Isaías 24 - Aymar Bibliia 1986

Taripäwejj take aca orakpachataqui

1Uñtapjjam, Tatitojj aca orakjja tucjaniwa,

k'al tucjani alliquiparaquiniwa,

jakenacarusti ucsar acsaruw willitataraquini.

2Sacerdotetaquisa, jakenacataquisa mayaquïniwa,

utanitaquisa esclavotaquisa,

utanitaquisa, esclavataquisa,

alasiritaquisa, aljasiritaquisa,

mayt'iritaquisa, mayt'asiritaquisa,

mant'asiritaquisa, mant'iritaquisa.

3Orakejj k'ala tucjatäniwa,

k'ala lunthatjataraqui.

Take acanacwa Tatitojj saraqui.

4Orakejj wañsuwayjjewa ancuntjjaraquiwa,

take acapacharaquiwa k'al wañsjje, ancuntjjaraqui,

alajjpachas, acapachas wali llaquitaraquiwa.

5Orakesti jakenacampi taquisitawa,

leyinacsa apanucupjjaraquiwa,

camachinacsa janiw phokhapcaraquiti,

Tatitun wiñayatac arust'äwipsa t'unapjjaraquiwa.

6Ucatwa jichhajj maldicionajj aca orakjja tucji,

jakenacapasti jichhajj mutuyäwi catokapjjaraqui.

Ucatwa jichhajj jakejj tucusjjaraqui,

juc'aniquiraquiw kheparjje.

7Vinojj pist'jjewa uva yapunacas usutaraquiwa,

qhitinacatejj c'uchiqui jacasipcän ucanacajj jichajj llact'atäpjjewa.

8Tamboranacampi, arpanacampi cusisiñas tucusjjewa,

ojjoñanacasa, cusisiñanacasa tucusjjaraquiwa.

9Janiw jichhajj k'ochuñanacamp chica vino umañajj utjcjjaniti;

umañanacas umirinacataquejj c'allc'uw tucjjani.

10Jan wali sarnaker marcajj jichhajj k'ala aynacht'atawa,

janiraquiw mä utarus mantañjamäquiti.

11Jakenacasti callenacan jachapjjaraqui vinon pist'atapatjja;

take cusisiñasti jiwt'awayjjaraquiwa,

aca oraketsti apanucutäjjaraquiwa.

12Marcasti k'ala aynacht'atapuniwa,

puncupas k'ala jisc'a jisc'a tucjatawa.

13Uqhamaraquïniwa aca oraken utjiri take marcanacampejja,

cunjämatejj thalsuta aceitunanacajj williratajj uqhama,

jan ucajj uva k'ala thaksutajja uqhama,

cunapachatejj cosechajj tucusjje ucqhajja.

14Kheparirinacasti cusisiñat arnakasipjjani,

inti jalanta toketpachwa arnakasinipjjani

Tatitun jach'a cancañap uñjasajja.

15Inti jalsu tokensa,

jach'a kota taypin utjir marcanacatsa,

Tatituruw jach'achapjjani, Israelan Diosaparu.

16Orake tucusitpacharacwa cantatanacapajj ist'asi:

“Asqui jakejj jach'ar aptatäpan” sasa.

Ucampis nayajj saractwa: “¡Ay cunas acajja, ay cunas acajja!

¡Ch'ojjña lurir jakenacasti jach'a ch'ojjñpin lurapjje!”

17Aca oraken jaquir jakenacasti jiwayañ animalanacjam arcnakatäniwa,

jan ucajj mä jach'a p'iyaru jan ucajj sipitar jalt'irjamäniwa.

18Jiwayirinacat jaltirejja, p'iyaruw jalantani,

uca p'iyat misturisti sipitaruraquiw jalt'ani.

Alajjpachatsti walipuniw jallojj purinini,

aca oraken cimientonacapas qhathatipjjaraquiniwa.

19Orakesti ajjsarcañaw qhathatini,

qhathatisinsti jisc'a jisc'aw tucusiraquini.

20Mä machat jakjamaw qhathatini,

mä thantha chhujllar uñtataw qhathatini.

Juchanacapasti jupjjarojj walpun jatjjattaraquini,

liwisiniwa, ucatsti janiraquiw mayampsa sartjjaraquiniti.

21Uca urunsti Tatitojj mutuyaniwa,

alajjpachan utjir ch'amaninacarojja, uqhamaraqui aca orakenquir reyinacarusa;

22mayjaruw tantachthapini, ucatsti mä calabozoruw jakontaraquini,

ucanwa carcelt'ata uñjasipjjani,

jaya maranacatwa mutuyascaraquini.

23Cunapachatejj take ch'amani Tatitojj reyjama take cunsa lurcan ucqhajj Sión kollunsa, Jerusalén marcansa,

ucapachasti intis phajjsis ch'amact'aniwa,

marcapanquir jilïrinacasti Tatitun jach'a cancañapwa uñjapjjaraquini.