Josué 9 - Aymar Bibliia 1986

Gabaonita jakenacampi arust'äwi

1Cawquïri reyinacatï Jordán jawirat inti jalanta token jacapcäna, uqhamaraqui kollu tokenacana, pampa tokenacana, jach'a Mediterráneo sat kota lacansa, Líbano tokecama; hitita sat reyinaca, amorreonaca, cananeonaca, ferezeonaca, heveonaca, jebuseonaca, ucanacajj yatipjjänwa take cunanacatejj lurascäna ucanaca.

2Uca reyinacasti mä amtäwiruw mantapjjäna: Josué chachampi Israel marcampi nuwasiñataqui.

3Ucampisa gabaonita jakenacajj sumwa yatipjjäna cunjamtï Josué chachajj lurcatayna Jericó marcampejja uqhamaraqui Hai sat marcampisa ucanacjja,

4jupanacajj Israel marcaru mä sallka lurañ amtapjjäna. Ucatwa gabaonit jakenacajj asnonacaparu thantha costalanac, uqhamaraqui lip'ichit lurat vino imañ thantha wayakanaca, take cunsa thanthacamaqui apjjarusinisaw jutapjjäna,

5uqhamaraquiw cayunacaparojj wali thantha wisqhunac uchasiwayapjjäna, isinacapasa wali thantharaqui uqhamarac wali rimt'ata. Mank'añataquisti kholu t'ant'anaca, uqhamaraqui korwantata t'ant'anac apasipjjäna.

6Cunapachatejj gabaonit jakenacajj Gilgal sat israelitanacan campamentopar puripjjän ucqhajj, jupanacajj aqham sasaw Josué chacharojj sapjjäna:

—Nanacajj wali jaya oraket jutapjjta, jichhasti jumanacampi mä suma amtäwiruw mantañ munapjjta —sasa.

7Ucatsti israelit jakenacajj jupanacarojj sapjjänwa:

—Inas jumanacajj aca jac'anacan jacasipcsta; ¿Cunjämaraqui jumanacampi mä suma amtäwiru mantsnasti? —sasa.

8Gabaón marcat jutir jakenacasti Josué chacharojj aqham sapjjaraquïnwa:

—Nanacasti juman sirvirinacamaw tucupjjä —sasa.

Ucatwa Josué chachajj jupanacaru jisct'äna:

—¿Qhitïpjjaracta jumanacasti, cawqhatsa jutapjjaracta? —sasa.

9Jupanacasti sapjjänwa:

—Nanacajj wali jaya marcat jutapjjta. Diosaman jach'a ch'amanïtap yatipjjta, cuntï Egipto marcampejj lurcatayna ucsa yatipjjaractwa, ucat jichhajj jutapjjta,

10uqhamaraqui cunjämtï lurcatayna uca pani amorreon reyipampisa, cawquïrinacatï Jordán jawir qhurcatan jacapcän ucanacampi, Hesbón sat marcan reyipa Sehón sutini; uqhamaraqui Basán marcan reyipa ucasti Og sutiniraqui, cawquïritï Astarot sat oraken jaccäna ucaru —sasa.

11—Ucatwa nanacan jilïri jakenacajjajj sapjjetu: Sarapjjam, mank'añ thaquitac apasipjjam, ucatsti jicjjatañcam sarapjjaraquim, aqham sapjjaraquim: “Nanacasti jumanacan sirvirimaw tucupjjä, jichhasti mä suma amtäwiruy mantañäni” sasa.

12Cuna urutï nanacajj jumanacar thakheri utanacajjat mistunipjjta ucqhajj uca t'ant'anacajj wali junt'üscänwa, jichhasti uñjapjjamay liju kholuntata uqhamarac korwantata,

13uqhamaraqui uñjapjjam aca lip'ichi wayakanaca, wali machakäsipcänwa cunapachatï vino uscunipcta ucqhajja, jichhasti liju thanthawa; wisqhunacajjas, isinacajjas sartanipcta ucqhajj machakäsipcänwa, jichhasti k'ala thanthawa wali jayat jutapjjatajj laycu —sasa.

14Israelit jakenacajj uca gabaonit jakenacan mank'apjja mallt'apjjänwa, ucampis janiraquiw Diosarojj jisct'asipcänti.

15Ucatsti Josué chachajj uca jakenacampejj mä suma amtäwiruw jan nuwasiñatac mantäna, uqhamaraquiw juramentompi uca jakenacarojj jacañanacap perdonäna, take Israel marcan jilïrinacapas uqhamaraqui.

16Quimsa urunac pasipanjja israelitanacajj acatjamat yatipjjäna uca Gabaón marcajj jupanacan jac'ancaquitapa, uqhamaraqui uca jac'anacan jacapjjatapa.

17Ucatsti israelit jakenacajj Gabaón marcar puriñcamaw sarapjjäna, quimsa urunjja puripjjänwa gabaonitanacan marcaparojja cawquïrinacatï Gabaón, Cafira, Beerot, Quiriat-jearim sutinïna uca marcanacaru.

18Ucampis israelitanacajj purisinjja janiw jiwarayapcänti jan ucasti jacañanacapjja perdonapjjänwa Gabaón marcanquir jakenacarojja, Israel marcanquir jilïrinacajj Dios nayrakatan juramento lurapjjatap laycu jacañanacap perdonañataqui.

Uqham uñjasinjja take Israel jakenacajj wal colerasipjjäna jilïrinacataquejja.

19Ucatwa Israelan jilïri jakenacapajj sapjjäna:

—Nanacasti Dios nayräjjana juramento lurapjjta; janiw jichhajj jiwayapquiristti ni cunsa lurapcaraquiristti.

20Jichhasti jaytañäni jupanacar jacaskiri, jan arunacasar phokcañäni ucqhajj Diosaw jiwasanacataquiw colerasispa —sasa.

21Uqhamaw Israel marcan jilïri jakenacapajj jacañanacap perdonapjjäna Gabaón marcat jutir jakenacarojja, ucatsti lawa apanirita, uma apanirita take marcpachataqui uchasipjjäna, uqhamat juramento luratanacap phokhapjjaraquïna.

22Ucatjja Josué chachajj gabaonit jakenacar jawsasinwa jisct'äna:

—¿Cunatarac nanacar sallkjapjjesta wali jayat jutapjjta sasa? Jumanacajj chekpachansa aca pachpan jacapjjtajja,

23ucatwa jichhajj jumanacajj nanacan maldicitäpjjäta, ucatjja wiñayaw sirvientenacajjat sarnakapjjäta, ucatsti lawa ch'iyanipjjäta, uma apanipjjaraquïta Diosan utapataqui —sasa.

24Gabaonanquir jakenacajj Josué chacharojj sapjjänwa:

—Nanacasti ucjja lurapjjtwa jumar ajjsarasina, juman jan nanacaru jiwayañamataqui. Nanacasti yatipjjtwa cuntejj jumanacan Diosamajj Moisesarojj sawaycatayna ucjja: “Take aca marcanac jumanacar catuyapjjäma ucatsti jumanacajj takpach t'unjapjjäta” sasa.

25Jichhasti nanacajj juman amparamancapjjtwa, nanacampisti cunjämtejj munta uqhamar luram —sasa.

26Ucatsti Josué chachajj janiw israelit jakenacan gabaonit jakenacaru jiwayañap muncänti,

27ucampis uca Gabaón marcat jutir jakenacajj lawa, uma apanirit uscutäpjjänwa Israel marcataqui, uqhamarac Diosan altarapataqui, cawqharutï Diosajj uchasiñ muncän ucqharu. Jichhürcamaw gabaonita jakenacajj uc lurasipqui.