LEVITICO 13 - Cebuano Form-Based Bible (2011)

Mga Balaod Mahitungod sa mga Sakit sa Panit

1Ang Ginoo miingon kang Moises ug kang Aaron,

2“Kon ang tawo adunay hubag sa panit sa iyang lawas o nuka o lipagha ug kini mahimong sakit nga sanla sa panit sa iyang lawas, kinahanglang dad-on siya ngadto kang Aaron nga pari o ngadto sa usa sa mga pari nga iyang mga anak.

3Ug ang pari maghiling sa sakit sa panit sa lawas. Kon ang balhibo sa sakit miputi ug kon ang sakit makita nga lalom kay sa panit sa iyang lawas, kini sakit nga sanla, ug sa diha nga ang pari maghiling kaniya ipahibalo sa pari nga siya hugaw.

4Apan kon ang lipagha puti diha sa panit sa iyang lawas ug makita nga kini anaa lamang sa panit ug ang balhibo wala moputi, ang pari maglain sa tawo nga may sakit sulod sa pito ka adlaw.

5Ug sa ikapito nga adlaw ang pari maghiling kaniya ug kon sa iyang pagtan-aw ang sakit mihunong ug kini wala mokaylap sa panit, ang pari maglain kaniya pag-usab sulod sa pito ka adlaw.

6Sa ikapito nga adlaw ang pari maghiling kaniya pag-usab ug kon daw milagom ang sakit ug nga wala mokaylap sa panit, ang pari magpahibalo nga siya hinlo na ug nga kini nuka lamang, unya labhan niya ang iyang mga bisti ug siya mahinlo.

7Apan kon ang nuka mokaylap sa panit human siya magpakita sa pari aron sa pagpahinlo kaniya, kinahanglang magpakita siya pag-usab sa pari.

8Unya hilngon kini sa pari, ug kon ang nuka mikaylap sa panit, ang pari magpahibalo nga hugaw siya, kini sanla.

9“Kon adunay sakit nga sanla sa usa ka tawo, kinahanglang dad-on siya ngadto sa pari.

10Ug ang pari maghiling kaniya ug kon may hubaghubag nga puti sa panit ug kini nakapaputi sa balhibo, ug may unod nga nakita diha sa hubag,

11kini sanla nga dugay na kaayo sa iyang panit ug ang pari magpahibalo nga hugaw ang maong tawo ug siya dili ilain sa pari kay siya hugaw man.

12Kon ang sanla motungha sa panit ug ang sanla molukop sa tibuok panit sa masakiton, gikan sa iyang ulo hangtod sa iyang mga tiil, sumala sa makita sa pari,

13kinahanglang hilngon siya sa pari, ug kon ang sanla milukop sa tibuok niyang lawas, siya magpahibalo nga ang maong tawo hinlo; kay kini miputi man, siya hinlo.

14Apan sa diha nga makita diha kaniya ang unod, hugaw siya.

15Ug hilngon sa pari ang unod ug magpahibalo nga hugaw siya. Hugaw ang unod kay kini sanla.

16Apan kon ang unod mobalik sa pagkaputi, moadto siya sa pari.

17Ug ang pari maghiling kaniya, ug kon ang sakit sa panit miputi, ang pari magpahibalo nga hinlo ang masakiton, siya hinlo.

18“Kon ang iyang panit adunay hubag ug kini naayo na,

19ug mahitabo nga sa dapit sa hubag may motungha nga puti nga lipagha o pulapula, kinahanglang ipakita kini sa pari,

20ug ang pari mohiling niini. Ug kon makita nga kini lalom kay sa iyang panit ug ang iyang balhibo miputi, ang pari magpahibalo nga hugaw ang maong tawo, kini mao ang sakit nga sanla nga naggikan sa hubag.

21Apan kon sa paghiling sa pari niini ug dili makita diha kaniya ang balhibo nga puti, ug nga kini dili lalom kay sa panit, kondili lagom hinuon, ang pari maglain kaniya sulod sa pito ka adlaw.

22Ug kon kini mokaylap sa panit, ang pari magpahibalo nga hugaw siya, kini may sakit.

23Apan kon ang lipagha nga puti anaa sa iyang dapit ug wala mokaylap, kini ulat lamang sa hubag ug ang pari magpahibalo nga hinlo siya.

24“O kon adunay paso sa iyang panit ug ang unod nga buhi sa napaso mahimong kabang nga pulapula nga puti, o puti,

25kinahanglang ipahiling kini sa pari. Ug kon ang balhibo miputi diha sa kabang ug makita nga kini lalom kay sa panit, kini sanla nga migula sa napasoan ug ang pari magpahibalo nga hugaw ang maong tawo, kini sakit nga sanla.

26Apan kon ang pari maghiling niini ug makita nga ang balhibo diha sa kabang dili puti ug dili lalom kay sa panit, kondili lagom kini, ang pari maglain kaniya sulod sa pito ka adlaw.

27Sa ikapito nga adlaw ang pari maghiling kaniya. Kon kini mikaylap sa panit ang pari magpahibalo nga hugaw siya kay kining sakita sanla.

28Apan kon ang kabang nagpabilin sa iyang dapit ug wala mokaylap sa panit ug kini milagom, kini hubag lamang sa paso busa ang pari magpahibalo nga hinlo siya kay kini ulat man sa paso.

29“Ug sa diha nga ang usa ka lalaki o babaye may sakit sa ulo o sa suwang,

30kinahanglang hilngon sa pari ang sakit, ug kon makita nga kini lalom kay sa panit ug ang balhibo niini dalag ug nipis, ang pari magpahibalo nga hugaw ang maong tawo, kini pangatol, usa ka sanla sa ulo o sa suwang.

31Apan kon inighiling sa pari sa sakit nga pangatol ug makita nga kini dili lalom kay sa panit ug wala usab kini balhibo nga itom, ang pari maglain sa may sakit nga pangatol sulod sa pito ka adlaw.

32Ug sa ikapito nga adlaw hilngon sa pari ang sakit, ug kon makita nga ang pangatol wala mokaylap ug niini walay balhibo nga dalag ug ang pangatol makita nga dili lalom kay sa panit,

33kinahanglang balbasan siya apan dili ilakip pagbalbas ang dapit sa pangatol, ug ang pari maglain sa adunay pangatol sulod sa dugang nga pito pa ka adlaw.

34Sa ikapito nga adlaw hilngon sa pari ang pangatol, ug kon makita nga ang pangatol wala mokaylap sa panit ug makita kini nga dili lalom kay sa panit, ang pari magpahibalo nga hinlo siya, ug labhan sa tawo ang iyang mga bisti ug mahinlo siya.

35Apan kon ang pangatol mikaylap sa panit human sa iyang paghinlo,

36kinahanglang hilngon siya sa pari ug kon makita nga ang pangatol mikaylap sa panit, ang pari dili na mangita ug balhibo nga dalag, siya hugaw.

37Apan kon sa pagtan-aw niya nga ang pangatol nasanta ug miturok kaniya ang balhibo nga itom, ang pangatol maayo na, siya hinlo, ug ang pari magpahibalo nga hinlo siya.

38“Kon may usa ka lalaki o babaye nga may mga kabang diha sa panit sa iyang lawas, puti nga mga kabang,

39ang pari maghiling niini ug kon makita nga ang mga kabang diha sa panit sa lawas lubog nga pagkaputi, alap-ap nga migula sa panit, siya hinlo.

40“Kon ang buhok sa usa ka lalaki mangalarot, upaw siya apan hinlo siya.

41Kon ang buhok dapit sa iyang agtang mangalarot, upawon siya sa atubangan, apan siya hinlo.

42Apan kon diha sa naupaw nga ulo o sa naupaw sa agtang may sakit nga puti nga pulapula, kana sanla nga migula sa iyang upaw nga ulo o sa iyang upaw nga agtang.

43Unya ang pari maghiling kaniya, ug kon makita nga ang lipagha nga sakit puti nga pulapula sa iyang upaw nga ulo o sa iyang upaw nga agtang, sama sa hitsura sa sanla sa panit sa lawas,

44sanlahon siya, busa hugaw siya. Ang pari magpahibalo gayod nga hugaw siya, kay sa iyang ulo adunay sakit.

45“Ang tawo nga adunay sanla kinahanglan nga magsul-ob ug gision nga bisti, padunghay ang buhok sa iyang ulo ug tabonan niya ang iyang ibabaw nga ngabil, ug magsinggit siya, ‘Hugaw, hugaw.’

46Siya magpabilin nga hugaw sa tibuok nga panahon nga anaa pa kaniya ang sakit, hugaw siya. Magpuyo siya nga mag-inusara sa puluy-anan gawas sa kampo.

Mga Balaod Mahitungod sa Agup-op

47“Kon adunay agup-op diha sa bisti, balhibo man o lino nga bisti,

48diha man sa lindog o hulog sa hablanan sa lino o delana o diha sa panit o sa bisan unsa nga hinimo sa panit,

49kon ang lama may pagkalunhaw o pula diha sa bisti o sa panit o diha sa lindog o sa hulog sa hablanan, o sa bisan unsa nga hinimo ug panit, kini agup-op ug ipakita kini ngadto sa pari.

50Ang pari maghiling sa lama ug ilain niya kadtong may lama sulod sa pito ka adlaw.

51Ug sa ikapito nga adlaw hilngon niya ang lama. Kon ang lama mikaylap diha sa bisti o sa lindog o sa hulog sa hablanan o sa panit o sa bisan unsa nga hinimo ug panit nga aduna nianang maong lama kay kini agup-op man nga magkutkot, kini hugaw.

52Sunogon niya ang bisti, o ang lindog o hulog sa hablanan, sa delana o lino o bisan unsa nga hinimo ug panit nga aduna nianang maong lama kay kini agup-op man nga magkutkot; sunogon kini sa kalayo.

53“Kon sa paghiling sa pari ang lama wala mokaylap sa bisti o sa lindog o sa hulog sa hablanan o sa bisan unsa nga hinimo ug panit,

54ang pari magsugo nga hugasan nila ang butang nga gitaptan sa lama ug kini ilain sulod sa dugang nga pito ka adlaw.

55Ug hilngon kini sa pari human mahugasi ang lama. Ug kon ang lama wala mausab ang bulok bisan kini wala mokaylap, kini hugaw, sunoga kini sa kalayo maanaa man sa atubangan o sa luyo ang lama.

56“Apan kon sa paghiling sa pari makita nga ang lama sa sakit lagom human kini mahugasi, gision ang lama gikan sa bisti, o sa panit, o sa lindog o sa hulog sa hablanan.

57Kon makita kini pag-usab diha sa bisti, bisan sa lindog o sa hulog sa hablanan o sa bisan unsa nga hinimo ug panit, unya kini mokaylap, sunoga sa kalayo kadtong gitaptan sa lama.

58Unya ang bisti o ang lindog o ang hulog sa hablanan o bisan unsa nga hinimo ug panit nga nakuhaan na sa lama human mahugasi kinahanglang hugasan sa ikaduha nga higayon ug unya mahinlo na kini.”

59Kini mao ang balaod mahitungod sa agup-op diha sa bisti nga delana o lino nga anaa sa lindog o sa hulog sa hablanan, o sa bisan unsa nga hinimo ug panit aron sa paghukom kon kini hinlo ba o hugaw.