Deuteronomio 20 - Aymar Bibliia 1986

Guerra leyinaca

1“Cunapachatejj jumanacajj uñisirinacamampi nuwasiñatac mistuwayapjjäta, ucatsti uñjapjjäta jupanacarojj soldadonacapa caballonacar lat'jjatata, nuwasiñ carronacani, uqhamaraqui ejercitopas jumanacat sipansa juc'ampi waljani, ucapachajj jan jupanacaru ajjsarapjjamti; Egipto marcat irpsunipctam uca Tatitu Diosamaw jumanacampïsqui.

2Cunapachatejj nuwasiñ horasajj purinini ucqhajj sacerdotejj takpach ejercitoruw parlani,

3aqham sasa: ‘Ist'apjjam israelit jakenaca; jichhüruwa uñisirinacamampi nuwasipjjäta. Jan jumanacajj mayjt'asipjjamti, janirac ajjsarapjjamsa; janiraqui qhathatipjjamti ni sustjasipjjamsa,

4jan ucasti jumanacan Tatitu Diosamaw jumanacampïsqui; ucatsti jupaw uñisirinacamampi nuwasiscani, jupanacarusti atipjapjjaraquïtawa’ sasa.

5“Ucjjarusti oficialanacaruw parlaraquini, aqham sasa: ‘Cawquïritejj jumanacata mä machak uta utachasqui, ucatsti janiraqui uca utan jaccchiti, ucasti sarjjpan utaparu, inampis jupajj guerran jiwaspa ucatsti yakha jakequi uca utapan utjasjjaspa.

6Uqhamaraqui cawquïritejj jumanacat uvanac yapuchani, ucatsti janiraqui ucanacatjja mank'anquiti, ucasti sarjjpan utaparu, inampis jupajj guerran jiwaspa, uqhamata yakha jakequi uca uvanacapat mank'jjaspa.

7Uqhamaraqui cawquïritejj casarasiñataqui parlatanïchi, ucatsti janiraqui casarascchiti, ucajj utapar sarjjpan, inampis guerran jiwaspa ucatsti yakhaqui parlatapampejj casarasjjaspa’ sasa.

8“Ucatsti oficialanacajj wastatwa ejercitorojj parlapjjani aqham sasa: ‘Cawquïritejj jumanacat ajjsarasqui, mayjt'atäscaraqui ucanacasti utapar sarjjapjjpan jan mayni jilanacapar llajllasiyañapataqui’ sasa.

9Cunapachatejj oficialanacajj parlañ tucuyjjapjjan ucqhajj, capitananacaw ejerciton nayrakataparu sayt'asipjjani.

10“Cunapachatejj jumanacajj mä marcaru nuwantañatac jac'achasipjjäta ucqhajj, nayrakatajj sumancañjjatwa parlapjjäta,

11ucatsti uca marcanquir jakenacatejj sumancaña munapjjani, marcarusa mantayapjjaraquïtam ucapachasti jupanacarojj wali ch'ama irnakañanac lurayasaw sirviyasipjjäta.

12Ucampis jumanacampitejj jan sumancañ munapcani, ucatsti nuwasiña kalltapjjani ucqhajj, jumanacajj marcar muyuntasinwa nuwantapjjäta.

13Tatitu Diosamaw amparanacamar catuyapjjtam, uqhamaw jumanacajj take jakenacapar jiwarayapjjäta.

14Take warminaca, wawanaca, uywanaca, take cunatejj marcan utjqui ucanacaw jumanacancani, ucatsti uñisirinacamat aparanipcta ucanacatwa Tatitu Diosamajj mank'ayaraquïtam.

15Uca pachparacwa jumanacajj lurapjjäta cawquïri marcanacatejj jumanacat jayancapqui ucanacarojja, janiraquiw uca marcanacarus jakcattapjjätati.

16Ucampis Tatitu Diosamajj churctam uca oraken marcanacapanjja janiw cunsa jacasquir jaytapjjañamäquiti,

17jan ucasti takwa jan cunani t'unjanipjjañama, Tatituru sacrificio loktapcasmas uqhama; hititanacaru, amorreonacaru, cananeonacaru, ferezeonacaru, heveonacaru, jebuseonacaru, cunjämtejj Diosajj sawayapctam uqhama.

18Uqhamata jan jumanacar uca ajjtascañ sarnakäwinacap yatichañapataqui, cunjämtejj diosanacaparu yupaychapqui, Tatitu Diosam contra jucha lurayasa.

19“Cunapachatejj jumanacajj mä marcar muyuntasin walja urunaca jarc'antapjjät ucapachajj, jan jumanacajj kokanacapjja hachampi tincurayapjjamti jan ucasti jumanacajj achunacapjja mank'apjjätawa; ucanacasti pampanquir kokanacäpjjewa, janiw arsusipcaspati jumanacan phat'antatajja.

20Ucampis tincurayapjjasmawa cawquïri kokanacatejj jan frutanac achurïqui ucanacjja, uqhamaraqui cawquïri lawanacapatejj marcaru muyuntañatac munapjjasma ucanacjja, uca marcanacan t'unjatäñapcama.