2 SAMUEL 23 - Cebuano Form-Based Bible (2011)

Ang Kataposang mga Pulong ni David

1Mao kini ang kataposang mga pulong ni David:

Ang pulong ni David nga anak ni Jesse,

ang pulong sa tawo nga gibayaw sa itaas,

ang dinihogan sa Dios ni Jacob

ug ang minahal nga salmista sa Israel,

2“Ang Espiritu sa Ginoo nagsulti

pinaagi kanako,

ang iyang pulong anaa

sa akong dila.

3Ang Dios sa Israel nagsulti,

ang Bato sa Israel nagsulti kanako:

Kon ang usa ka tawo maghari sa katawhan uban sa katarong,

naghari diha sa kahadlok sa Dios,

4modan-ag siya diha kanila

sama sa kahayag sa kabuntagon,

sama sa adlaw nga nagsidlak sa kabuntagon nga walay panganod,

sama sa ulan nga nagpaturok

sa balili sa yuta.

5Oo, dili ba ingon niini ang pagbarog sa

akong balay uban sa Dios?

Kay siya naghimo uban kanako sa usa ka walay kataposan nga kasabotan,

maayong pagkahan-ay ug dili mausab.

Kay dili ba niya palamboon

ang tanan nakong tabang

ug tinguha?

6Apan ang mga daotang tawo

sama sa mga tunok

nga gisalibay,

kay sila dili makuptan

pinaagi sa kamot;

7apan ang tawo nga magtandog kanila,

kinahanglan nga sangkap sa

hinagiban nga puthaw ug

puan sa usa ka bangkaw;

ug sila sunogon gayod

paghurot sa kalayo diha sa ilang nahimutangan.”

Ang mga Inilang Sundalo ni David

8Kini mao ang mga ngalan sa mga gamhanang tawo nga diha kang David: Si Joseb-basebet, usa ka Takemonihanon, pangulo sa tulo; pinaagi sa bangkaw nakapatay siyag walo ka gatos sa usa lamang ka higayon.

9Sunod kaniya uban sa tulo ka gamhanang tawo mao si Eleasar nga anak ni Dodo nga anak ni Ahohi. Kuyog siya ni David sa diha nga gisuklan nila ang mga Filistihanon nga nagtigom didto alang sa panag-away ug ang mga tawo sa Israel misibog.

10Siya mitindog ug gipanigbas ang mga Filistihanon hangtod nga ang iyang kamot naluya, ug ang iyang kamot mitapot sa espada ug ang Ginoo naghimo ug usa ka dakong pagdaog niadtong adlawa ug ang katawhan namalik aron lamang manguha ug kasangkapan sa mga nangamatay.

11Sunod kaniya mao si Samma, ang anak ni Agee nga usa ka Hararihanon. Ang mga Filistihanon nagtigom didto sa Lehi diin adunay luna nga puno sa batong, ug ang katawhan nanagan gikan sa mga Filistihanon.

12Apan siya mitindog sa taliwala sa tanaman ug nanalipod niini ug mipatay sa mga Filistihanon ug ang Ginoo naghimo ug usa ka dakong kadaogan.

13Ug tulo sa 30 ka pangulo nga mga tawo milugsong, ug miadto kang David sa panahon sa ting-ani ngadto sa langob sa Adullam ug ang panon sa mga kasundalohang Filistihanon nagkampo didto sa walog sa Refaim.

14Niadtong higayona si David didto sa kuta ug ang kampo sa mga Filistihanon didto sa Betlehem.

15Ug si David nangandoy ug miingon, “May usa unta nga mohatag kanako ug tubig nga imnonon gikan sa atabay sa Betlehem nga duol sa ganghaan!”

16Ug ang tulo ka gamhanang tawo milatas taliwala sa kampo sa mga Filistihanon, ug mitimba ug tubig gikan sa atabay sa Betlehem nga duol sa ganghaan, ug mikuha niini ug gidala kini ngadto kang David. Apan siya wala moinom niini kondili gibubo kini ngadto sa Ginoo,

17ug siya miingon, “Ipalayo unta kanako, O Ginoo, nga kini akong buhaton. Imnon ba nako ang dugo sa mga tawo nga miadto ingon nga nagtahan sa ilang mga kinabuhi?” Busa wala siya moinom niini. Kining mga butanga gihimo sa tulo ka gamhanang mga tawo.

18Si Abisai nga igsoon ni Joab nga anak ni Zeruia maoy pangulo sa 30. Ug gibakyaw niya ang iyang bangkaw batok sa tulo ka gatos ug gipamatay sila, ug nahimo siyang inila sama sa tulo.

19Nahimo siyang labing inila sa 30 ug nahimong ilang pangulo apan wala siya makatupong sa kabantog sa tulo.

20Si Benaias nga anak ni Jehoiada usa ka isog nga tawo sa Kabseel, nga nakahimo ug dagkong mga buhat, siya ang nagpatay sa duha ka ariel sa Moab. Siya milugsong usab ug nakapatay ug usa ka liyon diha sa usa ka gahong usa ka adlaw niana nga nag-ulan ug yelo.

21Ug iyang gipatay ang usa ka Ehiptohanon nga ambongan. Ang Ehiptohanon may usa ka bangkaw sa iyang kamot, apan misulong si Benaias ngadto kaniya nga may usa ka sungkod ug giilog ang bangkaw gikan sa kamot sa Ehiptohanon, ug gipatay siya pinaagi sa iyang kaugalingong bangkaw.

22Kining mga butanga gihimo ni Benaias nga anak ni Jehoiada ug nakahimo kaniya nga inila sama sa tulo ka gamhanang mga tawo.

23Nahimo siyang inila sa 30 apan wala siya makatupong sa tulo. Ug gitudlo siya ni David nga labaw sa iyang mga bantay.

24Si Asahel nga igsoon ni Joab, usa sa 30; si Elhanan nga anak ni Dodo sa Betlehem,

25si Samma nga taga-Harod, si Elika nga taga-Harod,

26si Heles nga Paltihanon, si Ira nga anak ni Ikes nga taga-Tekoa,

27si Abieser nga taga-Anatot, si Mebunai nga Husatihanon,

28si Salmon nga Ahohanon, si Maharai nga taga-Netofa,

29si Heleb nga anak ni Baana nga taga-Netofa, si Itai nga anak ni Ribai sa Gibea sa mga kaliwat ni Benjamin,

30si Benaia nga taga-Piraton, si Hidai sa mga kasapaan sa Gaas,

31si Abi-albon nga Arbatihanon, si Asmavet nga taga-Bahurim,

32si Eliaba nga taga-Saalbon, mga anak ni Jasen, si Jonatan

33ug si Samma nga Hararhanon, si Ahiam nga anak ni Sarar nga Hararhanon,

34si Elifelet nga anak ni Ahasbai nga taga-Maaca, si Eliam nga anak ni Ahitofel nga taga-Gilo,

35si Hesrai nga taga-Carmel, si Paarai nga Arbihanon,

36si Igal nga anak ni Natan nga taga-Zoba, si Bani nga Gadihanon,

37si Zelek nga Amonihanon, si Naharai nga taga-Beerot, ang tigdala sa hinagiban ni Joab nga anak ni Zeruia,

38si Ira nga Itrihanon, si Gareb nga Itrihanon,

39si Uria nga Hitihanon: silang tanan 37.