ISAIAS 46 - Cebuano Form-Based Bible (2011)

1Si Bel nagyukbo, si Nebo nagduko,

ang ilang mga diosdios anaa sa ibabaw sa mga mananap ug sa kahayopan

ang mga butang nga inyong gidala nangahimong

kabug-at sa gikapoyan nga mga mananap.

2Sila nangduko, sila nangyukbo sa tingob;

sila dili makaluwas sa palas-anon,

apan ang ilang kaugalingon nangahimong mga binihag.

3“Pamati kanako, O balay ni Jacob,

ang tanan nga salin sa balay ni Israel,

kadtong akong gisapnay gikan sa pagkahimugso,

gikugos gikan sa tagoangkan;

4bisan hangtod sa imong katigulangon ako mao siya,

ug bisan hangtod sa pagkaubanon sa buhok ako mag-agak kaninyo;

ako nagbuhat ug ako magpas-an;

ako magpas-an ug magluwas.

5“Kang kinsa man ninyo ako ipakasama ug itupong,

ug itandi aron nga kami mahimong sama?

6Kadtong nag-usik sa bulawan gikan sa sudlanan sa salapi,

ug nagtimbang ug plata sa timbangan,

nagsuhol sa usa ka tigsalsal ug bulawan, ug siya naghimo niini nga usa ka dios;

unya sila nangyukbo ug nagsimba!

7Ila kining gipas-an, ila kining gidala,

gipahimutang nila kini sa iyang dapit, ug kini nagtindog didto;

gikan sa iyang dapit kini dili makabalhin.

Kon ang tawo mosangpit niini, dili kini motubag,

o moluwas kaniya gikan sa iyang kalisdanan.

8“Hinumdomi kini ug pamalandongi,

ipasantop kini sa hunahuna, kamong mga malapason,

9hinumdomi ang unang mga butang sa kakaraanan;

kay ako mao ang Dios, ug wala nay lain;

ako mao ang Dios, ug wala nay lain nga sama kanako,

10nagpahayag sa kataposan gikan sa sinugdan,

ug gikan sa karaang mga panahon mga butang nga wala pa mahimo,

nga nag-ingon, ‘Ang akong tambag magpadayon,

ug himoon nako ang tanan nakong katuyoan,’

11nagtawag sa usa ka langgam nga manunukob gikan sa silangan,

sa tawo nga motuman sa akong katuyoan gikan sa usa ka layo nga yuta.

Ako nagsulti ug ako magtuman niini;

ako nagtinguha, ug ako magbuhat niini.

12“Pamati kanako, kamong gahi ug kasingkasing,

kamo nga mga layo sa kaluwasan:

13Gidala nako sa duol ang akong pagluwas,

kini dili malayo, ug ang akong pagluwas dili maglangan;

ako magpahiluna ug kaluwasan diha sa Zion

alang sa Israel nga akong himaya.”