SALMO 39 - Cebuano Form-Based Bible (2011)

Ang Pagsugid sa Tawo nga Nag-antosNgadto sa pangulong musikero: ngadto kang Jedutun. Salmo ni David.

1Ako miingon, “Bantayan nako ang akong mga pamaagi

aron dili ako makasala pinaagi sa akong dila;

sap-ongan nako ang akong baba

samtang ang mga daotan anaa pa sa akong atubangan.”

2Nagpakaamang ako ug nagpakahilom;

gipugngan nako ang akong kaugalingon bisan sa maayo;

misamot hinuon ang akong kasakit,

3ang akong kasingkasing nag-init sa sulod nako.

Samtang namalandong ako, midilaab ang kalayo;

unya misulti ako uban sa akong dila:

4“Ginoo, pahibaloa ako sa akong kataposan,

ug sa sukod sa akong mga adlaw;

pahibaloa ako unsa kahuyang ang akong kinabuhi!

5Tan-awa, imong gihimo ang akong mga adlaw nga pipila lamang ka dangaw,

ug ang tibuok nakong kinabuhi daw walay bili sa imong panan-aw.

Sa pagkatinuod, ang matag tawo nagbarog nga usa lamang ka gininhawa! Selah

6Sa pagkatinuod, ang matag tawo naglakaw ingon sa usa ka anino!

Sa pagkatinuod, ang ilang kaguliyang kawang lamang;

siya nagtigom ug wala mahibalo kon kinsa ang makaangkon niini.

7“Ug karon, Ginoo, unsa ba ang akong gipaabot?

Ang akong paglaom anaa kanimo.

8Luwasa ako gikan sa tanan nakong mga kalapasan.

Ayaw ako himoa nga talamayon sa mga buang.

9Amang ako; dili ako magbuka sa akong baba,

kay ikaw ang nagbuhat niini.

10Kuhaa ang imong hampak gikan kanako;

naut-ot ako pinaagi sa pagbunal sa imong kamot.

11Sa diha nga ikaw magpanton sa tawo

tungod sa iyang kasal-anan,

giguba nimo sama sa usa ka anunugba ang unsay mahal alang kaniya;

sa pagkatinuod ang matag tawo usa lamang ka gininhawa! Selah

12“Pamatia ang akong pag-ampo, O Ginoo

ug dungga ang akong pagtuaw;

ayaw pagpakahilom niining akong mga luha.

Kay ako dumuduong nimo,

usa ka lumalabay sama sa tanan nakong mga katigulangan.

13Lingiw gikan kanako, aron makasinati ako ug kalipay,

sa dili pa ako mogikan ug mahanaw.”