SALMO 61 - Cebuano Form-Based Bible (2011)

Pag-ampo Aron PanalipdanNgadto sa pangulong musikero: uban sa mga tulunggon nga may kuwerdas. Salmo ni David.

1Pamatia ang akong pagtuaw, O Dios,

patalinghogi ang akong pag-ampo;

2gikan sa kinatumyan sa yuta nagtuaw ako kanimo,

sa diha nga ang akong kasingkasing luya na.

Dad-a ako ngadto sa bato

nga habog pa kay kanako;

3kay ikaw mao ang akong dalangpanan,

usa ka lig-ong tore batok sa kaaway.

4Papuy-a ako diha sa imong puluy-anan hangtod sa kahangtoran!

Modangop ako diha sa silonganan sa imong mga pako. Selah.

5Kay ikaw, O Dios, nakadungog sa akong mga panaad;

ikaw naghatag kanako sa

panulundon niadtong mga may kahadlok sa imong ngalan.

6Lugwayi ang kinabuhi sa hari;

molungtad unta ang iyang katuigan ngadto sa tanang kaliwatan!

7Maghari unta siya hangtod sa kahangtoran atubangan sa Dios;

himoa nga ang gugmang walay paglubad ug pagkamatinumanon magbantay kaniya!

8Sa ingon niini mag-awit ako ug mga pagdayeg sa imong ngalan kanunay,

sa dihang magtuman ako sa akong mga panaad matag adlaw.