2 MGA HARI 20 - Cebuano Form-Based Bible (2011)

Nasakit si Hesekias ug Naayo

1Niadtong panahona si Hesekias nasakit ug nag-ungaw sa kamatayon. Si Isaias nga propeta nga anak ni Amos miadto kaniya ug miingon kaniya, “Kini mao ang gisulti sa Ginoo, ‘Andama ang imong balay kay ikaw mamatay ug dili maulian.’ ”

2Unya gilingi ni Hesekias ang iyang nawong ngadto sa bungbong ug nag-ampo sa Ginoo, nga nag-ingon,

3“Hinumdomi karon, O Ginoo, ako nangamuyo kanimo, giunsa nako paglakaw nga matinud-anon diha sa imong atubangan ug uban sa tibuok nako nga kasingkasing, ug nagbuhat sa maayo diha sa imong panan-aw.” Ug si Hesekias mihilak sa hilabihan.

4Ug sa wala pa makagawas si Isaias gikan sa kinataliwad-an nga hawanan, ang pulong sa Ginoo midangat kaniya nga nag-ingon,

5“Balik ug ingna si Hesekias nga pangulo sa akong katawhan, Kini mao ang gisulti sa Ginoo, ang Dios ni David nga imong amahan: Nadungog nako ang imong pag-ampo, nakita nako ang imong mga luha; ikaw akong ayohon; sa ikatulo nga adlaw kinahanglan nga moadto ikaw sa balay sa Ginoo.

6Ug dugangan nako ang imong kinabuhi ug napulo ug lima ka tuig. Ug ako magluwas kanimo ug niining siyudara gikan sa kamot sa hari sa Asiria, ug ako manalipod niining siyudara tungod ug alang sa akong kaugalingon ug tungod ug alang sa akong sulugoon nga si David.”

7Ug si Isaias miingon, “Pagdala ug usa ka torta nga igos. Ug ipakuha nila ug ipabutang sa ibabaw sa hubag aron siya maulian.”

8Unya si Hesekias miingon kang Isaias, “Unsa ba ang ilhanan nga ang Ginoo mag-ayo kanako ug nga ako moadto ngadto sa balay sa Ginoo sa ikatulo nga adlaw?”

9Si Isaias miingon, “Kini mao ang ilhanan kanimo gikan sa Ginoo, nga buhaton sa Ginoo ang butang nga iyang gisaad. Mag-una ba ang anino ug napulo ka lakang o mosibog ba ug napulo ka lakang?”

10Ug si Hesekias mitubag, “Sayon nga butang nga ang anino mouna ug napulo ka lakang kay sa mosibog ang anino ug napulo ka lakang.”

11Ug si Isaias nga propeta mituaw sa Ginoo ug iyang gipasibog ang anino ug napulo ka lakang sumala sa taknaan ni Ahas.

Mga Sinugo Gikan sa Babilonia

12Niadtong panahona, si Merodak-baladan nga anak ni Baladan ug hari sa Babilonia nagpadala ug mga tawo uban ang mga sulat ug usa ka gasa alang kang Hesekias kay nakadungog siya nga si Hesekias nasakit.

13Ug si Hesekias midawat kanila ug gipakita kanila ang tipiganan sa iyang bahandi, ang plata, ang bulawan, ang mga panakot, ang bililhon nga lana, ang iyang hinagiban ug ang tanan nga nakita diha sa iyang mga tipiganan. Walay butang diha sa iyang balay o sa tibuok niyang gingharian nga wala ipakita ni Hesekias kanila.

14Unya miadto si Isaias nga propeta kang Hesekias nga hari ug miingon kaniya, “Unsay giingon niining mga tawhana? Ug diin sila gikan nga nanganhi man kanimo?” Ug si Hesekias miingon, “Gikan sila sa layong yuta, gikan sa Babilonia.”

15Ug siya miingon, “Unsay nakita nila sa imong balay?” Ug si Hesekias mitubag, “Ang tanan nga ania sa akong balay ilang nakita. Walay butang sa akong tipiganan nga wala nako ipakita kanila.”

16Ug si Isaias miingon kang Hesekias, “Pamatia ang pulong sa Ginoo:

17Tan-awa, ang mga adlaw moabot nga ang tanan nga anaa sa imong balay ug ang gitigom sa imong katigulangan hangtod niining adlawa, dad-on ngadto sa Babilonia. Kinahanglang walay mahibilin, nag-ingon ang Ginoo.

18Ug ang uban nimong mga anak nga lalaki nga matawo kanimo, ilang kuhaon ug himoon sila nga mga yunoko sa palasyo sa hari sa Babilonia.”

19Unya si Hesekias miingon kang Isaias, “Maayo ang pulong sa Ginoo nga imong gipamulong.” Kay siya naghunahuna, “Nganong dili, kon ang pakigdait ug kasigurohan modangat sa akong mga adlaw?”

20Ang uban nga mga buhat ni Hesekias, ug ang tanan niyang kagahom ug kon giunsa niya paghimo ang lim-aw ug ang kanal ug gidala ang tubig ngadto sa siyudad, wala ba kini masulat sa basahon sa mga Kasaysayan sa mga Hari sa Juda?

21Ug si Hesekias mipahulay uban sa iyang katigulangan ug si Manases nga iyang anak naghari puli kaniya.