HABAKUK 3 - Cebuano Form-Based Bible (2011)

Ang Pag-ampo ni Habakuk

1Ang pag-ampo ni Habakuk nga propeta sumala sa Sigionot.

2O Ginoo, nakabati ako sa balita mahitungod kanimo,

ug sa imong buhat, O Ginoo, ako nahadlok.

Taliwala sa katuigan bag-oha kini,

taliwala sa katuigan ipahibalo kini;

diha sa kapungot hinumdomi ang kaluoy.

3Ang Dios mianhi gikan sa Teman,

ug ang Balaan gikan sa Bukid sa Paran.

Ang iyang himaya milukop sa kalangitan,

ug ang yuta napuno sa pagdayeg. Selah

4Ang iyang kasilaw sama sa adlaw,

ang mga bidlisiw nagpangidlap gikan sa iyang kamot;

ug didto gitagoan niya ang iyang gahom.

5Una kaniya miabot ang kamatay,

ug ang katalagman misunod dayon.

6Mitindog siya ug gisukod ang yuta;

mitan-aw siya ug gitay-og ang mga nasod;

unya gikatag ang walay kataposan nga kabukiran,

naunlod ang mga bungtod nga walay kataposan.

Ang iyang mga pamaagi sama sa karaang panahon.

7Nakita nako ang mga balongbalong sa Cusan nga diha sa kasakitan;

nangurog ang mga tabil sa yuta sa Midian.

8Batok ba sa mga suba ang imong kapungot, O Ginoo?

Ang imong kasuko batok ba sa mga suba,

o ang imong kaligutgot batok sa dagat,

sa dihang nagsakay ikaw sa imong mga kabayo,

sa imong mga karwahi sa kadaogan?

9Giibot nimo ang udyong

ug gitaod kini sa imong pana.

Imong gibahin ang yuta pinaagi sa mga suba. Selah

10Ang kabukiran nakakita kanimo, ug nangurog;

ang nagbul-og nga tubig mibaha;

ang kahiladman nagpagula sa iyang tingog,

kini nagbayaw sa iyang mga kamot ngadto sa itaas.

11Ang adlaw ug ang bulan mihunong sa ilang nahimutangan

sa kahayag sa imong mga udyong samtang sila nagpanaw,

sa pagkidlap sa imong naggilawgilaw nga bangkaw.

12Gitadlas nimo ang yuta diha sa kapungot,

giyatakan nimo ang mga nasod tungod sa kasuko.

13Mipanaw ikaw alang sa kaluwasan sa imong katawhan,

alang sa kaluwasan sa imong dinihogan.

Gigupok nimo ang ulo sa balay sa daotan,

gipabuy-od nga walay bisti, gikan sa paa ngadto sa liog. Selah

14Gipalagbasan nimo sa imong mga bangkaw ang ulo sa iyang mga manggugubat,

nga mianhi sama sa alimpulos aron sa pagkatag kanako,

naglipay nga daw molamoy sa kabos diha sa tago.

15Imong gipayatakan sa imong mga kabayo ang dagat,

ang dagkong balod sa kusog nga katubigan.

16Nakabati ako, ug mikurog ang akong lawas,

ang akong mga ngabil mikurog sa pagkabati sa tingog;

ang pagkadunot misulod sa akong kabukogan,

nagkurogkurog ang akong mga lakang.

Magpaabot lamang ako sa hilom alang sa adlaw sa kasamok

sa pag-abot ngadto sa katawhan nga mosulong kanamo.

17Bisan ug ang kahoyng igera dili mamulak,

o walay bunga ang kaparasan,

ang abot sa olibo makawang

ug ang kaumahan dili mohatag ug pagkaon,

ang mga karnero puohon gikan sa mga toril,

ug wala nay kahayopan sulod sa mga kamalig,

18apan bisan pa niana maglipay ako diha sa Ginoo,

magmalipayon ako diha sa Dios sa akong kaluwasan.

19 2 Sam. 22:34; Sal. 18:33. Ang Dios, ang Ginoo mao ang akong kusog;

gihimo niya ang akong mga tiil nga sama sa mga tiil sa bayeng lagsaw,

gipalakaw niya ako sa mga habog nakong dapit.

Ngadto sa pangulo sa mga mag-aawit: uban sa mga tulunggon nga may kuwerdas.