1 PEDRO 2 - Cebuano Form-Based Bible (2011)

1Busa, biniyaan ang tanang pagkadaotan ug ang tanang panglimbong ug pagpakaaron-ingnon ug kasina ug ang tanang pagpangdaot sa dungog,

2sama sa mga bata nga bag-o pang nahimugso, tinguhaa ninyo ang espirituhanong gatas nga walay sagol, aron nga pinaagi niini kamo motubo ngadto sa kaluwasan,

3Sal. 34:8. kay natilawan man ninyo ang kaayo sa Ginoo.

Ang Buhi nga Bato ug ang Balaang Nasod

4Duol kamo kaniya, ang buhi nga bato, nga sinalikway sa mga tawo apan pinili sa Dios ug bililhon.

5Ug ang inyong kaugalingon usab, ingon nga mga buhi nga bato, ipahimo ninyong espirituhanon nga balay, alang sa balaan nga pagkapari, aron sa paghalad ug espirituhanong mga halad nga kahimut-an sa Dios pinaagi kang Jesu-Cristo.

6 Isa. 28:16 (LXX). Kay kini anaa sa kasulatan,

“Tan-awa, gipahiluna nako diha sa Zion ang usa ka bato nga patukoranan,

pinili ug bililhon;

ug ang magsalig kaniya dili gayod maulawan.”

7 Sal. 118:22. Busa alang kaninyo nga nagtuo, siya bililhon; apan alang kanila nga wala magtuo,

“Ang maong bato nga gisalikway sa mga magtutukod

nahimong ulohang bato nga patukoranan,”

8 Isa. 8:14-15. ug

“Usa ka bato nga makapapandol sa mga tawo,

ug usa ka dakong bato nga makapukan kanila.”

Sila nangapandol tungod sa ilang pagkadili masinugtanon sa pulong, sumala sa gitagana nang daan alang kanila.

9 Ex. 19:5-6; Isa. 43:20 (LXX); Ex. 19:5; Deut. 4:20; 7:6; 14:2; Tit. 2:14; Isa. 43:21; Isa. 9:2. Apan kamo mao ang usa ka pinili nga kaliwat, harianong pagkapari, ang balaan nga nasod, ang katawhan nga iya sa Dios, aron kamo magmantala sa kahibulongang mga buhat niya nga nagtawag kaninyo gikan sa kangitngit ngadto sa iyang katingalahang kahayag.

10Hos. 2:23. Kaniadto kamo dili katawhan sa Dios, apan karon kamo katawhan na sa Dios; kaniadto kamo wala kaluy-i, apan karon kamo gikaluy-an na.

Mga Ulipon sa Dios

11Mga hinigugma, mangamuyo ako kaninyo ingon nga mga dumuduong ug mga langyaw, sa paglikay sa lawasnong mga pangibog nga nakig-away batok sa kalag.

12Pagbaton kamo ug ligdong nga pagkinabuhi uban sa mga Gentil, aron nga bisan kon moingon sila nga kamo mga tigbuhat ug daotan, tungod sa ilang pagkakita sa inyong mga maayong binuhatan, sila maghimaya sa Dios unya sa adlaw sa iyang pag-anhi.

13Tungod ug alang sa Ginoo, magpailalom unta kamo sa tanang tawhanong pagbuot, sa hari ingon nga maoy labaw sa tanan,

14o sa mga gobernador nga iyang pinadala aron sa pagsilot niadtong nagbuhat ug daotan, ug sa pagdayeg niadtong nagbuhat ug maayo.

15Kay kini kabubut-on sa Dios nga pinaagi sa pagbuhat ug maayo inyong mapahilom ang pagkawalay kahibalo sa mga tawong buangbuang,

16ingon nga kamo gawasnon ug wala maggamit sa pagkagawasnon ingon nga pasangil alang sa daotan, kondili ingon nga mga ulipon sa Dios.

17Tahora ninyo ang tanang tawo. Higugmaa ninyo ang kaigsoonan. Kahadloki ninyo ang Dios. Tahora ninyo ang hari.

Ang Panag-ingnan sa Pag-antos

18Mga sulugoon sa panimalay, pagmasinugtanon kamo sa inyong mga agalon uban sa tibuok nga pagkamatinahoron, dili lamang ngadto sa mga agalon nga maayo ug mapailubon kondili bisan ngadto usab kanila nga mga madaogdaogon.

19Kay dalaygon kon ang usa ka tawo, tungod sa iyang kahibalo sa Dios, moantos sa mga kasakitan nga ipahamtang kaniya nga dili subay sa kaangayan.

20Unsa may makuha ninyo kon sa dihang nakasala kamo ug gibun-og ug milahutay kamo niini? Apan kon nag-antos kamo tungod sa pagbuhat ug maayo ug kamo milahutay niini, kini dalaygon ngadto sa Dios.

21Kay alang niini gitawag kamo, tungod kay si Cristo nag-antos usab alang kaninyo, nga nagbilin kaninyo ug usa ka panag-ingnan aron kamo magsunod sa iyang mga tunob.

22Isa. 53:9. Siya walay sala nga nahimo, walay nakit-ang limbong diha sa iyang baba.

23Isa. 53:7. Sa gisultihan siya ug pasipala, wala siya mobalos ug pasipala; sa nag-antos siya, wala siya manghulga; hinuon gitugyan niya ang iyang kaugalingon ngadto kaniya nga maghukom uban sa katarongan.

24Isa. 53:5-6 (LXX). Siya gayod mao ang midala sa atong mga sala diha sa iyang lawas ngadto sa kahoy, aron kita mamatay ngadto sa sala ug mabuhi ngadto sa pagkamatarong. Pinaagi sa iyang mga samad kamo nangaayo.

25Kay sama sa mga karnero, kamo kaniadto nangasaag, apan karon kamo nahibalik na sa Tig-atiman ug Tigpanalipod sa inyong mga kalag.