PINADAYAG 2 - Cebuano Form-Based Bible (2011)

Ang Mensahe Alang sa Efeso

1“Ngadto sa anghel sa iglesia sa Efeso, isulat kini: ‘Mao kini ang mga pulong sa nagkupot sa pito ka bituon diha sa iyang tuo nga kamot, ang naglakaw taliwala sa pito ka lamparahan nga bulawan.

2“ ‘Nasayod ako sa imong mga buhat, sa imong paghago ug sa imong paglahutay, ug nga ikaw dili makapailob sa daotan nga mga tawo ug giusisa nimo ang mga nag-ingon nga sila mga apostoles apan dili diay, ug nasuta nimo nga sila bakakon.

3Nasayod ako nga ikaw naglahutay ug nagpailob tungod sa akong ngalan, ug nga ikaw wala abota ug kapuol.

4Apan aduna akoy butang nga batok kanimo, nga imong gibiyaan ang paghigugma nga diha kanimo kaniadto.

5Busa hinumdomi diin ikaw gikan sa imong pagkahulog, ug paghinulsol ug buhata ang mga buhat nga imong gihimo kaniadto. Kay kon dili, anhaon ko ikaw ug kuhaon nako ang imong lamparahan gikan sa iyang dapit, gawas kon ikaw maghinulsol.

6Hinuon anaa kini kanimo, gidumtan nimo ang mga buhat sa mga Nicolaita, nga gidumtan usab nako.

7Gen. 2:9; Pin. 22:2; Ezek. 28:13; 31:8 (LXX). Ang adunay igdulungog kinahanglan nga magpatalinghog sa gisulti sa Espiritu ngadto sa mga iglesia. Siya nga magmadaogon hatagan nako ug pagtugot sa pagkaon gikan sa kahoy sa kinabuhi nga anaa sa paraiso sa Dios.’

Ang Mensahe Alang sa Esmirna

8 Isa. 44:6; 48:12; Pin. 1:17; 22:13. “Ug ngadto sa anghel sa iglesia sa Esmirna, isulat kini: ‘Mao kini ang mga pulong niya nga mao ang sinugdan ug ang kataposan, ang namatay ug ang nabuhi pag-usab.

9“ ‘Nasayod ako sa imong kasakit ug sa imong kakabos, apan dato ikaw, ug sa pagpasipala kanimo sa mga nag-ingon nga sila mga Judio apan dili diay, hinuon sinagoga sila ni Satanas.

10Ayaw kahadlok sa mga butang nga sa dili madugay imo nang antoson. Tan-awa, ang yawa hapit na magbanlod sa pipila kaninyo ngadto sa bilanggoan, aron masulayan kamo, ug sakiton kamo sulod sa napulo ka adlaw. Pagmatinumanon hangtod sa kamatayon, ug hatagan ko ikaw sa purongpurong nga kinabuhi.

11Pin. 20:14; 21:8. Ang adunay igdulungog kinahanglan nga magpatalinghog sa sulti sa Espiritu ngadto sa mga iglesia. Siya nga magmadaogon, dili maunsa sa ikaduhang kamatayon.’

Ang Mensahe Alang sa Pergamo

12“Ug ngadto sa anghel sa iglesia sa Pergamo, isulat kini: ‘Mao kini ang mga pulong sa naghupot sa hait nga espada nga adunay sulab.

13“ ‘Nasayod ako sa dapit nga imong gipuy-an, diin anaa ang trono ni Satanas. Gihuptan nimo ang akong ngalan ug wala nimo ilimod ang imong pagtuo kanako bisan pa sa mga adlaw ni Antipas nga akong saksi, ang akong sinaligan nga gipatay diha kaninyo, diin nagpuyo si Satanas.

14Num. 22:5, 7; 31:16; Deut. 23:4; Num. 25:1-3. Apan aduna akoy pipila ka butang batok kanimo: anaa diha kanimo ang pipila nga nagsunod sa gitudlo ni Balaam nga mao ang nagtudlo kang Balak sa pagbutang ug kapandolan sa atubangan sa mga anak ni Israel, pinaagi sa pagdani kanila sa pagkaon sa mga hinalad ngadto sa mga larawan ug sa paghimo ug salawayong pakighilawas.

15Adunay pipila usab nga nagsunod sa gitudlo sa mga Nicolaita.

16Busa paghinulsol, kay kon dili, moanha dayon ako kanimo ug gubaton nako sila pinaagi sa espada sa akong baba.

17Ex. 26:14-15; 16:33-34; Juan 6:48-50; Isa. 62:2; 65:15. Ang adunay igdulungog kinahanglang magpatalinghog sa gisulti sa Espiritu ngadto sa mga iglesia. Siya nga magmadaogon hatagan nako ug mana nga tinagoan, ug hatagan nako siya ug usa ka bato nga puti nga gisulatan ug usa ka bag-ong ngalan nga dili masabot ni bisan kinsa gawas niadtong nagdawat niini.’

Ang Mensahe Alang sa Tiatira

18“Ug ngadto sa anghel sa iglesia sa Tiatira isulat kini: ‘Mao kini ang mga pulong sa Anak sa Dios nga ang mga mata sama sa nagdilaab nga kalayo, ug ang mga tiil sama sa bronsi nga gipasinawan.

19“ ‘Nasayod ako sa imong mga buhat, sa imong gugma ug pagtuo ug pag-alagad ug paglahutay, ug nga ang imong ulahing mga buhat milabaw pa sa una.

201 Hari 16:31; 2 Hari 9:22, 30. Apan aduna akoy butang nga batok kanimo, imo lamang gipasagdan ang babaye nga si Jezebel nga nag-ingon nga siya propeta ug nga nagtudlo ug nagpahisalaag sa akong mga sulugoon sa paghimo ug salawayong pakighilawas ug sa pagkaon sa mga hinalad ngadto sa mga larawan.

21Gihatagan nako siya ug panahon sa paghinulsol, apan nagdumili siya sa paghinulsol sa iyang salawayong pagpakighilawas.

22Tan-awa, ibundak nako siya diha sa higdaanan, ug sila nga nanapaw uban kaniya ngadto sa dakong kasakitan, gawas kon sila maghinulsol sa iyang mga binuhatan,

23Sal. 7:9; Jer. 17:10; Sal. 62:12. ug ang iyang mga anak akong laglagon pinaagi ug kamatay. Unya ang tanang mga iglesia makaila nga ako mao ang magsusi sa hunahuna ug kasingkasing ug ako magbalos sa matag usa kaninyo sumala sa inyong mga binuhatan.

24Apan nganha sa uban kaninyo diha sa Tiatira, sa tanan kaninyo nga wala magsunod sa maong pagtulun-an, ug wala makakat-on sa laglom nga mga butang ni Satanas, sumala sa ilang gingalan niini, kaninyo mag-ingon ako, nga wala akoy laing palas-anon nga ipapas-an kaninyo,

25kupti lamang ninyo pag-ayo ang anaa kaninyo, hangtod sa akong pag-anha.

26Sal. 2:8-9 (LXX). Kaniya nga magmadaogon ug magtuman sa akong mga buluhaton hangtod sa kataposan,

Ako maghatag ug kagahom ibabaw sa kanasoran,

27ug mandoan niya sila pinaagi ug bunal nga puthaw

nga magdugmok kanila sama sa mga kolon nga gidugmok,

28ingon nga kini akong nadawat gikan sa akong Amahan, ug ihatag nako kaniya ang bituon nga kabugason.

29Ang adunay igdulungog kinahanglang magpatalinghog sa gisulti sa Espiritu ngadto sa mga iglesia.’