AWIT SA MGA AWIT 4 - Cebuano Form-Based Bible (2011)

Ang Lalaki

1Tan-awa, maanyag ikaw, akong hinigugma,

pagkaanyag gayod nimo!

Ang imong mga mata sama sa mga salampati

luyo sa imong pandong.

Ang imong buhok sama sa usa ka panon sa mga kanding,

nga nanglugsong sa bakilid sa Gilead.

2Ang imong mga ngipon sama sa usa ka panon sa mga bayeng karnero nga bag-ong gitupihan

nga nanungas gikan pagpanghugas,

diin ang tanan nanganak ug kaluha,

ug walay bisan usa nga namatay kanila.

3Ang imong mga ngabil sama sa usa ka tanod nga pula,

ug ang imong baba maanindot gayod.

Ang imong mga aping sama sa usa ka granada nga pinikas

luyo sa imong pandong.

4Ang imong liog sama sa tore ni David

nga gitukod alang sa mga

kasangkapan sa gubat,

diin adunay usa ka libo ka taming nga gipamitay,

ang tanan mga taming sa mga manggugubat.

5Ang imong duha ka suso sama sa duha ka nati nga lagsaw,

kaluha sa usa ka lagsaw nga baye,

nga nanibsib taliwala sa mga liryo.

6Hangtod sa paghuyuhoy sa kabuntagon

ug ang mga anino mahanaw,

ako moadto sa bukid sa mira

ug sa bungtod sa insenso.

7Matahom gayod ikaw, akong hinigugma;

walay tatsa diha kanimo.

8Uban kanako gikan sa Lebanon, akong pangasaw-onon;

uban kanako gikan sa Lebanon.

Biya gikan sa kinatumyan sa Amana,

gikan sa kinatumyan sa Senir ug sa Hermon,

gikan sa mga lungib sa mga liyon,

gikan sa kabukiran sa mga leopardo.

9Ang akong kasingkasing imong gibihag, igsoon ko, akong pangasaw-onon,

gibihag nimo ang akong kasingkasing uban sa pasiplat sa imong mga mata,

sa usa ka mahalong bato sa imong kuwentas.

10Pagkatam-is sa imong gugma, igsoon ko, akong pangasaw-onon!

Pagkamaayo pa sa imong gugma kay sa bino,

ug ang kahumot sa imong mga lana kay sa tanang matang sa mga panakot!

11Ang imong mga ngabil, O akong pangasaw-onon, nagtulo sa dugos;

dugos ug gatas anaa sa ilalom sa imong dila;

ang kahumot sa imong bisti sama sa kahumot sa Lebanon.

12Usa ka tanaman nga tinak-opan ang akong igsoon, akong pangasaw-onon,

usa ka tanaman nga tinak-opan, tuboran nga gitakpan.

13Ang imong mga saha usa

ka tanaman sa mga granada

uban ang mga pinili nga bunga,

hena uban ang mga nardo,

14nardo ug asafran, kalamo ug kaningag,

uban ang tanan nga kahoy sa insenso,

mira ug mga aloe, uban ang tanan

nga labing maayo nga panakot—

15usa ka tuburan diha sa tanaman, usa ka atabay sa buhi nga tubig,

ug mga sapa nga nagdagayday gikan sa Lebanon.

Ang Babaye

16O hangin nga amihan, pagmata,

ug dali ngari, O hangin nga habagat!

Huros sa akong tanaman, aron ang

kahumot niana mogula.

Pasudla ang akong hinigugma sa iyang tanaman,

ug pakan-a sa mga piniling bunga niini.