EXODO 30 - Cebuano Form-Based Bible (2011)

Ang Halaran sa Insenso

1“Pagbuhat ug usa ka halaran nga sunogan sa insenso. Buhata kini gikan sa kahoy nga akasya.

2Ang gitas-on niini usa ka maniko ug ang gilapdon niini usa ka maniko, kinahanglan nga kwadrado kini, ug ang gihabogon niini duha ka maniko. Ang mga sungaysungay niini kinahanglan nga unay sa halaran.

3Ug sapawi kini ug lunsayng bulawan, ang ibabaw ug ang mga bungbong nga naglibot niini ug ang mga sungaysungay niini. Kinahanglan nga buhatan nimo kini ug ribiti nga bulawan nga maglibot.

4Ug kinahanglan nga magbuhat ikaw alang niini ug duha ka argulya nga bulawan sa ilalom sa ribiti niini sa duha ka nag-atbang nga kilid niini, buhata kini aron kini mahimong balhoganan sa mga yayongan inigdala niini.

5Buhata ang mga yayongan gikan sa kahoy nga akasya ug sapawi kini ug bulawan.

6Ug ibutang kini sa atubangan sa tabil nga anaa sa duol sa sudlanan sa pagpamatuod, sa atubangan sa tabon sa sudlanan nga anaa sa ibabaw sa pagpamatuod diin adto ako makigtagbo kanimo.

7Si Aaron kinahanglan nga magsunog ug insenso nga humot sa ibabaw niini. Sa matag buntag sa diha nga mag-atiman siya sa mga lampara, magsunog siya niini,

8ug sa diha nga magdagkot si Aaron sa mga lampara sa pagkagabii, kinahanglan nga magsunog siya niini, ang insenso nga magpadayon sa atubangan sa Ginoo ngadto sa tibuok ninyong mga kaliwatan.

9Ayaw kamo paghalad sa ibabaw niini ug laing insenso o halad nga sunogon o halad nga pagkaon ug ayaw kamo pagbubo sa ibabaw niini ug halad nga ilimnon.

10Sa ibabaw sa mga sungaysungay kinahanglan nga si Aaron maghimo ug pagtabon sa mga sala makausa sa matag tuig. Pinaagi sa dugo sa halad tungod sa sala alang sa pagtabon sa mga sala, siya maghimo ug pagtabon sa mga sala alang niini makausa sa matag tuig sa tanan ninyong kaliwatan. Kini labing balaan alang sa Ginoo.”

Ang Buhis Alang sa Tolda nga Tagboanan

11Unya ang Ginoo miingon kang Moises,

12“Sa diha nga maghimo ikaw ug pagpanglista sa katawhan sa Israel, ang matag usa maghatag ngadto sa Ginoo ug lukat alang sa iyang kinabuhi, sa diha nga iphon nimo sila aron walay kamatay nga moabot kanila sa diha nga ikaw mag-ihap kanila.

13Ang matag usa nga maihap sa pagpanglista kinahanglan nga maghatag niini: tunga sa siklo sumala sa siklo sa balaang puluy-anan. Ang siklo may 20 ka gera, ang tunga sa siklo mao ang halad alang sa Ginoo.

14Ang matag usa nga maihap sa pagpanglista, sukad sa nagpanuigon ug 20 ug pataas kinahanglan nga maghatag ug halad sa Ginoo.

15Ang dato kinahanglan nga dili maghatag ug kapin ug ang kabos kinahanglan nga dili maghatag ug kulang sa tunga sa siklo, sa diha nga maghatag kamo ug halad ngadto sa Ginoo, aron sa paghimo ug pagtabon sa inyong kaugalingong mga sala.

16Ug dawata ang salapi nga halad sa pagtabon sa sala gikan sa katawhan sa Israel, ug gamita kini alang sa pag-alagad sa tolda nga tagboanan aron kini mahimo nga handomanan sa katawhan sa Israel, sa atubangan sa Ginoo aron paghimo ug pagtabon sa sala alang sa inyong kaugalingon.”

Ang Bronsi nga Planggana

17Ang Ginoo miingon kang Moises,

18“Magbuhat usab ikaw ug usa ka planggana nga bronsi, ug tungtonganan niini nga bronsi, alang sa paghugas. Ibutang kini sa tungatunga sa tolda nga tagboanan ug sa halaran ug butangi kini ug tubig sa sulod niini.

19Ug si Aaron ug ang iyang mga anak nga lalaki manghugas sa ilang mga kamot ug sa ilang mga tiil diha niini.

20Sa diha nga mosulod sila sa tolda nga tagboanan o sa diha nga moduol sila sa halaran aron sa pag-alagad, sa pagsunog ug usa ka halad alang sa Ginoo pinaagi sa kalayo, kinahanglan nga manghugas gayod sila aron dili sila mangamatay.

21Busa kinahanglan nga manghugas sila sa ilang mga kamot ug sa ilang mga tiil aron dili sila mamatay. Mahimo kini nga tulumanon alang kanila hangtod sa kahangtoran, kaniya ug sa iyang kaliwatan hangtod sa tanan nilang kaliwatan.”

Ang Lana nga Igdidihog

22Dugang pa, ang Ginoo miingon kang Moises,

23“Pagkuha usab ug labing maayo nga mga pahumot: lima ka gatos ka siklo nga mira nga tinubig, ug katunga sa gidaghanon nga mao ang 250 ka siklo nga humot nga kaningag ug 250 sa humot nga kahoy

24ug lima ka gatos sa casia, sumala sa siklo sa balaang dapit ug usa ka hin nga lana sa olibo.

25Buhata kini nga balaang lana nga igdidihog nga sama pagkasagol sa gibuhat sa tigbuhat ug pahumot. Ug kini mahimo nga balaang lana nga igdidihog.

26Dihogi pinaagi niini ang tolda nga tagboanan ug ang sudlanan sa pagpamatuod,

27ang lamisa ug ang tanan nga kahimanan niini, ang lamparahan ug ang tanang kahimanan niini, ang halaran sa insenso,

28ang halaran sa halad nga sunogon uban ang tanan nga kahimanan niini ug ang planggana ug ang tungtonganan niini.

29Ug ihalad kini aron kini mahimo nga labing balaan. Ang tanan nga masaghid niini mahimong balaan.

30Unya dihogi si Aaron ug ang iyang mga anak nga lalaki ug ihalad sila aron mag-alagad kanako ingon nga mga pari.

31Ug ikaw moingon sa katawhan sa Israel, ‘Kini mao ang akong balaan nga lana nga igdidihog hangtod sa tanan ninyong kaliwatan.

32Dili kini ibubo sa lawas sa yanong mga tawo ug dili magbuhat ug sama niini ug sagol. Kini balaan ug kini mahimo nga balaan alang kaninyo.

33Si bisan kinsa nga magsagol ug sama niini ug magbutang niini sa usa ka langyaw, ipahimulag siya gikan sa iyang katawhan.’ ”

Ang Insenso

34Unya ang Ginoo miingon kang Moises, “Pagkuha ug mga humot nga panakot, stakti, onika ug galbanum, mga humot nga panakot uban sa lunsay nga insenso. Ang matag usa kinahanglang sama ug timbang.

35Ug pagbuhat ug usa ka insenso nga humot, nga sama pagkasagol sa gibuhat sa tigbuhat ug pahumot nga tinimplahan ug asin, lunsay ug balaan.

36Ang uban niini dugmoka nga pino kaayo ug ibutang kini sa atubangan sa pagpamatuod sa tolda nga tagboanan diin adto ako makigkita kanimo. Kini mahimo nga labing balaan alang kaninyo.

37Ang insenso nga imong buhaton sumala sa mga sagol, ayaw buhata alang sa inyong kaugalingon. Kini mahimo nga balaan alang kaninyo ngadto sa Ginoo.

38Si bisan kinsa nga magbuhat ug sama niini aron gamiton ingon nga pahumot, kinahanglan nga ipahimulag gikan sa iyang katawhan.”