PINADAYAG 10 - Cebuano Form-Based Bible (2011)

Ang Anghel ug ang Gamayng Basahon nga Linukot

1Unya nakita nako ang laing gamhanang anghel nga nanaog gikan sa langit, sinul-oban ug panganod, ug dihay bangaw sa iyang ulo. Ang iyang nawong sama sa adlaw, ug ang iyang mga bitiis sama sa mga haligi nga kalayo.

2Sa iyang kamot dihay binukhad nga usa ka gamayng basahon nga linukot. Ug ang iyang tuo nga tiil diha sa dagat, ug ang iyang wala nga tiil diha niya itunob sa yuta,

3ug siya misinggit sa kusog nga tingog sama sa usa ka liyon nga nagngulob, ug sa pagsinggit niya, mitingog ang pito ka dalugdog.

4Ug sa nakatingog na ang pito ka dalugdog, isulat ko na unta kini, apan akong nadungog gikan sa langit ang usa ka tingog nga nag-ingon, “Timan-i ang gisulti sa pito ka dalugdog, ug ayaw kini isulat.”

5Ex. 20:11; Deut. 32:40; Dan. 12:7; Amos 3:7. Ug ang anghel nga akong nakita nga nagtindog sa dagat ug sa yuta mibayaw sa iyang tuong kamot ngadto sa langit

6ug nanumpa pinaagi niadtong buhi hangtod sa kahangtoran, nga mao ang nagbuhat sa langit ug sa mga anaa niini, sa yuta ug sa mga anaa niini, ug sa dagat ug sa mga anaa niini, nga dili na gayod langanon pa,

7apan sa mga adlaw sa pagpatingog sa trumpeta sa ikapitong anghel, tumanon na gayod ang misteryo sa Dios, sumala sa iyang gipahibalo ngadto sa iyang mga sulugoon nga mao ang mga propeta.

8 Ezek. 2:8–3:3. Unya ang tingog nga akong nadungog gikan sa langit misulti kanako pag-usab nga nag-ingon, “Lakaw, kuhaa ang basahong linukot nga gibukhad nga anaa sa kamot sa anghel nga nagtindog sa dagat ug sa yuta.”

9Busa miadto ako sa anghel ug giingnan nako siya nga ihatag niya kanako ang gamayng basahon nga linukot, ug siya miingon kanako, “Kuhaa kini ug kan-a. Pait kini sa imong tiyan apan sa imong baba tam-is kini sama sa dugos.”

10Ug gikuha nako ang gamayng basahon nga linukot gikan sa kamot sa anghel ug ako kining gikaon, ug sama sa dugos tam-is kini sa akong baba apan sa gitulon na nako kini ang akong tiyan mibati sa kapait.

11Ug sila misulti kanako, “Kinahanglang maghimo ikaw pag-usab ug propesiya mahitungod sa daghang mga tawo ug mga nasod ug mga pinulongan ug mga hari.”

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help