MGA HEBREOHANON 11 - Cebuano Form-Based Bible (2011)

1Karon ang pagtuo mao ang kasigurohan sa mga butang nga atong gilaoman ug ang hugot nga pagsalig sa mga butang nga dili nato makita.

2Kay tungod niini ang atong katigulangan nakadawat sa langitnong pag-uyon.

3Gen. 1:1; Sal. 33:6, 9; Juan 1:3. Tungod sa pagtuo kita makasabot nga ang kalibotan gibuhat pinaagi sa pulong sa Dios, nga tungod niana ang mga butang nga makita gibuhat gikan sa mga butang nga wala madayag.

4 Gen. 4:3-10. Tungod sa pagtuo si Abel mihalad ngadto sa Dios sa labaw ka maayo nga halad kay sa kang Cain, nga pinaagi niini siya gipamatud-an ingon nga tawong matarong. Ang Dios nagmatuod niini diha sa pagdawat sa iyang mga halad. Apan tungod niini, bisan ug siya patay na, siya nagsulti pa gihapon.

5Gen. 35:27. Tungod sa pagtuo si Enoc gilalin ngadto sa langit aron siya dili makakita sa kamatayon ug siya wala makit-i kay gikuha man siya sa Dios. Sa wala pa siya kuhaa siya namatud-an nga nakapahimuot sa Dios.

6Ug kon walay pagtuo dili gayod mahimo ang pagpahimuot kaniya. Kay si bisan kinsa nga moduol sa Dios kinahanglang motuo nga siya anaa ug nga siya magganti sa mga nangita kaniya.

7Gen. 6:13-22. Tungod sa pagtuo si Noe, sa napasidan-an siya sa Dios mahitungod sa mga hitabo nga wala pa makita, mitagad sa pasidaan ug iyang gibuhat ang arka alang sa pagluwas sa iyang panimalay. Tungod niini ang kalibotan iyang gihukman sa silot, ug siya nahimong manununod sa pagkamatarong nga pinaagi sa pagtuo.

8 Gen. 12:1-5. Tungod sa pagtuo si Abraham mituman sa diha nga gitawag siya sa pag-adto sa usa ka dapit nga iyang madawat ingon nga panulundon, ug siya miadto nga wala mahibalo kon asa siya paingon.

9Gen. 35:27. Tungod sa pagtuo siya mipuyo didto sa yuta sa saad, nga daw diha siya sa laing yuta, nagpuyo siya sa mga tolda uban kang Isaac ug Jacob nga mga manununod sa mao rang saad uban kaniya.

10Kay siya nagpaabot man niadtong lungsod nga may mga patukoranan, nga ang magtutukod ug magbubuhat mao ang Dios.

11Gen. 18:11-14; 21:2. Tungod sa pagtuo si Sara gayod nakadawat usab ug gahom sa pagsamkon, bisan tuod siya lapas na sa panuigon, kay iya mang giisip nga kasaligan kadtong naghimo sa saad.

12Gen. 15:5; 22:17; 32:12. Busa gikan sa usa ka tawo, kaniya nga sama ra sa patay na, misanay ang mga kaliwatan nga sama ka daghan sa mga bituon sa kalangitan ug nga ingon sa dili maisip nga balas sa kabaybayonan.

13 Gen. 23:4; 1 Cron. 29:15; Sal. 39:12. Diha sa pagtuo kini silang tanan nangamatay nga wala makadawat sa mga gisaad kanila, apan gikan sa layo sila makakita niini ug nahinangop ug miila nga sila mga dumuduong ug mga langyaw lamang dinhi sa yuta.

14Kay ang mga tawo nga magsulti sa ingon nagpadayag nga sila nangita sa ilang yutang puluy-anan.

15Kon mao pay ilang gihunahuna ang yuta nga ilang gigikanan, sila may kahigayonan pa unta sa pagbalik.

16Apan ang tinuod mao nga ilang gitinguha ang usa ka labaw pa ka maayong yuta, nga sa ato pa, langitnon. Tungod niana ang Dios dili maulaw nga angkonon nga ilang Dios kay siya nakaandam na man ug lungsod alang kanila.

17 Gen. 22:1-14. Tungod sa pagtuo si Abraham, sa dihang gisulayan siya, mihalad kang Isaac, ug siya nga nakadawat sa mga saad andam sa paghalad sa iyang bugtong nga anak

18nga mahitungod kaniya kini giingon, “Pinaagi kang Isaac ang imong mga kaliwat hatagan ug ngalan.”

19Iyang giisip nga ang Dios makahimo pagbanhaw sa mga tawo gikan sa mga patay, nga tungod niana, sa sinambingay nga pagkasulti, iyang nadawat pagbalik si Isaac.

20Gen. 27:27-29, 39-40. Tungod sa pagtuo si Isaac nagpanalangin kang Jacob ug kang Esau sa ilang kaugmaon.

21Gen. 48:1-20; Gen. 47:31 (LXX). Tungod sa pagtuo si Jacob, sa dihang himalatyon na siya, nagpanalangin sa matag anak ni Jose ug misimba nga nag-akbo sa kuptanan sa iyang sungkod.

22Gen. 50:24-25; Ex. 13:19. Tungod sa pagtuo si Jose, sa hapit na siya mamatay, naghisgot mahitungod sa pagpanggula sa katawhan sa Israel ug nagtugon mahitungod sa iyang mga bukog.

23 Ex. 2:2; Ex. 1:22. Tungod sa pagtuo, si Moises, sa iyang pagkahimugso, gitagoan sa iyang mga ginikanan sulod sa tulo ka bulan, kay ila mang nakita nga ang bata matahom ug wala sila mahadlok sa sugo sa hari.

24Ex. 2:10-12. Tungod sa pagtuo si Moises, sa dihang dako na siya, wala mosugot nga tawgon siya nga anak sa anak nga babaye sa Paraon.

25Gipalabi hinuon niya ang pag-antos sa mga pagdagmal kauban sa mga tawo sa Dios kay sa pagpahimulos sa lumalabayng kalipay sa sala.

26Iyang giisip nga ang pasipala nga antoson alang kang Cristo labaw pa ka dakong bahandi kay sa mga bahandi sa Ehipto, kay siya nagtutok man ngadto sa ganti.

27Tungod sa pagtuo siya mibiya sa Ehipto, nga wala mahadlok sa kasuko sa hari, kay siya milahutay man ingon nga nakakita siya kaniya nga dili makita.

28Ex. 12:21-30. Tungod sa pagtuo iyang gihimo ang tulumanon sa Pagsaylo ug gisablig ang dugo aron siya nga naglaglag sa mga panganay dili motandog kanila.

29 Ex. 14:21-31. Tungod sa pagtuo ang mga tawo mitabok sa Dagat nga Pula nga daw sa yuta nga mala, apan ang mga Ehiptohanon, sa pagsulay nila sa paghimo sa ingon, nangalumos.

30Tungod sa pagtuo ang mga kuta sa Jerico nangatumpag human nila kini liboti sulod sa pito ka adlaw.Jos. 6:12-21.

31Jos. 6:22-25; Jos. 2:1-21. Tungod sa pagtuo si Rahab nga nagbaligya sa iyang dungog wala malaglag kauban sa mga dili masinugtanon, kay iya mang gidawat ang mga tigpaniid uban sa kalinaw.

32 Mag. 6:11–8:32; Mag. 4:6–5:31; Mag. 13:2–16:31; Mag. 11:1-27; 1 Sam. 16:1–1 Hari 2:11; 1 Sam. 1:1–25:1. Ug unsa pay uban nga akong isulti? Kay kulang ang akong panahon sa paghisgot mahitungod kang Gideon, kang Barak, kang Samson, kang Jepta, mahitungod kang David ug kang Samuel ug sa mga propeta,

33Dan. 6:1-27. nga tungod sa pagtuo gibuntog nila ang mga gingharian, gipatuman nila ang kaangayan, gidawat nila ang mga saad, gipatak-om nila ang mga baba sa mga liyon,

34Dan. 3:1-30. gipalong nila ang bangis nga kalayo, nakaikyas sila sa sulab sa espada, nalig-on gikan sa kahuyang, nangahimo sila nga kusgan diha sa panggubatan, ilang gipatibulaag ang mga kasundalohang langyaw.

351 Hari 17:17-24; 2 Hari 4:25-37. Ang kababayen-an midawat sa ilang mga nangamatay pinaagi sa pagbanhaw. Ang uban gisakit, nagsalikway sa kagawasan, aron sila mangabanhaw ngadto sa labaw pa ka maayong kinabuhi.

361 Hari 2:26-27; 2 Cron. 18:25-26; Jer. 20:2; 37:15; 38:6. Ang uban nag-antos sa mga pagbiaybiay ug mga bunal, ug bisan pa gani sa mga gapos ug sa mga pagbilanggo.

372 Cron. 24:21. Gibato sila, gipikas sila pinaagi sa gabas, gipamatay sila pinaagi sa espada, naglatagaw sila nga nagsul-ob ug mga panit sa mga karnero ug mga kanding, nag-antos sa kawalad-on, mga sinakit, mga dinagmalan—

38alang kanila ang kalibotan dili angay—naglatagaw sila sa mga kamingawan ug mga kabukiran, sa mga langob ug mga lungib sa yuta.

39Ug niining tanan, wala sila makadawat sa gisaad kanila bisan sila gipamatud-an sa ilang pagtuo,

40kay gitagana man sa Dios ang labaw pa ka maayong butang alang kanato, nga kondili uban kanato sila dili mahingpit.