirinacäpjjänwa Casifia chekana, jupanacajj jiwasatac jakenaca apanipjjañapataqui Diosasana templopana yanapapjjañapataqui.

18Diosarusti yuspagaratäpan, jiwasataquejj irpanirapistuwa Serebías suma yatiñani chacharu, jupasti Mahli sat mä levita familiata jutirïnwa, wawanacapampi, jilanacapampiraqui; takpachanisti tunca quimsakallkonïpjjänwa.

19Ucjjarusti irpanirapistuwa Hasabías, uqhamarac Jesaías ucanacaru, jupanacasti Merari familiata jutirïpjjänwa, yokanacapampi, uqhamarac jilanacapampisa pä tuncanïpjjänwa.

20Davidampi, mayni sarayirinacampi templona levitanacaru sirviñapataqui uchatäpcäna ucanacasti, pä pataca pä tuncanïpjjänwa, sapa mayni jupanacaw utt'ayatäpjjäna.

21Ucatsti takeruw yatiyta Ahava sat jawira jac'ana ayunañataqui, uqhamata Diosan nayrakatapana juchanacajja uñt'asiñanacajjataqui, uqhamarac mayiñataqui sumaqui nanacar sarayañapataqui, familianacajjaru, uqhamarac yänacajjarusa.

22Nayasti p'enkasïyätwa reyita caballería soldadonaca mayiña nanacar thaquin uñisirinacata imañapataqui, nanacajj reyirojj sapjjäyätwa: “Diosajj imiwa take qhitinacatejj jupar thakapqui ucanacarojja, ucampisa qhitinacatejj juparu apanucupqui ucanacarusti Diosan ch'amapasa, colerapasa jupanac contrawa” sasa.

23Ucatwa ayunasina Diosar achict'asipjjta take ucanacata, ucatsti jupajj ist'apjjetuwa.

24Ucjjarusti sacerdotenacatjja tunca payan sarayirinacwa yakhachta: Serebías, Hasabías, uqhamarac jupanacampi chicäqui uca jakenacaruraqui.

25Ucatjja kollke, kori pest'asinjja churtwa, uqhamarac churaracta reyisa amuyt'ayirinacapasa, yanapirinacapasa, uqhamarac qhayanquir take israelita jakenacasa churäwinaca churapquitäna Diosasana templopataqui ucanacsa.

26Pest'asinjja churtwa pä tunca mayan waranka pusi pataca pheska tuncani kilo kollke, kollketa lurata pataca yänaca, uqhamarac quimsa waranka quimsa patacani kilo kori;

27ucjjarusti churaractwa pä tunca korit lurata tazanaca, ucanacasti quimsakallko kilonïpjjänwa, uqhamarac bronceta suma lurata pä yänaca, ucasti wali jila alanïnwa korïcaspas uqhama.

28Ucatwa jupanacar sista: “Jumanacasti Tatitur loktatäpjjtawa, uca yänacjama; kollkesa, korisa awquinacasana Tatit Diosapataquiwa.

29Jumanacajj sum uñjapjjam, uqhamarac imapjjaraquim Jerusalenan Tatitun templopan utanacaparu, pest'apjjañamataqui sacerdotenacan jilïrinacapa nayrakatanacapana, uqhamarac levitanacana, Israelana familianacapana jilïrinacapana nayrakatapanaraqui” sasa.

30Ucatsti sacerdotenacasa, levitanacasa catokapjjänwa kollke, kori, uqhamarac pest'apcäna uca yänaca, ucatjja Jerusalenaruw apjjapjjäna Diosasana temploparu.

31Kallta phajjsina tunca payan uru sarakataruwa Ahava sat jawiratjja sartanjjapjjta Jerusalén marca tokeru. Diosasasti yanapapjjetuwa thaquina uñisirinacata, lunthatanacatsa imasa.

32Jerusalén marcar purisinsti, quimsa uruwa samarapjjta.

33Pusïri urunsti pest'atäjjänwa kollkesa, korisa, uqhamarac yänacasa Diosasana templopana, ucatsti take catuyatäjjänwa Urías chachan Meremot sacerdoteru. Jupamp chicäpjjaraquïnwa Finees chachan Eleazar yokapa, uqhamarac levitanacata Josué chachan Jozabad yokapa, uqhamarac Binuy chachan Noadías yokaparaqui.

34Uca pachpa urunwa pest'atäna, take jaqhutaraquïna, uqhamarac uca cargajj kellkataraquïna.

35Ucjjarusti jayar apayatanacajj cutt'anjjapjjäna ucanacasti, churapjjänwa nact'at loktäwinaca Israelan Diosaparu loktatäñapataqui, uqhamarac take israelitanacan sutiparuraqui, churapjjänwa tunca payan vaca kallunaca, llätunc tunca sojjtani qhariñ ovejanaca, pakallk tunca pakallkoni mä maran ovejanaca, uqhamarac tunca payan chivonaca juchata ofrenda loktañataqui. Take ucanacasti Tatitutaqui nact'ayatänwa.

36Ucatsti churapjjaraquïnwa reyin arunacapa uca reinon jilïrinacaparu, uqhamarac Eufrates jawirata inti jalanta tokenquiri provinciana gobernadoranacaparusa, jupanacasti: “Waliquiw” sasaw yanapapjjäna marcarusa, uqhamarac Diosan temploparusa.