JOB 29 - Cebuano Form-Based Bible (2011)

Ang Kataposang Tubag ni Job

1Unya si Job mipadayon sa iyang pakigpulong ug miingon:

2“O, mahisama unta ako niadtong unang mga bulan,

niadtong unang mga adlaw sa diha nga ang Dios nagbantay pa kanako;

3sa diha nga ang iyang suga nagdan-ag ibabaw sa akong ulo,

ug pinaagi sa iyang kahayag nalatas nako ang kangitngit;

4sama niadtong diha pa ako sa mga adlaw sa akong pagkamauswagon,

sa diha nga ang pakighigala sa Dios nagpuyo pa sa akong tolda;

5sa diha nga ang Labing Gamhanan uban pa kanako,

ug ang akong mga anak nag-alirong kanako;

6sa diha nga ang akong mga lakang gihugasan ug gatas,

ug ang bato nagpaagas alang kanako ug mga sapa sa lana!

7Sa diha nga moadto ako sa ganghaan sa siyudad,

sa dihang mag-andam ako sa akong lingkoranan diha sa dalan,

8ang mga batan-ong lalaki makakita kanako ug manibog,

ug ang mga tigulang mibarog ra gayod;

9ang mga pangulo magpugong sa pagsulti

ug magtapion sa ilang mga kamot diha sa ilang baba;

10ang tingog sa mga tawong halangdon mahilom,

ug ang ilang mga dila motapot sa alingagngag sa ilang baba.

11Sa pagkadungog sa dalunggan, gitawag ako niini nga bulahan,

ug sa pagkakita sa mata, miuyon kini,

12kay akong giluwas ang kabos nga nagtuaw,

ug ang walay amahan nga walay makatabang kaniya.

13Ang panalangin niadtong duol sa kamatayon miabot kanako,

ug ang kasingkasing sa biyuda gipaawit nako sa kalipay.

14Gisul-ob nako ang pagkamatarong, ug gibistihan ako niini;

ang akong hustisya sama sa kupo ug purong sa ulo.

15Ako mga mata ngadto sa mga buta

ug mga tiil ngadto sa mga bakol.

16Ako amahan ngadto sa mga kabos

ug akong gipangita ang katungod niadtong wala nako mailhi.

17Akong gibuak ang apapangig sa mga tawong dili matarong,

ug gipabuhian ang iyang tinukob gikan sa iyang mga ngipon.

18Unya ako naghunahuna, ‘Ako mamatay sa akong salag,

ug padaghanon nako ang akong mga adlaw sama sa balas,

19ang akong gamot mikaylap ngadto sa katubigan,

ug ang yamog nagpabilin ibabaw sa akong mga sanga sa tibuok gabii;

20ang akong himaya lab-as dinhi kanako,

ug ang akong pana bag-o kanunay dinhi sa akong kamot.’

21“Ang mga tawo namati kanako ug nagpaabot,

ug naghilom alang sa akong tambag.

22Human ako mosulti wala na sila mosulti pag-usab,

ug ang akong pulong nahulog diha kanila.

23Sila naghulat kanako sama sa ulan,

ug gibuka nila ang ilang baba ingon sa naghulat sa ulan panahon sa tingpamulak.

24Ako mipahiyom kanila sa diha nga sila walay pagsalig,

ug ang kahayag sa akong panagway wala nila isalikway.

25Ako nagpili sa ilang dalan ug milingkod ingon nga pangulo,

ug nagpuyo sama sa usa ka hari sa kasundalohan,

sama sa usa nga naglipay niadtong mga masulub-on.