SALMO 54 - Cebuano Form-Based Bible (2011)

Pag-ampo Aron Panalipdan gikan sa KaawayNgadto sa pangulong musikero: uban sa mga tulunggon nga may kuwerdas. Maskil ni David, sa dihang ang mga taga-Zif miadto ug misulti kang Saul, “Si David nagtago uban kanamo.”

1Luwasa ako, O Dios, pinaagi sa imong ngalan,

ug pamatud-i ako nga matarong pinaagi sa imong gahom.

2Patalinghogi ang akong pag-ampo, O Dios;

dungga ang mga pulong sa akong baba.

3Kay ang mga mapahitas-on nakigbatok kanako,

ug ang mga tawo nga bangis nangita sa akong kinabuhi;

wala nila ipahimutang ang Dios diha sa ilang atubangan. Selah.

4Tan-awa, ang Dios mao ang akong magtatabang;

ang Ginoo mao ang tigpanalipod sa akong kinabuhi.

5Balosan niya ug daotan ang akong mga kaaway;

diha sa imong pagkamatinumanon laglaga sila.

6Uban sa usa ka kinabubut-on nga halad, maghalad ako kanimo;

magpasalamat ako sa imong ngalan, O Ginoo, kay kini maayo.

7Kay giluwas niya ako gikan sa tanan nga kasamok,

ug ang akong mata nakakita sa kadaogan batok sa akong mga kaaway.