JOB 12 - Cebuano Form-Based Bible (2011)

Ang Tubag ni Job kang Zofar

1Unya si Job mitubag:

2“Sa walay duhaduha kamo mao ang katawhan,

ug ang kaalam mamatay uban kaninyo.

3Apan ako adunay panabot sama kaninyo;

ako dili ubos kaninyo.

Kinsa ang wala masayod sa mga butang nga sama niini?

4Ako usa ka kataw-anan sa akong mga higala;

ako nga mitawag sa Dios ug siya mitubag kanako,

usa ka matarong ug hingpit nga tawo, usa ka kataw-anan.

5Diha sa hunahuna sa usa nga anaa sa kasayon,

anaa ang pagyubit sa daotang kapalaran;

kini andam alang niadtong mga tiil nga nadalin-as.

6Ang mga tolda sa mga kawatan anaa sa kalinaw,

ug kadtong mga naghagit sa Dios layo sa kakuyaw,

nga nagdala sa ilang diosdios diha sa ilang kamot.

7“Apan pangutan-a ang mga mananap ug sila magtudlo kanimo,

ang mga langgam sa kalangitan, ug sila magsulti kanimo;

8o ang mga tanom sa yuta ug sila magtudlo kanimo;

ug ang isda sa kadagatan mopahayag kanimo.

9Kinsa niining tanan ang wala mahibalo

nga ang kamot sa Ginoo maoy nagbuhat niini?

10Anaa sa iyang kamot ang kinabuhi sa tanang butang nga buhi,

ug ang gininhawa sa tanang katawhan.

11Dili ba sulayan man sa dalunggan ang mga pulong,

sama nga ang lingagngag magtilaw sa pagkaon?

12Ang kaalam anaa sa mga gulang,

ug ang pagpanabot anaa sa gitas-on sa mga adlaw.

13Sa Dios anaa ang kaalam ug kusog;

anaa kaniya ang tambag ug ang pagpanabot.

14Kon siya maglumpag, walay usa nga makapabarog,

kon siya magtak-op sa usa ka tawo, walay makaabli.

15Kon siya maghikaw sa katubigan, kini mahubas;

kon iya kining paawason, mosanap kini sa kayutaan.

16Anaa kaniya ang kusog ug kaalam;

iya ang nanglimbong ug ang gilimbongan.

17Iyang dad-on ang mga magtatambag nga hinuboan

ug ang mga maghuhukom iyang himoong mga buang.

18Iyang gikuhaan ug gahom ang mga hari,

ug tapisan ang ilang mga hawak.

19Iyang dad-on ang mga pari nga hinuboan,

ug buntogon niya ang mga gamhanan.

20Iyang hikawan sa pagsulti kadtong mga piniyalan

ug kuhaon ang kaalam gikan sa mga tigulang.

21Iyang buboan ug pagtamay ang mga pangulo

ug badbaron ang bakos sa mga kusgan.

22Iyang buksan ang kahiladman gikan sa kangitngit,

ug dad-on ang hilabihang kangitngit ngadto sa kahayag.

23Iyang himoon nga gamhanan ang mga nasod ug iya kining laglagon;

iyang padak-on ang mga nasod ug ipabihag kini.

24Iyang kuhaon ang pagpanabot gikan sa mga pangulo sa mga katawhan sa yuta,

ug palatagawon sila sa kamingawan nga walay dalan.

25Mangapkap sila diha sa kangitngit nga walay kahayag;

himoon niya sila nga magsukarap sama sa tawong hubog.