Apocalipsis 12 - Aymar Bibliia 1986

Warmimpi dragón sat animalampi

1Alajjpachansti mä jach'a uñacht'äwiw uñstäna. Mä warmiwa intin llawuntata uñstäna, phajjsisti cayunacapancaraquïnwa, p'ekeparusti mä coronampi asjjatataraquïnwa, uca coronansti tunca payani warawaranacaw utjäna.

2Aca warmisti usurïnwa, partompiraquiw warariscäna, wawachañataquist wali t'akhesiraquïna.

3Ucatsti yakha uñacht'äwiraquiw alajjpachanjja uñstäna: Mä jach'a dragón sat wila animalaraquiw uñstäna: ucasti pakallko p'ekenïnwa, tunca wajjran cuna, sapa p'ekerusti mä coronan asjjatata.

4Wich'inqhapampisti quimsïri partwa alajjpach warawaranacjja onjjtayäna, ucatsti orakeruraquiw willirtayanïna. Aca dragonasti uca wawachasiri warmin nayräjjaparuw sayt'asi, uca wawar ucspacha mank'antañataqui.

5Uca warmisti mä yokall wawa wawachasïna. Uca wawasti acapach orake apnakani, takpach marcanacaru wali khoru cancañampiw apnakani. Wawapasti ucspachaw apakatäjjäna, Diosan tronoparu uqhamarac quipca Dios nayräjjaruw apatäjjäna.

6Warmisti wasararuw jaltjjaraquïna, cawqhantï Diosajj jupataqui mä cheka waquichcatayna ucqharu. Uca wasaransti waranka pä pataca sojjta tuncan uruwa juparu mank'ayapjjani.

7Ucatsti mä jach'a nuwasiñaw alajjpachanjja utjäna. Arcángel Miguelasti angelanacapampi sayt'asisinjja uca dragonampiw nuwasïna. Dragonampi angelanacapampisti sayt'asipjjaraquïnwa,

8ucampis janiw atipjapcänti, alajjpachansti utjañanacajj janiw jupanacataquejj utjcjjänti.

9Uqhamajj uca dragonajj jakonucutäjjänwa alajjpachatjja. Uca dragonapï nayrapacha uca jach'a catarïnjja, ucasti Supaya, Satanás sataraquiwa, juparaquiw aca oraken jakenacarojj wali sallkjañanac luri. Jupampi angelanacapampisti aca orakeru jaktanitäjjapjjänwa.

10Ucatsti mä jach'a aru alajjpachat ist'ta aqham siri:

“Purinjjewa Diosasan khespiyasiñapajja, munañanïñapasa, jupan apnakañapasa, Jesucristona munañapampi apnakañapasa.

Jilanacasaru c'arintasa juchañchirïqui ucasti ucatjja jaksutäjjewa, jupasti uruy arumaraquiwa, jilanacasarojj Dios nayrakatan juchañchäna.

11Jupanacasti Corderon jiwatap laycuwa atipjapjje, uqhamarac cuna cheka arunactejj jupjjat parlapcänsa uca laycuraqui.

Janiraquiw jiwañsa ajjsarapcänti, jiwañataquisa janc'aquïpjjaraquïnwa.

12Alajjpachanacasti ucan utjirinacasa cusisipjjam.

Ucampis, ¡wali llaquisiñaraquiw oraken uqhamarac kotan utjirinacataquejja!

Supayasti jumanacan ucaruw wali colerat juti, tiempopan juc'aquïtapa yatisina” sasa.

13Uca dragonasti orakeru jakonucuta uñjasjjasinjja, wawachascänsa uca warmiruwa arcnakäna.

14Ucampis warmirojj jach'a pacan pä chhekhanacapaw churatäna, uqhamata uca chhekhanacampi wasararu jaltjjañapataqui uca cataritsa jayaru, cawqhantï quimsa mara chicani mank'ayapcani ucqharu.

15Uca cataristi lacapatjja umwa mistuyäna mä jawirjama, uqhamat warmiru uca jawirampi apayañataqui.

16Ucampis orakeraquiw warmirojj yanapt'äna, orakesti jist'artänwa, dragonajj lacapat um apscatayna uca umasti ucaruquiw chhakjjäna.

17Uc uñjasasti dragonajj wal colerasïna, ucatsti warmin mayni wawanacapampi nuwasiriw saräna, qhitinacatejj Diosan camachiparu jaysapqui, uqhamarac Jesucriston arunacaparus jaysapcaraqui ucanac contra.

18Uca dragonasti kota lacjjaruw sayt'asïna.