MGA TAGA-ROMA 7 - Cebuano Form-Based Bible (2011)

Panig-ingnan Diha sa Panagtiayon

1Wala ba kamo masayod, mga igsoon,—kay ako nakigsulti man karon sa mga tawo nga nahibalo sa Balaod—nga ang Balaod maggahom lamang sa tawo samtang buhi pa siya?

2Tungod niini, ang babayeng minyo nabugkos sa Balaod ngadto sa iyang bana samtang buhi pa kini. Apan kon mamatay ang iyang bana, siya nakalingkawas na gikan sa Balaod mahitungod sa bana.

3Sumala niini, siya isipon nga mananapaw kon makigpuyo siya ug laing lalaki samtang buhi pa ang iyang bana. Apan kon mamatay ang iyang bana, makalingkawas na siya sa maong balaod ug kon mamana siya ug lain dili siya usa ka mananapaw.

4Sa ingon usab niana, mga igsoon, kamo nangamatay na ngadto sa Balaod pinaagi sa lawas ni Cristo, aron maangkon kamo sa lain, ngadto kaniya nga nabanhaw gikan sa mga patay aron mamunga kita alang sa Dios.

5Kay samtang diha pa kita sa unod, ang atong makasasala nga pangibog nga pinaagi sa Balaod naglihok sulod sa atong lawas aron mamunga ngadto sa kamatayon.

6Apan karon gipalingkawas na kita gikan sa Balaod, mga patay na kita ngadto sa nag-ulipon kanato aron mag-alagad kita diha sa pagkabag-o diha sa Espiritu ug dili ilalom sa karaang sinulat.

Ang Balaod ug ang Sala

7 Ex. 20:17; Deut. 5:21. Busa unsa may atong isulti? Nga ang Balaod sala? Dili gayod! Gani, kon wala pa ang Balaod, dili unta ako makaila sa sala. Dili unta ako makaila unsay pangibog kon ang Balaod wala pa mag-ingon, “Dili ka mangibog.”

8Apan ang sala, sa dihang nakakita ug higayon diha sa kasugoan, naghimo sa tanang matang sa pangibog dinhi sa sulod nako. Kay ang sala patay kon wala ang Balaod.

9Buhi ako kaniadto nga wala pay Balaod, apan sa pag-abot sa kasugoan, ang sala nabuhi ug ako namatay.

10Ang maong kasugoan nga nagsaad ug kinabuhi namatud-an nga kamatayon alang kanako.

11Gen. 3:13. Kay ang sala, sa dihang nakakita ug higayon diha sa kasugoan, milimbong kanako ug pinaagi niini mipatay kanako.

12Busa ang Balaod balaan, ug ang kasugoan balaan, matarong, ug maayo.

13Busa nahimo ba diay nga kamatayon kadtong maayo? Dili unta kana mahitabo! Ang sala mao ang naghimo ug kamatayon dinhi sa sulod nako pinaagi sa maayo, aron ang sala ikapadayag ingon nga sala. Ug pinaagi sa kasugoan kini mamatud-an nga hilabihan gayod kangil-ad.

Panagsumpaki Sulod sa Tawo

14Kay kita nahibalo nga ang Balaod espirituhanon apan ako unodnon, gibaligya ilalom sa sala.

15Gal. 5:17. Dili ako makasabot sa akong kaugalingong panglihok. Kay wala nako buhata ang buot unta nakong buhaton, mao hinuoy gibuhat nako ang butang nga akong gidumtan.

16Apan kon ang dili nako buot buhaton maoy akong gibuhat, uyon ako nga ang Balaod maayo.

17Sa ingon niana, dili na ako ang nagbuhat sa maong butang kondili ang sala nga nagpuyo sa sulod nako.

18Kay nahibalo ako nga walay maayo nga nagpuyo sa sulod nako, nga sa ato pa, sulod sa akong unod. Ania kanako ang pagtinguha sa maayo, apan dili ako makabuhat niini.

19Kay wala nako buhata ang maayo nga akong gitinguha, apan ang daotan nga wala nako tinguhaa maoy akong gibuhat.

20Karon, kon maoy akong gibuhat ang butang nga wala nako tinguhaa, dili na ako mao ang nagbuhat niini kondili ang sala nga nagpuyo sa sulod nako.

21Busa nasuta nako kini ingon nga usa ka balaod, nga sa dihang buot na nakong buhaton ang matarong, ang daotan magpaduol kanako.

22Kay sa kinasuloran sa akong pagkatawo gikalipay nako ang balaod sa Dios,

23apan dinhi sa mga bahin sa akong lawas nakita nako ang laing balaod nga nakig-away batok sa balaod sa akong salabotan ug naghimo kanako nga binihag ngadto sa balaod sa sala nga nagpuyo sulod sa mga bahin sa akong lawas.

24Alaot ako nga tawo! Kinsay moluwas kanako gikan niining lawas nga iya sa kamatayon?

25Salamat sa Dios pinaagi kang Jesu-Cristo nga atong Ginoo! Busa pinaagi sa akong salabotan ako gayod nag-alagad sa balaod sa Dios apan diha sa akong lawas ako nag-alagad sa balaod sa sala.