MGA TAGA-ROMA 9 - Cebuano Form-Based Bible (2011)

Ang Dios ug ang Iyang Katawhan

1Nagsulti ako sa tinuod diha kang Cristo, wala ako mamakak; ang akong tanlag nagsaksi niini kanako diha sa Espiritu Santo,

2nga dako ang akong kaguol ug walay paghunong ang kasakit sa akong kasingkasing.

3Kay palabihon nako nga mahimong tinunglo gikan kang Cristo tungod ug alang sa kaayohan sa akong mga igsoon, sa akong mga kaliwat sumala sa unod,

4Ex. 4:22. nga mao ang mga Israelinhon. Ila ang pagkaanak, ang kadungganan, ang mga kasabotan, ang paghatag sa Balaod, ang pagsimba ug ang mga saad;

5ila ang mga patriarka ug gikan kanila ang Cristo sumala sa unod. Ang Dios nga labaw sa tanan dalaygon hangtod sa kahangtoran. Amen.

6Apan dili ingon nga napakyas ang pulong sa Dios. Kay dili man ang tanan nga gikan kang Israel sakop sa Israel,

7Gen. 21:12. ug dili ang tanan nga mga anak ni Abraham tinuod niyang mga kaliwat, kon dili “Pinaagi kang Isaac nganlan ang imong mga kaliwat.”

8Sa ato pa, ang mga anak sa Dios dili mao kadtong mga anak sa unod kondili ang isipon nga iyang mga kaliwat mao kadtong mga anak sumala sa saad.

9Gen. 18:10. Kay mao kini ang pulong sa saad, “Sa ingon niining panahona mobalik ako dinhi ug si Sara makabaton ug usa ka anak nga lalaki.”

10Ug dili lamang kana ra, kondili si Rebeca usab nagsamkon ug mga anak gikan sa usa ka tawo, si Isaac nga atong amahan,

11bisan sa wala pa mahimugso ang mga bata ug sa wala pa makahimo ug bisan unsa nga maayo o daotan, aron matuman gayod ang tuyo sa Dios sa pagpili dili pinaagi sa mga buhat kondili pinaagi sa iyang pagtawag.

12Gen. 25:23. Si Rebeca giingnan, “Ang magulang mag-alagad sa manghod.”

13Mal. 1:2-3. Sumala sa nasulat, “Si Jacob akong gihigugma, apan si Esau akong gikasilagan.”

14Busa unsa may atong ikasulti? Nga ang Dios dili makiangayon? Dili gayod!

15Ex. 33:19. Kay siya nag-ingon kang Moises, “Kaluy-an nako kadtong aduna akoy kaluoy ug magmapuangoron ako niadtong aduna akoy puangod.”

16Busa wala kini mag-agad sa kabubut-on sa tawo o sa iyang paningkamot, kondili sa kaluoy sa Dios.

17Ex. 9:16 (LXX). Kay ang kasulatan nag-ingon sa Paraon, “Gituboy ko ikaw aron mapadayag ang akong gahom, aron ang akong ngalan masangyaw diha sa tibuok kalibotan.”

18Busa ang Dios may kaluoy kang bisan kinsa nga buot niya, ug magpagahi sa kasingkasing ni bisan kinsa nga buot niya.

Ang Kasuko ug Kaluoy sa Dios

19Busa moingon ikaw kanako, “Nganong mangita pa man siya ug sayop? Kay kinsa may makababag sa iyang pagbuot?”

20Isa. 29:16; 45:9. Apan kinsa ka man, O tawo, nga motubag sa Dios? Ang gihulma moingon ba diay sa naghulma, “Nganong giingon man nimo ako pagbuhat niini?”

21Wala ba diay katungod ang magkukulon sa paghimo ug usa ka sudlanan alang sa hamili nga kagamitan ug laing sudlanan alang sa yano nga kagamitan gikan sa mao rang usa ka inumol?

22Unsa man kon ang Dios, sa tinguha sa pagpadayag sa iyang kapungot ug sa pagpaila sa iyang gahom, miantos diha a dakong pagpailob sa mga butang nga kapungtanan nga angay sa kalaglagan,

23aron sa pagpaila sa kadagaya sa iyang himaya ngadto sa mga butang nga kaluy-anan nga iyang gitagana ngadto sa himaya,

24bisan kanato nga iyang gitawag, dili lamang gikan sa mga Judio kondili gikan sa mga Gentil usab?

25 Hos. 2:23. Ug mao gayod kini ang gisulti diha sa basahon ni Hosea,

“Ang dili akong mga katawhan

tawgon nako nga ‘akong katawhan,’

ug ang babaye nga wala higugmaa

tawgon nako nga ‘akong hinigugma.’ ”

26 Hos. 1:10. “Ug sa dapit diin giingnan sila,

‘Kamo dili akong katawhan,’

tawgon sila nga ‘mga anak

sa Dios nga buhi.’ ”

27Ug Isa. 10:22-23 (LXX). si Isaias mituaw mahitungod sa Israel, “Bisan pa kon ang gidaghanon sa mga anak ni Israel sama sa balas sa dagat, ang mahibilin lamang mao ang maluwas,

28kay uban sa kahingpit ug kadali, tumanon sa Ginoo ang iyang hukom sa kalibotan.”

29 Isa. 1:9. Ug sama sa gitagna ni Isaias:

“Kon ang Ginoo sa mga panon

wala pa magbilin kanato ug kaliwat,

mahisama unta kita sa Sodoma ug

mahimo unta kitang ingon sa Gomora.”

Ang Israel ug ang Maayong Balita

30Busa unsa may atong isulti? Nga ang mga Gentil nga wala maningkamot pagsunod sa pagkamatarong, nakakab-ot hinuon sa pagkamatarong, ang pagkamatarong pinaagi sa pagtuo,

31apan ang Israel nga naningkamot pagsunod sa balaod sa pagkamatarong wala makakab-ot sa pagtuman sa balaod.

32Ngano man? Tungod kay wala man sila maningkamot pagsunod niini pinaagi sa pagtuo, kondili ingon nga daw pinasikad sa mga binuhatan. Napandol sila sa batong makapandol,

33 Isa. 28:16 (LXX). ingon sa nasulat,

“Tan-awa, akong gibutang diha sa Zion

ang bato nga makapapandol sa mga tawo,

usa ka bato nga makapatumba kanila,

apan ang mosalig kaniya dili gayod maulawan?”