Isaías 19 - Aymar Bibliia 1986

Egipto marca toke profecía arunaca

1Egipto marca toke profecía arunaca:

“Tatitur uñtapjjam,

Egiptoruw jutasqui mä jaliri kenayar lat'jjatata.

Jupa nayrakatansti Egipton diosanacapajj qhathatipjjewa,

Egiptonquir jakenacasti wal ajjsarapjjaraqui.

2Egiptonquir jakenacarojj payaruw jaljtayä,

jupanac pura nuwasiyä,

amigojj amigop pura, marcasti marca pura,

reinojj reino puraraqui.

3P'eksa jupanacarojj mayjt'ayäwa,

amtatanacapsti t'unjaraquïwa.

Ucapachawa yakha diosanacaparu, laykanacaparu jisct'asir sarapjjani,

jiwatan ajayunacaparu, yatiri jakenacaparuw jisct'asipjjani.

4Ucampis nayajj Egiptorojj mä khoru uywiriruw catuyäjja,

mä khoru reyiraquiw jupanacarojj apnakani.”

Uqham siw take ch'amani Tatitojja.

5Nilo jawiran umanacapajj wañt'jjaniwa,

k'ala wañaraquiw tucuwayjjani;

6uma k'awanacasti wal thujsani.

Egipton jalir umanacasti juc'at juc'atwa wañt'awayjjani,

uca uma jac'an utjir alinacas wañsuwayjjaraquiniwa;

7Nilo jawira lacan utjir alinacasa,

uqhamaraqui uca jac'an take yapunacasa k'alaw wañsuwayjjaraquini,

janiw mayampis utjcjjaniti.

8Qhitinacatejj Nilo jawiran chawlla catupjjerïcän ucanacas walracwa jachapjjani, jaqhusipjjaraquini;

känanacap umar jakontirinacasti wal llaquisipjjaraquini.

9Lino telanac irnakerinacasa mayjt'ataw jicjjatasipjjani;

tela sawurinacasa, uca tela chhajjririnacasa llaquisipjjaniwa.

10Tela sawurinacas wali chuyma cawcst'ataw uñjasipjjani,

take irnakerinacasa wali mayjt'ataw uñjasipjjaraquini.

11¡Zoanan jilïrinacapa, cunja lokhëpjjtasa jumanacajja,

Egipton suma amuyt'ayirinacapasa,

ucampisa uca amuyt'ayirinacajj lokhe amuyt'irinacawa!

¿Cunjämrac faraonarusti sapjjesti:

“Nanacajj wali yatiñan jakenacan wawanacapäpjjtwa,

nayra reyinacan wawanacapäpjjtwa” sasasti?

12¿Faraón, cawquincaraqui juman yatiñan jakenacamasti.

Jumar yatiyañataqui uqhamaraqui khanañchañataqui,

cuntejj take ch'amani Tatitojj Egiptotaqui amtqui ucanacsti?

13Zoananquir jilïrinacajj wali lokhenacawa,

Menfisanquir jilïrinacas sallkjayasipjjaraquiwa,

provincianacan jilïrinacapasti Egiptorojj pantat thaquinjamwa irpapjje.

14Tatituw jupanacjjaru churi pantjayiri ajayunaca;

jupanacasti Egiptorojj pantat thaquinjamwa irpapjje, take cuna lurañapansa,

cunjämatejj mä machat jakejj wak'jasi, liwinaktaraqui uqhama.

15Jan qhitis p'ekëpati, janiraqui wich'inqhäpasa,

palmera alïpasa jan ucajj sokosa alïpasa,

janipuniw Egiptotaquejj cunsa lurirjamäpcaniti.

16Uca urunjja Egipcio jakenacajj warminacjamaw tucjjapjjani, wal ajjsarapjjani qhathatipjjaraquiniwa take ch'amani Tatitur jupanac toke sartir uñjasajja.

17Egipcio jakenacajj Judá marcataquejj qhathatipjjaniwa; sutip amtasaquiw qhathatjjapjjani. Take ch'amani Tatitun Egipto marcatac amtatanacap yatisasti wal qhathatipjjani.

18Uca urunacasti Egiptonjja pheska marcanacaw utjani hebreo aru parlirinacajja, jupanacasti take ch'amani Tatituncañwa juramentompi arsupjjani. Uca marcanacat maynïristi Inti Marca satäniwa.

19Egiptonsti uca urunjja mä altaraw utjaraquini Tatitur loktata, korpanacap jac'ansti mä kalaraquiw sayt'ayatäni Tatitutac sata.

20Uca kalasti Egipto marcanquir jakenacajj take ch'amani Tatitut amtasipjjañapataqui uscutäniwa. Cunapachatejj jupanacajj Tatitut yanapa mayisipjjani jupanacar nuwirinacat arjjatañapataqui, ucapachasti Tatitojj jupanacataquejj mä khespiyiri qhitanini, jupanacar arjjatañapataqui, uqhamaraqui khespiyañapataqui.

21Tatitojj egipcio jakenacampejj uñt'ayasiniwa, jupanacasti Tatiturojj catokapjjaraquiniwa juparuquiraquiw uñt'asipjjani, sutipjjaru culto lurapjjaraquini, sacrificionaca, ofrendanac loktapjjaraquini. Tatiturusti arsüwinacwa arsupjjani, uca arsutanacaparusti phokhapjjaraquiniwa.

22Tatitojj Egipto marcarojj chhojjrinchrantaniwa, ucatsti c'umara tucuyaraquini. Jupanacasti Tatituruw maqhatjjapjjani, Tatitusti jupanacatjja qhuyapt'ayasiniwa kolljjataraquiniwa.

23Uca urunsti mä jach'a thaquiraquiw utjani Egiptot Asiria marcacama. Asirio jakenacasti Egiptoruw purinipjjani, Egipcio jakenacasti Asiriaruraqui, Asirianquir jakenacasa Egiptonquir jakenacasa mayaquiw Tatiturojj yupaychapjjani.

24Uca urunsti Israel marcajj Egiptompi Asiriampiw chicachasini, ucatsti aca oraketaquejj Israelajj mä bendicionäniwa.

25Take ch'amani Tatitusti jupanacarojj bendiciraquiniwa aqham sasa: “Nayaw bendista Egipto marcajjarojja, Asiria marcasti nayan uscutawa, Israelasti nayan marcajjawa, nayaw jupanacarojj bendista” sasa.